ព័ត៌មានជាតិ

អភិបាលក្រុងសិរីសោភ័ណ ដឹកនាំក្រុមការងារ ចុះរៀបចំសណ្ដាប់ធ្នាប់ជុំវិញក្រុងសិរីសោភ័ណ ឲ្យមានរបៀបរៀបរយ

បានផុស

៨ ខែ មុន

នៅ

ថ្ងៃសុក្រ ៥ ធ្នូ ២០២៥

ដោយ

កាលពីល្ងាចថ្ងៃទី ៤ ខែធ្នូ ឆ្នាំ ២០២៥ ម្សិលមិញ ក្រុមការងារសាលាក្រុងសិរីសោភ័ណ ក្រុមការងារសង្កាត់ព្រះពន្លា និង មេភូមិ ៣ ដែលដឹកនាំដោយ លោក ស្រេង សុផល អភិបាលក្រុងសិរីសោភ័ណ បានចុះរៀបចំសណ្ដាប់ធ្នាប់ ព្រមទាំងណែនាំប្រជាពលរដ្ឋ ក៏ដូចជាអ្នកលក់ដូរមួយចំនួន សូមចូលរួមសហការជាមួយអាជ្ញាធរក្នុងការថែរក្សាដងផ្លូវសាធារណៈជុំវិញក្រុងសិរីសោភ័ណឲ្យមានរបៀបរៀបរយ សោភ័ណភាពល្អប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្រេង សុផល បានឲ្យដឹងថា ក្រុមការងាររដ្ឋបាលក្រុងសិរីសោភ័ណ កម្លាំងសណ្ដាប់ធ្នាប់សង្កាត់ មេភូមិ ៣ បានចុះរៀបចំសណ្ដាប់ធ្នាប់នៅតាមបណ្ដោយផ្លូវរង្វង់មូលស្រីគ្រប់លក្ខណ៍ រហូត ជុំវិញក្រុងនេះ ដើម្បីធ្វើការណែនាំប្រជាពលរដ្ឋ ក៏ដូចជាអ្នកលក់ដូរមួយចំនួន សូមចូលរួមសហការជាមួយអាជ្ញាធរក្នុងការថែរក្សាដងផ្លូវសាធារណៈឲ្យមានសណ្ដាប់ធ្នាប់ របៀបរៀបរយ ជាពិសេសសោភ័ណភាពល្អប្រសើរនៅក្នុងក្រុងសិរីសោភ័ណ។

លោកបានបន្តថា សកម្មភាពខាងលើនេះ បានបន្តចុះធ្វើដូចភ្លៀងរលឹម នៅក្នុងមូលដ្ឋាន ដោយធ្វើយ៉ាងណាចង់ឲ្យប្រជាពលរដ្ឋយល់ដឹងកាន់តែច្បាស់អំពីសណ្ដាប់ធ្នាប់ របៀបរៀបរយតាមដងផ្លូវសាធារណៈ ពិសេសអាជីវករយកចិញ្ចើមផ្លូវដាក់អីវ៉ាន់លក់ដូរយ៉ាងអនាធិបតេយ្យ ព្រមទាំងស្លាកយីហោមួយចំនួនដែលដាំជាប់នៅចិញ្ចើមផ្លូវប៉ះពាល់ចំណីផ្លូវសាធារណៈ និងគ្មានច្បាប់អនុញ្ញាត។

ទន្ទឹមនោះ ក្រុមការងារ ក៏បានណែនាំដល់ម្ចាស់អាជីវកម្ម ឲ្យអនុវត្តទុកចិញ្ចើមផ្លូវ ៣ ម៉ែត្រ សម្រាប់ឲ្យអ្នកដំណើរដើរទៅមកបានស្រួលផងដែរ។

លោកអភិបាលក្រុងសិរីសោភ័ណ ក៏បានសំណូមពរប្រជាពលរដ្ឋទាំងអស់ សូមចូលរួមសហការជាមួយអាជ្ញាធរក្នុងការថែរក្សារបៀបរៀបរយសណ្ដាប់ធ្នាប់តាមដងផ្លូវសាធារណៈឲ្យបានល្អប្រសើរ ដើម្បីទុកជាផលប្រយោជន៍រួមទាំងអស់គ្នា៕

អត្ថបទ ៖ វ៉ាន់ ណាង