ឥណ្ឌា រំពឹង​លក់​មីស៊ីល​ឲ្យ​ហ្វីលីពីន​ក្នុង​តម្លៃ​ជាង ២០០​លាន​ដុល្លារ​ក្នុង​ឆ្នាំ​២០២៥

ឥណ្ឌា រំពឹងថានឹងបញ្ចប់កិច្ចព្រមព្រៀងមីស៊ីលជាមួយហ្វីលីពីននៅឆ្នាំ​២០២៥​នេះ ដែលមានតម្លៃជាង ២០០​លានដុល្លារ។ កិច្ចព្រមព្រៀងនេះពាក់ព័ន្ធនឹងការលក់ប្រព័ន្ធមីស៊ីល​បាញ់​​ពី​លើ​ដីទៅអាកាស Akash រយៈចម្ងាយខ្លី ដែលត្រូវបានអភិវឌ្ឍដោយទីភ្នាក់ងារស្រាវជ្រាវការពារជាតិរបស់ប្រទេសឥណ្ឌា។

ហ្វីលីពីន ​បាន​បង្ហាញ​ចំណាប់​អារម្មណ៍​ក្នុង​ការ​បញ្ជា​ទិញ​ក្នុង​អំឡុង​ចាប់​ពី​ខែ​មេសា​ខាង​មុខ។ កិច្ចព្រមព្រៀងដ៏មានសក្ដានុពលនេះ ធ្វើឡើងបន្ទាប់ពីការលក់​មីស៊ីល​ល្បឿនលឿន BrahMos របស់ឥណ្ឌាក្នុងតម្លៃ ៣៧៥​លានដុល្លារទៅ​ឲ្យ​ហ្វីលីពីនកាល​ពី​ឆ្នាំ​២០២២ ដោយបញ្ជាក់ពីការកើនឡើងនៃការនាំចេញផ្នែកការពាររបស់ឥណ្ឌា ចំពេលមានភាពតានតឹងកាន់តែខ្លាំងជាមួយចិន។

ប្រព័ន្ធមីស៊ីល Akash មានរយៈចម្ងាយរហូតដល់ ២៥​គីឡូម៉ែត្រ ហើយពីមុន​វា​ត្រូវបាននាំចេញទៅប្រទេសអាមេនីក្នុងកិច្ចព្រមព្រៀង​តម្លៃ ២៣០​លានដុល្លារ។ ការលក់ឲ្យ​ទៅ​ហ្វីលីពីននាពេលខាងមុខ ត្រូវបានគេរំពឹងថានឹងលើសពីតម្លៃកិច្ចសន្យារបស់អាមេនី។ ព័ត៌មានលម្អិតជាក់លាក់ទាក់ទងនឹងចំនួនមីស៊ីល និងប្រព័ន្ធពាក់ព័ន្ធ ដូចជា រ៉ាដា មិនត្រូវបានបញ្ចេញឲ្យដឹង​ទេ។ កិច្ចព្រមព្រៀងនេះ បាន​បង្ហាញពីវឌ្ឍនភាពដ៏សំខាន់នៅក្នុងគំនិតផ្តួចផ្តើម​លើ​ការនាំចេញផ្នែកការពារ​ជាតិ​របស់ប្រទេសឥណ្ឌា។

ការទិញយកប្រព័ន្ធមីស៊ីល​ទាំងនេះរបស់ហ្វីលីពីន គឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយរបស់ខ្លួនក្នុងការធ្វើទំនើបកម្មសមត្ថភាពយោធា ជាពិសេសក្នុងការឆ្លើយតបទៅនឹងសកម្មភាពអះអាងរបស់ចិននៅក្នុងសមុទ្រចិនខាងត្បូង។ កងកម្លាំងប្រដាប់អាវុធហ្វីលីពីន បានបង្ហាញផែនការក្នុងការទិញសម្ភារៈ​យោធាបន្ថែម រួមទាំងមីស៊ីល BrahMos បន្ថែមទៀត និងយ៉ាងហោចណាស់នាវាមុជទឹកពីរគ្រឿង ដើម្បីបង្កើនឥរិយាបថការពាររបស់ពួកគេ។

ការអភិវឌ្ឍនេះ បង្ហាញពីតួនាទីយុទ្ធសាស្ត្ររបស់ឥណ្ឌាក្នុងការគាំទ្រសន្តិសុខក្នុងតំបន់ និងការប្តេជ្ញាចិត្តរបស់ខ្លួនក្នុងការពង្រឹងទំនាក់ទំនងការពារជាតិជាមួយប្រទេសជិតខាង៕

ដោយ៖ ឈាង