WHO ព្រមានពីផលប៉ះពាល់យូរអង្វែងនៃកូវីដ-១៩ ចំពោះសុខភាពផ្លូវចិត្ត

សុខភាពផ្លូវចិត្ត ជាផ្នែកសំខាន់មួយនៃការរស់នៅ ដែលមិនអាចធ្វេសប្រហែសបាននោះទេ។ ផ្លូវចិត្តចុះខ្សោយ រាងកាយក៏អន់ថយ ប្រព័ន្ធភាពស៊ាំនឹងមិនរឹងមាំ ក៏ដូចជាបង្កការរំខានដល់សកម្មភាពប្រចាំផ្ងៃផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសប្ដាហ៍នេះ អង្គការសុខភាពពិភពលោកបានព្រមានអំពីផលអវិជ្ជមានមួយចំនួនចំពោះសុខភាពផ្លូវចិត្តបណ្ដាលមកពីជំងឺរាតត្បាតដែលវានឹងមានរយៈពេលវែង ប្រសិនពុំមានវិធានការទប់ស្កាត់នោះទេ។

ការថប់បារម្ភជុំវិញការរីករាលដាលនៃវីរុសកូវីដ-១៩ បង្កផលប៉ះពាល់ដល់ផ្លូវចិត្តយ៉ាងធ្ងន់ធ្ងរ។ ការបិទខ្ទប់ បូកជាមួយការរក្សាគម្លាតសង្គមផង បានរួមចំណែកដល់វិបត្ដិសុខភាពផ្លូវចិត្តដែលរួមមាន បង្កភាពតានតឹងផ្លូវអារម្មណ៍ កង្វល់អត់ការងារធ្វើ ការព្រួយបារម្ភផ្នែកហិរញ្ញវត្ថុ និងការដាច់ទំនាក់ទំនងសង្គម។ នេះបើតាមសេចក្តីថ្លែងការណ៍មួយរបស់អង្គការសុខភាពពិភពលោក ដែលធ្វើឡើងនៅទីក្រុង Athens ប្រទេសក្រិក។

ថ្លែងនៅក្នុងសន្និសីទ នាយក WHO ប្រចាំទ្វីបអឺរ៉ុបលោក Hans Kluge មានប្រសាសន៍ថា មនុស្សជាង ៤ លាននាក់នៅទូទាំងពិភពលោកត្រូវជួបបញ្ហាជីវភាពរស់នៅធ្លាក់ដុនដាប បែកបាក់ទំនាក់ទំនងគ្រួសារនិងសហគមន៍ អាជីវកម្មបានដួលរលំ និងប្រជាជនរាប់លាននាក់ទៀតបានបាត់បង់ឱកាសការងារ។

ដើម្បីឆ្លើយតបទៅនឹងវិបត្តិផ្លូវចិត្តខាងលើ អង្គការសុខភាពពិភពលោកបានអំពាវនាវឱ្យមានការពង្រឹងសេវាសុខភាពផ្លូវចិត្ត និងនិងធ្វើយ៉ាងណាត្រូវកែលម្អលទ្ធភាពទទួលបានការថែទាំ ព្រមទាំងប្រឹក្សាយោបល់តាមរយៈប្រព័ន្ធបច្ចេកវិទ្យា ជាជាងអង្គុយសម្ងំតែក្នុងផ្ទះសុទ្ធសាធ។ នេះដោយសារតែទំនាក់ទំនងតាមអនឡាញនឹងជួយជំរុញឱ្យមានសេវាកម្មគាំទ្រផ្លូវចិត្តល្អប្រសើរនៅតាមសាលារៀន សាកលវិទ្យាល័យ កន្លែងធ្វើការ និងសម្រាប់គ្រូពេទ្យនៅជួរមុខផងដែរ៕

ប្រែសម្រួល៖ ​សន្យា

ប្រភព៖ CNA

ចុចអាន៖ សកម្មភាពប្រចាំថ្ងៃសាមញ្ញៗ ៤ យ៉ាង ការពារផ្លូវចិត្តឱ្យមានសុខភាពល្អ

ចុចអាន៖ WHO លើកចំណុចសំខាន់២ ដែលអាចបញ្ចប់ការរីករាលដាល នៃជំងឺរាតត្បាត