លោកអភិបាល​ខណ្ឌច្បារអំពៅ​ នាំយករថយន្តដឹកទឹកលាងសំអាតផ្លូវជុំវិញតំបន់បឹងព្រលឹង

ភ្នំពេញ ៖ លោកម៉ូវ ម៉ានិត អភិបាល​ខណ្ឌច្បារអំពៅ​បាន​ដឹក​នាំ​កម្លាំង​ចុះ​លាង​សំអាត​ភក់ល្បាប់​ជុំវិញតំបន់បឹងព្រលឹតក្នុងភូមិអូរអណ្តូង១សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ សកម្មភាពលាងសំអាតភក់ល្បាប់លើដងផ្លូវនេះបានធ្វើឡើងនៅថ្ងៃទី២១ខែវិច្ឆិកានេះ។

យោងតាមប្រសាសន៍លោក ម៉ូវ ម៉ានិត បាន​ឱ្យ​ដឹងថា មូលហេតុ​ដែល​លោក​នាំ​យក​រថយន្ត​ដឹក​ទឹក​និងកម្មករព្រមទាំងកម្លាំងចម្រុះរបស់សាលាខណ្ឌច្បារអំពៅដើម្បីលាងសំអាតតាមដងផ្លូវមុខផ្ទះបងប្អូនពលរដ្ឋបន្ទាប់ពីភ្លៀងធ្លាក់បង្កឲ្យលិចលង់កាលពីយប់ថ្ងៃទី១៨ខែវិច្ឆិកាកន្លងមកដែលទឹកលូហូចេញមានភក់ល្បាប់ពេញលើផ្លូវមកនោះ។

លោកអភិបាលខណ្ឌបានបន្តថាបន្ទាប់ពីភ្លៀងធ្លាក់ខ្លាំងរហូតលិចលង់លំនៅហើយលោកបានដាក់ម៉ាសុីនបូមទឹកចំនួន២គ្រឿងព្រមទាំងដាក់គ្រឿងចក្រជីកប្រឡាយបង្ហូទឹកចូលទៅព្រែកប្រាទើបទឹកបានរីងរួចចាប់ផ្តើមលាងសំអាតភក់ចេញដើម្បីកុំឱ្យពិបាកដល់ពលរដ្ឋផងនោះ។

ចំណែក​បង​ប្អូន​ពលរដ្ឋ​ លោកសំដែងការដឹងគុណដល់លោកម៉ូវ ម៉ានិត អភិបាលខណ្ឌច្បារអំពៅ ដែល​លោក​តែង​ចុះជួយពលរដ្ឋពេលជួបទុក្ខលំបាកដោយជំនន់ទឹកភ្លៀង៕

ដោយ ៖ នរា