កងទ័ព​អ៊ីស្រាអែលប្រកាស​​​​ឈរជើង​​នៅ​ក្នុង​តំបន់​ហ្គាហ្សា លីបង់ និង​ស៊ីរី​ជាអចិន្ត្រៃយ៍

កងទ័ពអ៊ីស្រាអែលនឹងនៅតែស្ថិតនៅក្នុងតំបន់ហ្គាហ្សា លីបង់ និងស៊ីរី ដោយគ្មានកំណត់ ខណៈដែលយោធាអ៊ីស្រាអែល រឹតបន្តឹងការកាន់កាប់របស់ខ្លួនលើទឹកដីជាច្រើន។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី១៧ខែមេសានេះ។

យោធាអ៊ីស្រាអែល បានចេញសេចក្ដីថ្លែងការណ៍​មួយថា «យោធាខ្លួន​នឹងនៅតែស្ថិតនៅក្នុងតំបន់ហ្គាហ្សា ដូចនៅប្រទេស​លីបង់ និងស៊ីរីជាអចិន្ត្រៃយ៍»។ យោធាក៏បាននិយាយថា ខ្លួនបានប្រែក្លាយ ៣០ភាគរយនៃ ហ្គាហ្សា ទៅជាតំបន់ការពារ (សន្តិសុខ) ហើយបានវាយប្រហារប្រហែល ១២០០ គោលដៅ​ដែលខ្លួន​ចាត់​ទុក​ថា​តំបន់​​​​គ្រប់​គ្រង​ដោយ​​ក្រុម​ហាម៉ាស ចាប់តាំងពីការចាប់ផ្តើមការវាយលុកជាថ្មីឡើងវិញនៅថ្ងៃទី១៨ខែមីនា។

នាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាថា នឹងកម្ទេចក្រុមហាម៉ាស និងនាំយកឈ្លើយសឹកចំនួន៥៩នាក់ដែលត្រូវបានចាប់ខ្លួនដោយក្រុមនេះនៅក្នុងតំបន់ហ្គាហ្សាមកវិញ ប៉ុន្តែក្រុមហាម៉ាស់បាននិយាយថា ខ្លួននឹងមិនយល់ព្រមដោះលែងចំណាប់ខ្មាំងដោយគ្មានការដកទ័ពអ៊ីស្រាអែលទាំងស្រុងចេញពីហ្គាហ្សា និងបទឈប់បាញ់យូរអង្វែងនោះទេ។

អ៊ីស្រាអែលថា ខ្លួនត្រូវតែរក្សាការគ្រប់គ្រង «តំបន់សន្តិសុខ» ដើម្បីការពារការកើតឡើងម្តងទៀតនៃការវាយប្រហារថ្ងៃទី ៧ ខែតុលា ឆ្នាំ ២០២៣ របស់ហាម៉ាស ដែលបានសម្លាប់មនុស្ស ១១៣៩ នាក់ និង ២៥០ នាក់ផ្សេងទៀតត្រូវបានចាប់ខ្លួន។

លើសពីនេះលោក Netanyahu ក៏បាននិយាយផងដែរថា អ៊ីស្រាអែលនឹងអនុវត្តសំណើរបស់ប្រធានាធិបតីអាមេរិក Donald Trump សម្រាប់ការតាំងទីលំនៅថ្មីរបស់ប្រជាជននៅតំបន់ហ្គាហ្សា នៅក្នុងប្រទេសផ្សេងទៀតដែលលោកហៅថាជា «ការធ្វើចំណាកស្រុកដោយស្ម័គ្រចិត្ត»។

ពាក់ព័ន្ធនឹងការមិនព្រមដកទ័ពចេញរបស់អ៊ីស្រាអែលនេះ ប្រធានាធិបតីលីបង់ លោក Joseph Aoun បាននិយាយថា ការបន្តវត្តមានរបស់អ៊ីស្រាអែល នៅក្នុងតំបន់មួយចំនួននៃភាគខាងត្បូងលីបង់ កំពុង រារាំងការដាក់ពង្រាយកងទ័ពលីបង់។ យោងតាមកិច្ចព្រមព្រៀងដែលបានចុះហត្ថលេខាកាលពីខែវិច្ឆិកា បានបញ្ចប់សង្គ្រាមជាងមួយឆ្នាំ ភាគីទាំងពីរគឺក្រុមហេសបូឡានិងអ៊ីស្រាអែល បានយល់ព្រមដកខ្លួនចេញពីភាគខាងត្បូងលីបង់ ហើយចាកចេញពីតំបន់ដែលត្រូវគ្រប់គ្រងដោយកងទ័ពលីបង់។ ទោះបីជាយ៉ាងណាក៏ដោយ អ៊ីស្រាអែលបានដកទ័ពរបស់ខ្លួនចេញមួយផ្នែកប៉ុណ្ណោះពីភាគខាងត្បូងរបស់ប្រទេស ដោយទុកទ័ពយ៉ាងហោចណាស់ប្រាំទីតាំង។

ក្រសួង​សុខាភិបាល​លីបង់​ថា ការ​វាយ​ប្រហារ​ដោយ​ដ្រូន​អ៊ីស្រាអែល​ពីរ​គ្រឿង​នៅ​ភាគ​ខាង​ត្បូង​ប្រទេស​លីបង់​បាន​សម្លាប់​មនុស្ស​ពីរ​នាក់​កាល​ពី​ថ្ងៃ​ពុធ។ សរុបការវាយប្រហាររបស់អ៊ីស្រាអែលនៅលីបង់បានសម្លាប់ជនស៊ីវិលជាង៧០ នាក់ចាប់តាំងពីបទឈប់បាញ់ចូលជាធរមានក្នុងខែវិច្ឆិកា។

លើសពីនេះអ៊ីស្រាអែលក៏បានបង្កើតប៉ុស្តិ៍យោធាជាច្រើននៅក្នុងទឹកដីស៊ីរី រួមទាំងនៅលើកំពូលភ្នំ Hermon និងប្រើយន្តហោះចម្បាំងបើកការវាយប្រហាររាប់រយលើកក្រោយការទម្លាក់អតីតប្រធានាធិបតីស៊ីរីលោក Bashar al-Assad៕

អត្ថបទ៖ ប៊ុន សុភាព