កូរ៉េខាងត្បូង អនុញ្ញាតឲ្យទេសចរចិនជាក្រុមចូលដោយគ្មានទិដ្ឋាការរហូតដល់ឆ្នាំ២០២៦

យោងតាមការចេញផ្សាយរបស់ទីភ្នាក់ងារព័ត៌មាន CGTN នៅថ្ងៃទី២៩ខែកញ្ញា កូរ៉េខាងត្បូងបានចាប់ផ្តើមកម្មវិធីសាកល្បងចូលដោយគ្មានទិដ្ឋាការសម្រាប់អ្នកទេសចរចិនជាក្រុម ដែលមានប្រសិទ្ធភាពចាប់ពីថ្ងៃទី ២៩ ខែកញ្ញា រហូតដល់ថ្ងៃទី ៣០ ខែមិថុនា ឆ្នាំ ២០២៦។

ក្រោមគម្រោងនេះ ក្រុមអ្នកធ្វើដំណើរចិនចាប់ពី ៣ នាក់ឡើងទៅអាចទៅលេងកូរ៉េខាងត្បូងដោយគ្មានទិដ្ឋាការរហូតដល់ ១៥ថ្ងៃ។ ចំណែកខេត្ត Jeju បន្តអនុញ្ញាតឱ្យភ្ញៀវទេសចរចិនទាំងបុគ្គល និងជាក្រុម អាចស្នាក់នៅដោយគ្មានទិដ្ឋាការរហូតដល់ ៣០ ថ្ងៃឯណោះ។

គួរបញ្ជាក់ថាភ្ញៀវទេសចរចិនគឺជាផ្នែកមួយដ៏សំខាន់នៃឧស្សាហកម្មទេសចរណ៍របស់ប្រទេសកូរ៉េខាងត្បូង ជាមួយនឹងភ្ញៀវទេសចរចំនួន ៤.៦ លាននាក់ក្នុងឆ្នាំ ២០២៤ ដែលស្មើនឹង ២៨.១% នៃការមកដល់អន្តរជាតិទាំងអស់។ រដ្ឋាភិបាលកូរ៉េខាងត្បូងប៉ាន់ប្រមាណថា ភ្ញៀវទេសចរចិនមួយលាននាក់បន្ថែមទៀតអាចជំរុញ GDP របស់ប្រទេសនេះ ០.០៨ ភាគរយ។ មន្ត្រីកូរ៉េខាងត្បូងសង្ឃឹមថា គោលនយោបាយនេះមិនត្រឹមតែពង្រឹងវិស័យទេសចរណ៍ប៉ុណ្ណោះទេ ប៉ុន្តែថែមទាំងជួយដល់កំណើនសេដ្ឋកិច្ចផងដែរ៕

អត្ថបទ៖ ប៊ុន សុភាព