ព័ត៌មានអន្ដរជាតិ

ហ្សេលេនស្គី ប្រាប់ថា អ៊ុយក្រែន-អាមេរិកឈានដល់កិច្ចព្រមព្រៀងដ្រូនដ៏ធំមួយ

បានផុស

១១ ខែ មុន

នៅ

ថ្ងៃចន្ទ ៧ កក្កដា ២០២៥

ដោយ

Chheang

លោកប្រធានាធិបតី វ៉ូឡូឌីមៀរ ហ្សេលេនស្គី បានប្រកាសថា អ៊ុយក្រែន និងសហរដ្ឋអាមេរិកបានឈានដល់កិច្ចព្រមព្រៀង «ដ៏ធំមួយ» ដើម្បីពង្រឹងកិច្ចសហប្រតិបត្តិការលើផលិតកម្មដ្រូន (យន្តហោះគ្មានមនុស្សបើក) ដែលជាការជំរុញដ៏សំខាន់ដល់សមត្ថភាពដែនអាកាសរបស់ទីក្រុងកៀវ។

លោក ដូណាល់ ត្រាំ និងលោក វ៉ូឡូឌីមៀរ ហ្សេលេនស្គី (រូបថត៖ Daily Express)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយកាលពីថ្ងៃទី៦ខែកក្កដារបស់ទីភ្នាក់ងារព័ត៌មាន Anadolu លោក ហ្សេលេនស្គី បាននិយាយថា កិច្ចព្រមព្រៀងមួយត្រូវបានចុះហត្ថលេខាកាលពីសប្ដាហ៍មុន រវាងក្រសួងការពារជាតិអ៊ុយក្រែន និងក្រុមហ៊ុន«ឈានមុខ»មួយរបស់សហរដ្ឋអាមេរិក ដើម្បីផ្គត់ផ្គង់ដ្រូនរាប់សិបម៉ឺនគ្រឿង នៅឆ្នាំ២០២៥នេះ ជាមួយនឹងផែនការបន្ថែមទៀតសម្រាប់ឆ្នាំក្រោយ។ កិច្ចព្រមព្រៀងនេះក៏ផ្តល់អាទិភាពដល់ការអភិវឌ្ឍដ្រូនស្ទាក់ចាប់ ដើម្បីការពារប្រឆាំងនឹងការវាយប្រហារតាមអាកាសរបស់សត្រូវផងដែរ។

ដោយសំដៅលើការសន្ទនានាពេលថ្មីៗនេះជាមួយប្រធានាធិបតីអាមេរិក ដូណាល់ ត្រាំ លោក ហ្សេលេនស្គី បានពណ៌នាថា វា«ប្រហែលជាការសន្ទនាដ៏ល្អបំផុតដែលយើងធ្លាប់មានកន្លងមក ហើយមានផ្លែផ្កាខ្លាំងណាស់»។ លោកបានបន្ថែមថា ពួកគេក៏បានពិភាក្សាអំពីកិច្ចសហប្រតិបត្តិការការពារអាកាសផងដែរ ក្នុងអំឡុងពេលនៃការហៅទូរសព្ទ។

សូមជម្រាបថា កិច្ចព្រមព្រៀងនេះ កើតឡើងនៅពេលដែលរុស្ស៊ីបន្តការវាយប្រហារដោយដ្រូន និងមីស៊ីលជាប្រចាំថ្ងៃលើទីក្រុងនានារបស់អ៊ុយក្រែន រួមទាំងរដ្ឋធានីកៀវ ដោយលោក ហ្សេលេនស្គី បានសង្កត់ធ្ងន់ថា ការផលិតដ្រូនស្ទាក់ចាប់ នឹងក្លាយជាអាទិភាពកំពូលក្នុងការទប់ទល់នឹងការវាយប្រហារពីក្រុងមូស្គូ៕

ដោយ៖ ឈាង