UN អំពាវនាវឱ្យមាន​ដំណោះស្រាយ​នៅ​​មីយ៉ាន់ម៉ា​ឱ្យបានឆាប់ដើម្បីឲ្យជនជាតិរ៉ូហ៊ីងយ៉ាវិលវិញ

បេសកជនអង្គការសហប្រជាជាតិអំពាវនាវឱ្យមានការដោះស្រាយនយោបាយនៅមីយ៉ាន់ម៉ាឱ្យបានកាន់តែ​ឆាប់ ដើម្បីឲ្យជន​ជាតិរ៉ូហ៊ីងយ៉ា​ដែល​រត់ភៀស​ខ្លួន អាចវិលត្រឡប់ចូល​​ប្រទេសវិញ ខណៈពួកគេភាគច្រើនកំពុងរស់នៅប្រទេសបង់ក្លាដែស។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Anadolu នៅថ្ងៃទី២៤ខែកុម្ភៈនេះ។

បេសកជនពិសេសរបស់អង្គការសហប្រជាជាតិនៃអគ្គលេខាធិការអង្គការសហប្រជាជាតិទទួលបន្ទុកប្រទេសមីយ៉ាន់ម៉ា លោកស្រី Julie Bishop បានអំពាវនាវកាលពីថ្ងៃអាទិត្យ និងធ្វើការកត់សម្គាល់នៅពេលជួបជាមួយ លោក Md. Touhid Hossain ទីប្រឹក្សាកិច្ចការបរទេសនៃរដ្ឋាភិបាលបណ្តោះអាសន្ននៃប្រទេសបង់ក្លាដែស នៅការិយាល័យរបស់គាត់​ក្នុង​រដ្ឋធានីដាកា ចំពោះដំណោះស្រាយនយោបាយដំបូងនៅក្នុងប្រទេសមីយ៉ាន់ម៉ាដែលនឹងនាំទៅដល់ការវិល​ត្រឡប់​របស់​ជនជាតិរ៉ូហ៊ីងយ៉ាទៅកាន់ប្រទេសកំណើតរបស់ពួកគេវិញ។

លោកស្រី បានសង្កត់ធ្ងន់ថា លោកស្រីកំពុងធ្វើការដើម្បីរក្សាការយកចិត្តទុកដាក់របស់ពិភពលោកលើបញ្ហានេះ ហើយសង្ឃឹមថា សន្និសីទអង្គការសហប្រជាជាតិដែលស្នើឡើង ដោយប្រធានទីប្រឹក្សារដ្ឋាភិបាលបណ្តោះអាសន្ននៃប្រទេសបង់ក្លាដែស លោក Muhammad Yunus នឹងបង្កើតកម្លាំងគ្រប់គ្រាន់សម្រាប់កិច្ចខិតខំប្រឹងប្រែងប្រកបដោយអត្ថន័យ​ពីសហគមន៍អន្តរជាតិ។

ចំណែក លោក Hossain បានលើកឡើងពីការព្រួយបារម្ភយ៉ាងខ្លាំងថា ការបរាជ័យក្នុងការនាំយកដំណោះស្រាយប្រកប​ដោយនិរន្តរភាពចំពោះវិបត្តិនេះនឹងមិនត្រឹមតែប៉ះពាល់ដល់ប្រទេសមីយ៉ាន់ម៉ា និងបង់ក្លាដែសប៉ុណ្ណោះទេ ថែមទាំងធ្វើឱ្យមានអស្ថិរភាពបន្ថែមទៀតដល់សន្តិភាព និងសន្តិសុខ​ក្នុង​​តំបន់ទាំងមូល។

លោក បានបន្ថែមថា ការពង្រឹងសម្ពាធ​ពីសហគមន៍អន្តរជាតិលើមីយ៉ាន់ម៉ា អាចនាំទៅដល់ការបញ្ចប់ជម្លោះ និងនាំមកនូវ​សន្តិភាពក្នុងប្រទេសមីយ៉ាន់ម៉ា ដោយបន្ថែមថា ប្រទេសជិតខាងអាចដើរតួនាទីយ៉ាងសំខាន់ក្នុងការកសាងមីយ៉ាន់ម៉ាឡើងវិញ ហើយវានឹងត្រូវការការគាំទ្រពីមនុស្សគ្រប់គ្នា។

អ្នកទាំងពីរបានយល់ព្រមធ្វើការជាមួយគ្នាដើម្បីនាំមកនូវលទ្ធផលយូរអង្វែងពីសន្និសីទអង្គការសហប្រជាជាតិដែលនឹងប្រារព្ធឡើងនៅឆ្នាំនេះស្តីពីជនជាតិរ៉ូហ៊ីងយ៉ា និងបញ្ហាដែលទាក់ទងនឹងជនជាតិភាគតិចផ្សេងទៀត។

បើតាមលោកលោក Yunus បាននិយាយកាលពីខែមុនថា ជនជាតិរ៉ូហ៊ីងយ៉ាប្រហែល ១០០០០០ នាក់ទៀតបានឆ្លងកាត់ព្រំដែនរបស់ប្រទេសមីយ៉ាន់ម៉ា មកជ្រកកោននៅក្នុងជំរុំជនភៀសខ្លួនក្នុងទីក្រុង Cox’s Bazar ចំពេលមានជម្លោះកាន់តែខ្លាំងឡើងនៅក្នុងប្រទេសមីយ៉ាន់ម៉ារវាងរដ្ឋាភិបាលយោធា និងក្រុមឧទ្ទាម ដែលដាក់បន្ទុកបន្ថែមលើប្រទេសបង់ក្លាដែស។

គួរបញ្ជាក់ថាប្រទេសបង់ក្លាដែសបានធ្វើជាម្ចាស់ផ្ទះបណ្ដោះអាសន្នទទួលជនជាតិរ៉ូហ៊ីងយ៉ាជាង ១.២ លាននាក់នៅក្នុងស្រុក Cox’s Bazar ភាគអាគ្នេយ៍នៃប្រទេសចាប់តាំងពីពួកគេបានភៀសខ្លួនចេញពីការបង្រ្កាបដោយយោធានៅក្នុងប្រទេសមីយ៉ាន់ម៉ាក្នុងខែសីហាឆ្នាំ ២០១៧មកម្លេះ៕

អត្ថបទ៖ ប៊ុន សុភាព