​ធនាគារ​ជាតិ ​ដាស់តឿន​ឱ្យសាធារណៈជន​បង្កើន​ការ​ប្រុងប្រយ័ត្ន​ ចំពោះ​ការ​ចុច​តំណភ្ជាប់​គេហទំព័រ​

ធនាគារជាតិ ​នៃ​កម្ពុជានៅថ្ងៃទី ១៤ ​ខែវិច្ឆិកា ​ឆ្នាំ ២០២៥​ ​បានប្រកាសថា ​នាពេលកន្លងមក ជន​ល្មើស​មួយចំនួនបានប្រើប្រាស់ឈ្មោះ និមិត្តសញ្ញា និងរូបភាពថ្នាក់ដឹកនាំធនាគារជាតិនៃកម្ពុជា ​ដើម្បី​បង្កើតព័ត៌មានក្លែងក្លាយ និង​ផ្ស​ព្វ​ផ្សាយ​តាម​បណ្តាញសង្គម ក្នុងបំណងទុច្ចរិត និងបោកប្រាស់​ទ្រព្យសម្បត្តិរបស់ប្រជាជន។​

ទន្ទឹមនេះ មានជនល្មើសមួយចំនួនបានប្រើល្បិចបោកបញ្ឆោតក្រោមទម្រង់ផ្សេងៗដូចជា ការក្លែង​បន្លំខ្លួនជាសាច់ញាតិ ដើម្បីស្នើសុំខ្ចីប្រាក់ ឬឱ្យផ្ទេរប្រាក់ ការក្លែងជាបុគ្គលិក​គ្រឹះស្ថានធនា​គារ និង​ហិរញ្ញវត្ថុ ឬក្រុមហ៊ុនឯកជន ដើម្បីផ្តល់ព័ត៌មាន ក្លែងក្លាយអំពីរង្វាន់ ឬឱកាសការងារ ហើយ​តម្រូវ​ឱ្យផ្ញើប្រាក់ជាមុន និងការបញ្ចុះបញ្ចូលទិញគណនី ធនាគារ ឬលេខទូរសព្ទផ្ទាល់ខ្លួន​ដោយផ្តល់​កម្រៃ​ខ្ពស់ ជាដើម។

ធនាគារជាតិ ​បញ្ជាក់ថា៖ «ដើម្បីចៀសវាងការចាញ់បោក ឬធ្លាក់ទៅក្នុងកលល្បិចរបស់ជនទុច្ចរិត ដែលអាចនាំឱ្យខាត​បង់ ទ្រព្យ​សម្បត្តិផ្ទាល់ខ្លួន និងជាប់ពាក់ព័ន្ធទៅនឹងទង្វើខុសច្បាប់ជាយថាហេតុ ធនាគារជាតិនៃកម្ពុជា សូម​ក្រើនរំឭកដល់សាធារណជនឱ្យបង្កើនការប្រុងប្រយ័ត្នខ្ពស់ ចំពោះការចុចលើតំណភ្ជាប់គេហ​ទំព័រ ឬផ្លែតហ្វមវិនិយោគដែលមិនមានប្រភពច្បាស់លាស់ និងសូមកុំផ្ទេរប្រាក់ ផ្តល់ព័ត៌មាន​ផ្ទាល់​ខ្លួន​ ឬលក់គណនីធនាគារ និងលេខទូរសព្ទឱ្យបុគ្គលដទៃ។​ ​ក្នុង​ករណីមានការបោកបញ្ឆោតខាងលើ ​សូមរាយការណ៍ភ្លាមៗទៅកាន់អាជ្ញាធរពាក់ព័ន្ធ»៕