ធនាគារ​ពិភពលោក៖ អ៊ុយក្រែន​ត្រូវការ​ ៥២៤​ពាន់​លាន​ដុល្លារ​ដើម្បី​កសាង​ប្រទេស​ឡើង​វិញ

អ៊ុយក្រែន នឹងត្រូវការថវិកា​ប្រហែល​ចំនួន ៥២៤​ពាន់លានដុល្លារ ដើម្បីស្តារ និងកសាង​ប្រទេស​ឡើងវិញបន្ទាប់ពីសង្គ្រាមរយៈពេល ៣​ឆ្នាំជាមួយរុស្ស៊ី ពោល​គឺ​ស្មើ​នឹង​ជិត​ ៣​ដង​នៃ​ទិន្នផលសេដ្ឋកិច្ច​ដែល​រំពឹង​ទុក​នៅ​ឆ្នាំ​២០២៤។ នេះបើយោងតាមការវាយតម្លៃថ្មីរបស់​ធនាគារពិភពលោក។

របាយការណ៍នេះបានបង្ហាញពីការខូចខាតយ៉ាង​​ដំណំ​ចំពោះហេដ្ឋារចនាសម្ព័ន្ធ សេដ្ឋកិច្ច និងប្រព័ន្ធសង្គមរបស់អ៊ុយក្រែន ដោយបានគូសបញ្ជាក់ពីបញ្ហាប្រឈមរយៈពេលវែងដែលប្រទេសនេះ​ជួប​ប្រទះ​ បើទោះបីជាជម្លោះ​អាច​នឹងបញ្ចប់ក្នុងពេលឆាប់ៗ​ខាង​មុខ​ក៏ដោយ។

ការចំណាយលើការសាងសង់ឡើងវិញ មានការកើនឡើងគួរ​ឲ្យ​កត់សម្គាល់ពីការប៉ាន់ប្រមាណពីមុន ដែលឆ្លុះបញ្ចាំងពី​ការបំផ្លិចបំផ្លាញនៃវិស័យសំខាន់ៗដូចជា លំនៅដ្ឋាន ថាមពល ការដឹកជញ្ជូន និងឧស្សាហកម្ម។ ប្រហែល ១៣% នៃលំនៅដ្ឋានសរុបរបស់ប្រទេសអ៊ុយក្រែនបាន​រង​ការ​ខូចខាត ឬបំផ្លាញ ដែលប៉ះពាល់ដល់មនុស្ស​ ២,៥​លាន​គ្រួសារ។ កាល​ពី​១​ឆ្នាំ​មុន ការ​ប៉ាន់​ស្មាន​លើ​ការ​ចំណាយ​ក្នុង​ការ​កសាង​ឡើង​វិញ មាន​ត្រឹម ៤៨៦​ពាន់​លាន​ដុល្លារ​ប៉ុណ្ណោះ គឺ​កើន​ឡើង​ប្រមាណ​ជាង ៧%។

ធនាគារពិភពលោក សហភាពអឺរ៉ុប និងអង្គការសហប្រជាជាតិ បានរួមគ្នាធ្វើការវាយតម្លៃ ដោយសង្កត់ធ្ងន់ថា ជំនួយ និងការវិនិយោគភ្លាមៗនឹងមានសារៈសំខាន់សម្រាប់ការស្តារឡើងវិញរបស់អ៊ុយក្រែន។

អាទិភាពសំខាន់ៗសម្រាប់ការស្តារឡើងវិញរបស់អ៊ុយក្រែនរួមមាន វិស័យលំនៅដ្ឋាន​មានចំនួនប្រហែល ៨៤​ពាន់លានដុល្លារនៃតម្រូវការរយៈពេលវែងសរុប បន្ទាប់មកគឺការដឹកជញ្ជូនជិត ៧៨​ពាន់លានដុល្លារ, ថាមពល និងការជីកយករ៉ែជិត ៦៨ពាន់លានដុល្លារ, ពាណិជ្ជកម្ម និងឧស្សាហកម្មជាង ៦៤​ពាន់លានដុល្លារ និងកសិកម្មមានជាង ៥៥​ពាន់លានដុល្លារ ខណៈ​ការចំណាយលើការបោសសម្អាត និងការគ្រប់គ្រងកម្ទេចកម្ទី​​មានចំនួនជិត ១៣​ពាន់លានដុល្លារ។

សហរដ្ឋអាមេរិក សហភាពអឺរ៉ុប និងសម្ព័ន្ធមិត្តផ្សេងទៀត បានសន្យាបន្តការគាំទ្រផ្នែកហិរញ្ញវត្ថុ ប៉ុន្តែភាពមិនច្បាស់លាស់នៅតែមានលើការផ្តល់មូលនិធិរយៈពេលវែង។ ទន្ទឹមគ្នា​នេះ​ដែរ កិច្ច​ពិភាក្សាកំពុងបន្តអំពីថាតើ​ទ្រព្យសម្បត្តិរបស់រុស្ស៊ីដែលបង្កក នៅក្នុងធនាគារលោកខាងលិច អាចត្រូវបានគេប្រើប្រាស់ដើម្បីជួយផ្តល់ហិរញ្ញប្បទានដល់ការកសាងឡើងវិញរបស់ប្រទេសអ៊ុយក្រែនដែរឬទេ។

ទោះបីជាមានបញ្ហាប្រឈមក៏ដោយ ក៏មន្ត្រីអ៊ុយក្រែននៅតែមានសុទិដ្ឋិនិយម ដោយបញ្ជាក់ថា ភាពធន់របស់ប្រទេស និងការគាំទ្រពីអន្តរជាតិ នឹងក្លាយជាកត្តាសំខាន់ក្នុងកិច្ចខិតខំប្រឹងប្រែងស្តារឡើងវិញរបស់ខ្លួន៕

ដោយ៖ ឈាង