លោក ត្រាំ ចង់​ឲ្យ​ពលរដ្ឋ​ហ្គាហ្សា​ម្នាក់​៥ ០០០​ដុល្លារ​ចាកចេញ ដើម្បី​ឲ្យ​អាមេរិក​គ្រប់គ្រង​វិញ

ប្រធានាធិបតីអាមេរិក លោក ដូណាល់ ត្រាំ បានដាក់​ចេញ​សំណើដ៏ចម្រូងចម្រាសមួយ ក្នុងការបង់ប្រាក់​ឲ្យ​ជនជាតិប៉ាឡេស្ទីន​នៅតំបន់ហ្គាហ្សាចំនួន ៥ ០០០ដុល្លារ​ក្នុងម្នាក់ៗ ចាកចេញពីទឹកដីខ្លួន ដើម្បី​ដាក់តំបន់​នេះ​ស្ថិត​ក្រោមការគ្រប់គ្រងរបស់អាមេរិករយៈពេល​មួយទសវត្សរ៍​វិញ។ នេះបើយោងតាមឯកសារគោលនយោបាយ​​៣៨ទំព័រ ដែលទទួលបានដោយកាសែត Washington Post។

ផែនការនេះ ដែលបច្ចុប្បន្នកំពុងស្ថិតក្រោមការត្រួតពិនិត្យនៅសេតវិមាន បង្ហាញពីការផ្លាស់ទីលំនៅ«ដោយស្ម័គ្រចិត្ត»នៃអ្នកស្រុកចំនួន​២​លាននាក់នៅហ្គាហ្សា ជា​ថ្នូរ​នឹង​​ប្រាក់​ឧបត្ថម្ភ​ ហើយ​ពួក​គេ​​ត្រូវ​បាន​​ប្រគល់​សិទ្ធិ​ដីធ្លី​ឲ្យ​អាមេរិក​គ្រប់គ្រង។

ក្រុម​សិទ្ធិ​មនុស្ស​ បាន​ថ្កោល​ទោស​យ៉ាង​ឆាប់​រហ័ស​ចំពោះ​សំណើ​នេះ។ សកម្មជនជនជាតិអង់គ្លេសលោក Peter Tatchell បានប្រាប់ GB News ថា ការផ្តល់ជូននេះ ប្រៀប​ដូចជា​ការ​ប្រមាថ ដោយលើកហេតុផលថា​ ៥ ០០០​ដុល្លារ​មិន​អាច​ចំណាយ​គ្រប់​​គ្រាន់​​លើ​ការរស់នៅរយៈពេល២​ឆ្នាំ​ផង​ កុំ​គិត​ឡើយ​ថា​ដល់​ ១០​ឆ្នាំ​ឯណោះ។

Washington Post បាន​ចុះផ្សាយ​ថា គំនិតផ្តួចផ្តើម​នេះ មានចំណងជើងថា «Gaza Reconstitution, Economic Acceleration and Transformation Trust» មាន​គោល​បំណង​​​​ប្រែ​ក្លាយ​តំបន់ដែលហែកហួរ​ដោយសង្រ្គាមទៅជាមជ្ឈមណ្ឌលសម្រាប់ទេសចរណ៍ និងបច្ចេកវិទ្យា។ ផែនការរួមមានទីក្រុងឆ្លាតវៃ«ដើរដោយថាមពល AI» ចំំនួន​ពី៦ទៅ​៨​​ទីក្រុង គម្រោងហេដ្ឋារចនាសម្ព័ន្ធសំខាន់ៗ និងផ្លូវហាយវ៉េដែលដាក់ឈ្មោះតាមមេដឹកនាំក្នុងតំបន់ ដូចជាព្រះអង្គម្ចាស់អារ៉ាប៊ីសាអូឌីត Mohammed bin Salman និងប្រធានាធិបតីអារ៉ាប់រួម Mohammed bin Zayed al-Nahyan៕

ដោយ៖ ឈាង