អស់ពីរឿងអាស្រូវស្រីស្នេហ៍ ឥលូវ ថៃ ផ្ទុះរឿងព្រះសង្ឃប្រើហិង្សាលើកូននេន ផ្អើលចំណុះជើងវត្ត

បន្ទាប់ពីព្រះសង្ឃជាន់ខ្ពស់និងស្រីស្នេហ៍បង្កការភ្ញាក់ផ្អើលមិនទាន់សោះស្រាយចប់ផង ពេលនេះប្រទេសថៃកំពុងតែជួបរឿងរ៉ាវថ្មីមួយទៀត ដោយបែកធ្លាយឃ្លិបព្រះសង្ឃ​នៅខេត្ត​ឈុនបុរីធ្វើ​ទារុណកម្ម​លើសង្ឃ​ចំណូលថ្មី និងកូននេនតូចៗ ដូចជាទាសករ រហូតពលរដ្ធទាមទារឲ្យរកយុត្តិធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទំព័រ Survive កាលពីថ្ងៃទី២១ ខែកក្កដា បានបង្ហោះនូវឃ្លិបមួយដោយលាតត្រដាងការពិតនៅពីក្រោយការធ្វើទារុណកម្មលើព្រះសង្ឃមួយក្រុមនៅតំបន់ភាគខាងកើត។ ក្រុមសង្ឃ​ចំណូលថ្មីដែលទើបចូលមកស្នាក់អាស្រ័យក្នុងវត្ត ត្រូវ​សង្ឃ​ចាស់ៗដែលជារៀមច្បង ធ្វើ​បាប​លើ​រាង​កាយដោយបង្ខំ​ឲ្យ​ដេក​ផ្កាប់មុខ ហើយ​​វាយ​នឹង​ដំបង​ផ្តៅ​ដ៏ធំមួយយ៉ាង​ធ្ងន់ធ្ងរ ដោយសារ​តែមក​សូត្រ​ធម៌​យឺតពេល​​។

យ៉ាងណា តាមរយៈឃ្លិបដដែលនោះបានសរសេរខេបសិនយ៉ាងវែងអន្លាយថា ព្រះសង្ឃជំទង់ជាពិសេសកូននេនជាកូនក្មេង បើបង្រៀនគេយឺតៗគេនឹងយល់ ការប្រើអំពើហិង្សាមិនមែនជាវិធីត្រឹមត្រូវក្នុងការដោះស្រាយបញ្ហានោះទ។ ព្រះសង្ឃក្មេងៗក្រោកពីម៉ោង ៤ ទៀបភ្លឺ ត្រូវគេវាយជាប្រចាំ ព្រោះមានកំហុសតិចតួច ខ្លះសូត្រ​ធម៌​ពេល​ព្រឹកយឺត ​ខ្លះ​បោស​ហើយ​ភ្លេច​រើស​សំរាម​ជាដើម​ ដែលសុទ្ធតែជា​រឿងធម្មតា ដែលប្រាប់បានទាំងអស់។

ទោះជាយ៉ាងណា បន្ទាប់់ពី​ទទួល​បាន​របាយការណ៍ភ្លានៗ ស្នងការនគរបាលខេត្តឈុនបុរី លោក Aphinya Chomphumas អគ្គនាយកនៃនាយកដ្ឋានកិច្ចការកុមារ និងយុវជន – ប្រធានជម្រកកុមារ និងគ្រួសារខេត្តឈុនបុរី និងជាប្រធានការិយាល័យពុទ្ធសាសនាខេត្ត ដើម្បីសុំជំនួយក្នុងការស៊ើបអង្កេតការពិត និងចាត់វិធានការតាមផ្លូវច្បាប់ ហើយថា ការវាយធ្វើបាបបែបនេះមិនមែនជាមេរៀនទេ វាជាការបំពានលើរាងកាយក្មេងច្បាស់ណាស់។

មួយរយៈនេះថៃហាក់ក្រពុលមុខរឿង​ចៅអធិការ​វត្តនិងស្រីស្នេហ៍នៅមិនទាន់ដោះស្រាយចប់ទេ ហើយក៏កំពុងពន្លឿនការស៊ើបអង្កេតផងដែរ ស្របពេលដែលរឿងអាស្រូវប្រើហិង្សាលើព្រះសង្ឃចំណូលថ្មីបាននិងកំពុងតែកក្រើកសារជាថ្មីក្នុងស្ថាប័នពុទ្ធសាសនាក្នុងប្រទេស។ ជាពិសេសពាក់ព័ន្ធនឹងព្រះសង្ឃជាន់ខ្ពស់ បាននាំឥទ្ធិពល​​អវិជ្ជមានធ្វើឲ្យមានការរង្គោះរង្គើយ៉ាងខ្លាំង នូវទំនុកចិត្តរបស់សាធារណជន និងបណ្តាលឲ្យមានការប៉ះពាល់យ៉ាងធ្ងន់ធ្ងរដល់សង្គម វប្បធម៌ និងសាសនារបស់ប្រទេសថៃ៕

អត្ថបទ៖ សាង ស្រីល័ក្ខ

ចុចអាន៖ជនលួចវាយទាហាន​ខ្មែរហើយរត់ ជាប់គុក​តែ១៥ថ្ងៃ និង​ពិន័យ​​ប្រាក់តិចតួចប៉ុណ្ណោះ​