នាយក​រដ្ឋមន្ត្រី​ដាណឺម៉ាក ​ចាត់ទុក​​លោក ណេតាន់យ៉ាហ៊ូ ថា​ជា«បញ្ហា»ក្នុង​សង្គ្រាម​ហ្គាហ្សា

នាយករដ្ឋមន្ត្រីដាណឺម៉ាក លោកស្រី Mette Frederiksen បានចាត់ទុកមេដឹកនាំអ៊ីស្រាអែល បេនចាមីន ណេតាន់យ៉ាហ៊ូ ថាជា«បញ្ហា» ដោយសន្យាថានឹងជំរុញឲ្យមានសម្ពាធកាន់តែខ្លាំងរបស់សហភាពអឺរ៉ុបលើអ៊ីស្រាអែលជុំវិញសង្គ្រាម​នៅ​តំបន់​ហ្គាហ្សា ខណៈដែលប្រទេសដាណឺម៉ាកកាន់តំណែងជាប្រធានប្តូរវេនរបស់ប្លុកនេះ។

លោកស្រី Frederiksen បាន​និយាយថា រដ្ឋាភិបាលរបស់លោក ណេតាន់យ៉ាហ៊ូ កំពុងធ្វើសកម្មភាពប្រឆាំងនឹង​ការ​ចង់​បាន​របស់​ជនជាតិ​អ៊ីស្រាអែល។ លោកស្រីបានសង្កត់ធ្ងន់ថា ការដឹកនាំរបស់ ណេតាន់យ៉ាហ៊ូ គឺជាបញ្ហាសម្រាប់អ្នកបោះឆ្នោតអ៊ីស្រាអែល។ លោកស្រី​បានថ្កោលទោសវិបត្តិមនុស្សធម៌«ដ៏គួរ​ឲ្យ​រន្ធត់ និងមហន្តរាយ» នៅក្នុងតំបន់ហ្គាហ្សា ក៏ដូចជាការពង្រីកការឈរ​ជើង​របស់អ៊ីស្រាអែល និងការតាំងលំនៅដោយអំពើហិង្សានៅតំបន់ West Bank។

ទោះ​កន្លងមក​​ដាណឺម៉ាកគាំទ្រអ៊ីស្រាអែលជាយូរមកហើយ លោកស្រី Frederiksen លើក​នេះ​បានប្រាប់​ថា EU គួរតែពិចារណាលើការដាក់ទណ្ឌកម្ម ដោយ​កំណត់គោលដៅលើ​មន្ត្រី​អ៊ីស្រាអែល ឬសូម្បីតែការរឹតបន្តឹងពាណិជ្ជកម្ម ដើម្បីបង្កើនសម្ពាធ។ ទោះជាយ៉ាងណាក៏ដោយ លោកស្រីបានទទួលស្គាល់ថា ខ្វះការគាំទ្រពេញលេញរបស់សហភាពអឺរ៉ុបសម្រាប់វិធានការបែបនេះ។

យ៉ាង​ណាមិញ មេដឹកនាំដាណឺម៉ាកក៏បានច្រានចោលការទទួលស្គាល់រដ្ឋប៉ាឡេស្ទីន ដោយបញ្ជាក់ថា ដាណឺម៉ាកនឹងមិនផ្តល់រង្វាន់ដល់ក្រុម​ហាម៉ាស​សម្រាប់ការវាយប្រហារថ្ងៃទី៧​ខែតុលា​ឆ្នាំ​២០២៣​នោះទេ។

សូម​ជម្រាប​ថា ក្រសួងសុខាភិបាលដែលគ្រប់គ្រងដោយក្រុមហាម៉ាសនៅហ្គាហ្សា បានអះអាងថា មក​ទល់​នឹង​ពេល​នេះ មានអ្នកស្លាប់ជាង ៦១ ០០០​នាក់ គិត​ចាប់​តាំង​ពី​ការ​វាយ​សងសឹក​របស់​យោធា​អ៊ីស្រាអែល៕

ដោយ៖ ឈាង