ធ្លាក់យន្តហោះនៅរុស្ស៊ី ស្លាប់មនុស្ស២៩នាក់

មនុស្សមួយយន្តហោះ ក្នុងនោះមានអ្នកដំណើរ២៣នាក់និងសមាជិកអាកាសយានិក៦នាក់ បានបាត់បង់ជីវិតក្នុងសោកនាដកម្មដែនអាកាសដ៏រន្ធត់ នៅតំបន់គ្រីមៀ នៃប្រទេសរុស្ស៊ី។

តាមការផ្សាយរបស់ RT, យន្តហោះដឹកជញ្ជូនរបស់យោធាធុន An-26 បានធ្លាក់ចូលភ្នំ អំឡុងពេលហោះហើរលើឧបទ្វីបសមុទ្រខ្មៅ នាវេលាម៉ោង៦ល្ងាចថ្ងៃអង្គារទី៣១ខែមីនាឆ្នាំ២០២៦ បណ្តាលឲ្យស្លាប់មនុស្ស២៩នាក់។

ទីក្រុងមូស្គូ មិនបញ្ចេញព័ត៌មានឡើយថាតើយន្តហោះនេះ ហោះពីណាទៅណា ហើយក៏មិនដឹងច្បាស់អំពីមូលហេតុធ្លាក់ដែរ ប៉ុន្តែក្រសួងការពារជាតិរុស្ស៊ីបញ្ជាក់ថា វាមិនមែនធ្លាក់ដោយសារអ៊ុយក្រែនបាញ់ទេ។

យ៉ាងណា សារព័ត៌មាន RIA Novosti រាយការណ៍ថា បើយោងតាមទិន្នន័យបឋម យន្តហោះនេះគឺធ្លាក់ ដោយសារបញ្ហាបច្ចេកទេស។

សូមជម្រាបថា  An-26 គឺជាយន្តហោះដឹកជញ្ជូនយោធាធុនមធ្យម ដែលមានម៉ាស៊ីនស្លាបចក្រពីរ (Turboprop) រចនានិងផលិតដោយក្រុមហ៊ុន Antonov នៃអតីតសហភាពសូវៀត។

វាអាចដឹកទាហានបាន ៤០ នាក់ ឬទាហានឆត្រយោង ៣០ នាក់ ឬទំនិញទម្ងន់រហូតដល់ ៥ ៥០០ គីឡូក្រាម។ ជាមួយល្បឿនប្រហែល ៤៤០ គីឡូម៉ែត្រក្នុងមួយម៉ោង, An-26 អាចហោះបានចម្ងាយប្រហែល ១ ១០០ គីឡូម៉ែត្រ នៅពេលផ្ទុកពេញ៕

អត្ថបទ៖ សុខ សុវណ្ណ