តើអ្នកបានដឹងអ្វីខ្លះហើយ ពីជំងឺអុតស្វា ដែល WHO ប្រកាសជា ភាពអាសន្នសុខភាពសកល?

កាលពីថ្ងៃសៅរ៍ទី២៣ខែកក្កដា អង្គការសុខភាពពិភពលោក (WHO) បានប្រកាសថា ការផ្ទុះឡើងនៃជំងឺអុតស្វា ជាភាពអាសន្នសុខភាពសកល បន្ទាប់ពីការរីករាលដាលមិនធម្មតា ដល់ជាង៧០ប្រទេស។

អគ្គនាយក WHO លោក Tedros Adhanom Ghebreyesus បានសម្រេចចិត្តក្នុងការចេញសេចក្តីប្រកាសនេះ ថ្វីបើមិនមានការឯកភាពគ្រប់គ្រាន់ ក្នុងចំណោមអ្នកជំនាញដែលបម្រើការក្នុងគណៈកម្មាធិការគ្រាអាសន្នរបស់ទីភ្នាក់ងារសុខភាពអង្គការសហប្រជាជាតិមួយនេះ ក៏ដោយ។

ហើយនា​ព្រលប់​ថ្ងៃទី២៣ ខែកក្កដា ដដែលនោះ សមត្ថកិច្ច​រាជធានីភ្នំពេញ ​បាន​រក​ឃើញ​ជនជាតិ​នីហ្សេរីយ៉ា​ម្នាក់​ ដែល​​កើត​ជំងឺ​អុត​ស្វា​ រត់គេចពី​ប្រទេស​ថៃ ​ចូលមក​កាន់​ប្រទេស​កម្ពុជា។

តើអ្នកបានដឹងអ្វីខ្លះហើយពីជំងឺអុតស្វា?

មេរោគនេះ គឺស្រដៀងនឹងជំងឺអុតធំដែរ ហើយត្រូវបានគេរកឃើញលើមនុស្សជាលើកដំបូង ក្នុងឆ្នាំ១៩៧០។ ជំងឺអុតស្វា មិនសូវមានគ្រោះថ្នាក់ ដូចជំងឺអុតធំ ដែលត្រូវបានលុបបំបាត់នៅឆ្នាំ១៩៨០ទេ។

៩៥%នៃករណី គឺឆ្លងតាមរយៈសកម្មភាពផ្លូវភេទ។ នេះបើយោងតាមការសិក្សាលើមនុស្សចំនួន៥២៨ នាក់ក្នុង ១៦ប្រទេស ដែលត្រូវបានបោះពុម្ពផ្សាយនៅក្នុងទស្សនាវដ្តី New England Journal of Medicine។

សរុបមក ៩៨%នៃអ្នកឆ្លង គឺជាបុរសស្រឡាញ់ភេទដូចគ្នា ឬបុរសរួមភេទជាមួយបុរសដូចគ្នា ហើយប្រហែលមួយភាគបី ត្រូវបានគេដឹងថា បានទៅកន្លែងមានការរួមភេទ ដូចជាពិធីជប់លៀងផ្លូវភេទ ឬសូណា។

រោគសញ្ញាដំបូងនៃជំងឺអុតស្វាគឺគ្រុនក្តៅ ឈឺក្បាល ឈឺសាច់ដុំ និងឈឺខ្នងក្នុងអំឡុងពេលប្រាំថ្ងៃដំបូង។

កន្ទួល លេចឡើងជាបន្តបន្ទាប់នៅលើមុខ បាតដៃ និងបាតជើង បន្ទាប់មកមានដំបៅ ស្នាមអុជ និងចុងក្រោយឡើងក្រមរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ថៃ បញ្ជាក់ គ្មានគម្រោង នាំយកបុរសនីហ្សេរីយ៉ា កើតអុតស្វា ទៅប្រទេសវិញទេ