សុខភាព

គ្រូពេទ្យ ៖ ព្យាបាលទាស់ពេលកូនខ្ចី អ្នកម្ដាយដាច់ខាត កុំប្រើថ្នាំខ្មែរផ្សំពីសត្វព្រៃ

បានផុស

៤ years មុន

នៅ

ថ្ងៃចន្ទ ៦ កញ្ញា ២០២១

ដោយ

ពេលស្ត្រីកូនខ្ចី គ្រាន់តែមិនស្រួលខ្លួនបន្តិច ចាស់ៗគិតថា ម៉ាក់ៗទាស់សរសៃខ្ចី ហើយខំប្រឹងទៅរកថ្នាំខ្មែរ ថ្នាំបុរាណមកដាំផឹក ដើម្បីកុំឲ្យទាស់ខ្លាំង ខ្លាចប៉ះពាល់ដល់សុខភាពម៉ាក់ៗទើបសម្រាល។ តាមពិតទៅ បើតាមអ្នកជំនាញវេជ្ជសាស្ត្រ គ្មានទេការទាស់ក្រោយសម្រាលកូននោះ ហើយការប្រើថ្នាំបុរាណមកព្យាបាលជារឿងគិតខុសបំផុតដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ច័ន្ទ រស្មី ឯកទេសផ្នែកសម្ភព និងរោគស្ត្រី បានឲ្យពន្យល់ឲ្យដឹងថា ដោយសារតែជំនឿអំពីឱសថផ្សំដោយសត្វព្រៃ ពលរដ្ឋខ្មែរយល់ខុសសម្លាប់សត្វទាំងនោះ យកមកធ្វើថ្នាំព្យាបាលរោគច្រើនប្រភេទ រួមមានថ្នាំការពារមិនឲ្យទាស់ចំពោះស្ត្រីកូនខ្ចី។ ជួនកាល សូម្បីតែអំឡុងពេលពពោះ ម៉ាក់ៗខ្លះផឹកថ្នាំខ្មែរ ដើម្បីកើតកូនមកស្រួល តែវាផ្ដល់ផលប៉ះពាល់ច្រើនវិញដល់សុខភាពម្ដាយ និងគភ៌។

នេះជាជំនឿតៗគ្នាយូរមកហើយ តាមពិតទៅវាមិនមានវិទ្យាសាស្ត្រវេជ្ជសាស្ត្របញ្ជាក់ថា សត្វព្រៃ ឬឫសឈើធ្វើថ្នាំការពារជំងឺអ្វីទេ។ លោកលើកឧទាហរណ៍ថា ពលរដ្ឋខ្លះយកសត្វពង្រូល ពោះប្រម៉ា ឆ្អឹងសត្វទេស សត្វរញីជាដើម យកទៅធ្វើថ្នាំ ប៉ុន្តែ វាគ្រាន់តែជាជំនឿតៗគ្នារបស់មនុស្សតែប៉ុណ្ណោះ មិនមែនជាថ្នាំស្អីនោះទេ។

ផ្ទុយទៅវិញ សត្វព្រៃតែងមានជំងឺជាប់ខ្លួន ហើយវាអាចជាហានិភ័យសម្រាប់សុខភាពមនុស្ស ព្រោះសត្វព្រៃមិនបានចាក់ថ្នាំបង្ការដូចសត្វនៅក្នុងស្រុកទេ បើយើងញ៉ាំទៅវា នឹងបង្កឲ្យប៉ះពាល់ដល់សុខភាពយើងវិញ និងបង្កឲ្យបាត់បង់សត្វព្រៃថែមទៀត។

វេជ្ជបណ្ឌិតដដែលបានឲ្យដឹងថា ស្ត្រីស្គមរីងរៃ គ្មានទឹកដោះឲ្យកូនបៅ ឬជួបបញ្ហាសុខភាពផ្សេងក្រោយសម្រាលកូន ភាគច្រើនបណ្ដាលមកពីកង្វះអាហារូបត្ថម្ភ និងគ្មានអនាម័យពេលសម្រាលជាដើម មិនមែនមកពីទាស់អីហ្នឹងទេ។ ក្នុងករណីស្ត្រីមិនស្រួលខ្លួន មុនសម្រាលក្ដី ឬក្រោយសម្រាលក្ដី ជម្រើសល្អបំផុតចំពោះសុខភាពនោះ គឺការទៅពិនិត្យជាមួយគ្រូពេទ្យជំនាញ មានឧបករណ៍ពិនិត្យសុខភាពច្បាស់លាស់៕

អត្ថបទផ្ដល់ដោយ៖ Hello Krupet

ចុចអាន៖ឃើញអាហារចង់តែហូបច្រើន មិនរើសពេល តើគួរដោះស្រាយបែបណា?

ចុចអាន៖៥ យ៉ាងអាចមិនដឹង ហើយប្រើថ្នាំប៉ារ៉ាសេតាម៉ុលខុស ដែលបណ្ដាលឲ្យគ្រោះថ្នាក់ដល់ជីវិត