ការសិក្សាថ្មី៖ អ្នកចាក់វ៉ាក់សាំងពេញលេញ មិនសូវមានរោគសញ្ញាកូវីដរយៈពេលវែងទេ

ទីភ្នាក់ងារសន្តិសុខសុខភាពរបស់ចក្រភពអង់គ្លេសហៅកាត់ UKHSA បានរកឃើញថា អ្នកដែលចាក់វ៉ាក់សាំងពេញលេញ ប្រឆាំងនឹងជំងឺកូវីដ១៩ ទំនងជាមិនសូវមានចេញរោគសញ្ញាកូវីដរយៈពេលវែងទេ។

ទីភ្នាក់ងារនេះ បានពិនិត្យទៅលើការសិក្សាជាតិ និងអន្តរជាតិចំនួន១៥ដែលត្រូវបានធ្វើឡើងគិតត្រឹមខែមករាឆ្នាំ២០២២។

UKHSA បានរកឃើញថា ប្រហែល២% នៃចំនួនប្រជាជនចក្រភពអង់គ្លេស បានរាយការណ៍ពីការចេញរោគសញ្ញាកូវីដរយៈពេលវែង ដែលអាចអូសបន្លាយជាង៤សប្តាហ៍ បន្ទាប់ពីការឆ្លងដំបូង។

រោគសញ្ញាទូទៅចំនួនបីគឺ អស់កម្លាំង ដកដង្ហើមខ្លី និងឈឺសាច់ដុំ ឬសន្លាក់។

ការសិក្សាចំនួនប្រាំបីនៅក្នុងនេះ បានពិនិត្យមើលប្រសិទ្ធភាពរបស់វ៉ាក់សាំងមុនពេលឆ្លងមេរោគ។ ការសិក្សាទាំងនេះ ភាគច្រើនណែនាំថា មនុស្សដែលបានចាក់វ៉ាក់សាំង (មួយ ឬពីរដូស) ទំនងជាមិនសូវមានរោគសញ្ញានៃជំងឺកូវីដយូរ ក្រោយឆ្លងទេ បើធៀបនឹងមនុស្សដែលមិនបានចាក់។

លោកស្រីវេជ្ជបណ្ឌិត Mary Ramsay ប្រធានផ្នែកវ៉ាក់សាំងនៅ UKHSA បាននិយាយថា “ការសិក្សាទាំងនេះ បន្ថែមលើអត្ថប្រយោជន៍នៃការចាក់ថ្នាំបង្ការកូវីដពេញលេញ។ ការចាក់វ៉ាក់សាំងគឺជាមធ្យោបាយដ៏ល្អបំផុត ដើម្បីការពារខ្លួនអ្នកពីរោគសញ្ញាធ្ងន់ធ្ងរនៅពេលអ្នកឆ្លងមេរោគ ហើយក៏អាចជួយកាត់បន្ថយផលប៉ះពាល់រយៈពេលវែងផងដែរ”។

សម្រាប់មនុស្សភាគច្រើន រោគសញ្ញានៃជំងឺកូវីដ១៩ មានរយៈពេលខ្លី ហើយអាចដោះស្រាយបានតាមពេលវេលា។ ប៉ុន្តែសម្រាប់អ្នកខ្លះ រោគសញ្ញាអាចកាន់តែធ្ងន់ធ្ងរ និងរំខានដល់ជីវិតប្រចាំថ្ងៃរបស់ពួកគេ៕

ប្រែសម្រួល៖ Vann Vann

ប្រភព៖ SKY

ចុចអាន៖ កូវីដ នឹងបន្តរីករាលដាលជាច្រើនឆ្នាំខាងមុខទៀត