ព័ត៌មានអន្ដរជាតិ

អ្នកកើតជំងឺពិសធ្យូងឆ្លងពីសាច់គោនៅថៃកើនដល់៤នាក់

បានផុស

១ year មុន

នៅ

ថ្ងៃពុធ ៧ ឧសភា ២០២៥

ដោយ

ចំនួនអ្នកកើតជំងឺអង់ត្រាក់ (ពិសធ្យូង) ដែលឆ្លងពីសាច់គោនៅក្នុងខេត្ត Mukdahan ប្រទេសថៃ បានកើនដល់ ៤នាក់ហើយ ខណៈមានម្នាក់បានបាត់បង់ជីវិតលើកដំបូងក្នុងរយៈពេល៣ទសវត្សរ៍កន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Bangkok Post នៅថ្ងៃទី០៧ខែឧសភាឆ្នាំ២០២៥ អ្នកជំងឺពីរនាក់បានសម្រាកព្យាបាលនៅមន្ទីរពេទ្យខេត្ត Mukdahan និងម្នាក់ទៀតនៅមន្ទីរពេទ្យស្រុក Don Tan។ ក្នុងចំណោមមនុស្ស៦៣៦នាក់ដែលមានហានិភ័យកើតជំងឺពិសធ្យូងដោយសារមានទំនាក់ទំនងជាមួយប្រភពឆ្លង, មាន៥៣៨នាក់បានបញ្ចប់ការសង្កេតរយៈពេល៧ថ្ងៃរួចហើយ ហើយនៅសល់ ៩៨នាក់នឹងបញ្ចប់នៅថ្ងៃពុធនេះ។

អ្នកជំងឺដែលស្លាប់គឺបុរសវ័យ៥៣ឆ្នាំ ជាអ្នកស្រុក Don Tan នៃខេត្ត Mukdahan ជាប់ព្រំដែនឡាវ ដោយគាត់បានឆ្លងជំងឺនេះ ក្រោយប៉ះពាល់និងទទួលទានសាច់គោដែលមានផ្ទុកមេរោគ Bacillus ក្នុងអំឡុងពិធីបុណ្យសាសនាមួយ។

អាជ្ញាធរបានជំរុញឱ្យសាធារណជនជៀសវាងការទទួលទានសាច់គោឆៅ និងបរិភោគតែសាច់ដែលចម្អិនឱ្យបានឆ្អិនល្អនៅកម្ដៅយ៉ាងតិច ១២០អង្សាសេ ឬស្ងោររយៈពេល ៣០នាទី ដើម្បីសម្លាប់បាក់តេរីអង់ត្រាក់ និងមិនត្រូវបរិភោគសាច់ឆៅ ជាពិសេសក្នុងពិធីបុណ្យក្នុងស្រុក។

ជំងឺនេះត្រូវបានរកឃើញជាទូទៅនៅក្នុងសត្វគោ ក្របី ពពែ និងចៀម ប៉ុន្តែក្នុងករណីដែលផ្ទុះក្នុងប្រទេសថៃនេះប្រភពឆ្លងចេញពីសាច់គោ។

ឆ្លើយតបទៅនឹងការរីករាលដាលនេះ ការិយាល័យបសុសត្វខេត្ត Mukdahan បានដាក់សត្វចំនួន ១២៤ក្បាលឱ្យនៅដាច់ពីគេក្នុងរយៈពេល ៣០ថ្ងៃ និងបានចាក់ថ្នាំអង់ទីប៊ីយោទិច និងវ៉ាក់សាំងដល់សត្វជាង ១ ២០០ក្បាលក្នុងរង្វង់ដី ៥គីឡូម៉ែត្រពីកន្លែងឆ្លង។ គេនៅមិនទាន់មានវ៉ាក់សាំងសម្រាប់មនុស្សទេ ប៉ុន្តែការឆ្លងមេរោគអាចត្រូវបានព្យាបាលយ៉ាងមានប្រសិទ្ធភាពជាមួយនឹងថ្នាំអង់ទីប៊ីយោទិចតាមសរសៃឈាម។

គួរបញ្ជាក់ថា ពិសធ្យូងគឺជាជំងឺឆ្លងធ្ងន់ធ្ងរដែលបណ្តាលមកពីបាក់តេរី Bacillus។ មនុស្សអាចឆ្លងជំងឺនេះតាមរយៈការប៉ះពាល់ផ្ទាល់ឬដោយប្រយោលជាមួយសត្វឈឺ ហើយរោគសញ្ញាមានដូចជាចេញពងបែកតូចៗ ឈឺក្បាល រាគ និងដង្ហើមខ្លី ហើយរោគសញ្ញានឹងចេញក្រោយការឆ្លង២ខែ។ បើមិនមានការព្យាបាលទាន់ពេលទេ មនុស្សអាចស្លាប់បាន៕