រុស្ស៊ី និងអ៊ុយក្រែន យល់ព្រមដោះដូរអ្នកទោសបន្ថែម ប៉ុន្តែគ្មានកិច្ចចរចាបទឈប់បាញ់នោះទេ

យោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៤ ខែកក្កដា​នេះ រុស្ស៊ី និងអ៊ុយក្រែនបានបើកកិច្ចចរចាសន្តិភាពរយៈពេលខ្លីនៅទីក្រុងអ៊ីស្តង់ប៊ុលប្រទេសតួកគីកាលពីថ្ងៃពុធ ដោយផ្តោតជាសំខាន់លើបញ្ហាមនុស្សធម៌។ ទោះបីភាគីទាំងពីរបានយល់ព្រមផ្លាស់ប្តូរអ្នកទោសសង្រ្គាមយ៉ាងហោចណាស់ ១,២០០នាក់ និងពិភាក្សាអំពីការវិលត្រឡប់នៃកុមារអ៊ុយក្រែនដែលត្រូវបានចាប់ពង្រត់នោះ តែមិនមានការរីកចម្រើនណាមួយលើការសម្រេចបានបទឈប់បាញ់នោះទេ។

អ៊ុយក្រែនបានស្នើឱ្យមានជំនួបរវាងប្រធានាធិបតី ហ្សេលេនស្គី និងប្រធានាធិបតីរុស្ស៊ីលោក ពូទីន មុនដំណាច់ខែសីហា ដោយសង្ឃឹមថានឹងជំរុញកិច្ចចរចាសន្តិភាពឆ្ពោះទៅមុខ។ ប៉ុន្តែ​រុស្ស៊ី​បាន​និយាយ​ថា ពួក​គេ​នឹង​យល់ព្រម​ចំពោះ​កិច្ច​ប្រជុំ​មួយ​ប្រសិន​បើ​កិច្ច​ព្រម​ព្រៀង​ចុង​ក្រោយ​បាន​ត្រៀម​ខ្លួន​ជា​ស្រេច​ដើម្បី​ចុះ​ហត្ថលេខា។ ជំនួសឱ្យបទឈប់បាញ់ពេញលេញ រុស្ស៊ីបានស្នើឱ្យមានការផ្អាករយៈពេលខ្លីក្នុងការប្រយុទ្ធដើម្បីសង្គ្រោះសាកសព ខណៈដែលអ៊ុយក្រែនបានអំពាវនាវឱ្យមានបទឈប់បាញ់វែងជាង និងពេញលេញជាងនេះ។

ការ​ចរចា​សន្តិភាព​នេះមាន​រយៈពេល​តែ​៤០​នាទី​ប៉ុណ្ណោះ ​ខ្លី​ជាង​កិច្ច​ប្រជុំ​មុនៗ​ទៅទៀត ដែល​បង្ហាញ​ពី​ការ​រីក​ចម្រើន​តិចតួចប៉ុណ្ណោះលើកិច្ចចរចារវាងប្រទេសទាំងពីរ។ យ៉ាងណារុស្ស៊ីបានយល់ព្រមប្រគល់សាកសពអ៊ុយក្រែនចំនួន ៣,០០០ មកឲ្យអ៊ុយក្រែនវិញ ។

គួរបញ្ជាក់ថា កិច្ចប្រជុំនេះបានធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានព្រមានថារុស្ស៊ី និងប្រទេសណាដែលជួយរុស្ស៊ីនឹងប្រឈមមុខនឹងការដាក់ទណ្ឌកម្មបន្ថែមទៀត លុះត្រាតែកិច្ចព្រមព្រៀងសន្តិភាពត្រូវបានធ្វើឡើងក្នុងរយៈពេល៥០ ថ្ងៃ។ ប៉ុន្តែ​ដោយ​រុស្ស៊ី​មិន​ព្រម​សម្រុះសម្រួល ក្តី​សង្ឃឹម​សម្រាប់​សន្តិភាព​នៅ​តែមាន​កម្រិត​ទាប៕

អត្ថបទ៖ ប៊ុន សុភាព