ព័ត៌មានអន្ដរជាតិ

កុមារីនិងឪពុកស្លាប់ដោយសារដើមឈើរលំសង្កត់លើក្នុងគ្រោះរញ្ជួយដីថ្មីនៅមីយ៉ាន់ម៉ា

បានផុស

៤០ វិនាទី មុន

នៅ

ថ្ងៃចន្ទ ១៩ ឧសភា ២០២៥

ដោយ

ក្មេងស្រីអាយុ៤ឆ្នាំ និងឪពុករបស់នាង ដែលកំពុងជ្រកក្នុងបរិវេណវត្តមួយកន្លែងក្នុងក្រុង Maha Aungmyay ទីក្រុង Mandalay បានស្លាប់ដោយសារដើមឈើរលំសង្កត់អំឡុងពេលមានការរញ្ជួយដីកម្រិត ៥.២ រ៉ិចទ័រ កាលពីថ្ងៃសៅរ៍។ នេះបើយោងតាមការចេញផ្សាយរបស់សម្លេងប្រជាធិបតេយ្យភូមា DVB នៅថ្ងៃទី១៩ខែឧសភានេះ។

(រូបភាព៖ Myanmar Fire Services Department)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានឧតុនិយម និងជលសាស្ត្រមីយ៉ាន់ម៉ា បានរាយការណ៍ថា គ្រោះរញ្ជួយដីនេះបានវាយប្រហារនៅជម្រៅ៩.៦ គីឡូម៉ែត្រ ភាគនិរតីនៃទីប្រជុំជន Myittha ដែលស្ថិតនៅចម្ងាយ ៧១ គីឡូម៉ែត្រ ភាគខាងត្បូងទីក្រុង Mandalay ជាទីក្រុងដែលរងការវាយប្រហារដោយគ្រោះរញ្ជួយដីដ៏ខ្លាំងកាលពីចុងខែមីនាឆ្នាំនេះ។

ចាប់តាំងពីការរញ្ជួយដីដ៏ខ្លាំងក្លាកាលពីថ្ងៃទី២៨ខែមីនាមក អ្នកស្រុកនៅទីក្រុង Mandalay បានរាយការណ៍ពីការរញ្ជួយដីជាញឹកញាប់។

តាមការកត់ត្រាការមានរញ្ជួយដីចំនួន១៧៥លើក ចាប់តាំងពីថ្ងៃទី២៨ ខែមីនា។ នេះបើយោងតាមគណៈកម្មាធិការអភិវឌ្ឍន៍ទីក្រុង Mandalay អគារជិត ៤,០០០ ត្រូវបានបំផ្លាញដោយការរញ្ជួយដីនៅទីក្រុង Mandalay។

គួរបញ្ជាក់ថា យោងតាមទិន្នន័យរបស់ DVB បានឱ្យដឹងថា យ៉ាងហោចណាស់មនុស្ស ៤,៤៧៧ នាក់បានស្លាប់ និង ១១,៣៦៦ នាក់បានរងរបួសដោយការរញ្ជួយដីនៅថ្ងៃទី ២៨ ខែមីនា ខណៈតូរលេខពីប្រភពខ្លះមានចំនួនខុសគ្នា៕