ព័ត៌មានជាតិ

រដ្ឋបាលខណ្ឌដង្កោ ចុះរៀបចំសណ្ដាប់ធ្នាប់កាត់សំយាបដែលពលរដ្ឋសង់រំលោភផ្លូវសាធារណៈ

បានផុស

៨ ខែ មុន

នៅ

ថ្ងៃអង្គារ ២ ធ្នូ ២០២៥

ដោយ

កាលពីព្រឹកថ្ងៃទី ២ ខែធ្នូ ឆ្នាំ ២០២៥ នេះ រដ្ឋបាលខណ្ឌដង្កោ បានចុះរៀបចំសណ្ដាប់ធ្នាប់ និងកាត់សំយាប ដែលប្រជាពលរដ្ឋសង់រំលោភលើផ្លូវសាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយមានការយកចិត្តទុកដាក់ពីលោកស្រី គឹម ញឹប អភិបាល នៃគណៈអភិបាលខណ្ឌដង្កោ ក្រុមការងាររដ្ឋបាលខណ្ឌដង្កោ កម្លាំងសណ្ដាប់ធ្នាប់សាលាខណ្ឌ-សង្កាត់ បានចុះរៀបចំសណ្ដាប់ធ្នាប់ក្នុងមូលដ្ឋានសង្កាត់ដង្កោ ខណ្ឌដង្កោ នៅតាមបណ្ដោយផ្លូវលេខ ២១៧ និងធ្វើការណែនាំប្រជាពលរដ្ឋ ក៏ដូចជាអ្នកលក់ដូរមួយចំនួន សូមចូលរួមសហការជាមួយអាជ្ញាធរក្នុងការថែរក្សាដងផ្លូវសាធារណៈឲ្យមានសណ្ដាប់ធ្នាប់ របៀបរៀបរយ និងកាត់សំយាបផ្ទះដែលសង់រំលោភមកលើផ្លូវ។

អាជ្ញាធរខណ្ឌដង្កោ បានឲ្យដឹងថា សកម្មភាពខាងលើនេះ អាជ្ញាធរ នឹងបន្តចុះធ្វើការបន្តទៀតនៅក្នុងមូលដ្ឋាន ធ្វើយ៉ាងណាចង់ឲ្យប្រជាពលរដ្ឋយល់ដឹងកាន់តែច្បាស់អំពីសណ្ដាប់ធ្នាប់ របៀបរៀបរយតាមដងផ្លូវសាធារណៈ ចាប់ពីគល់ស្ពានដែក ផ្លូវលេខ ២១៧ រហូតដល់ផ្លូវបេតុងកែងភូមិទួលពង្រ សង្កាត់ចោមចៅទី ១ ខណ្ឌពោធិ៍សែនជ័យ។

អាជ្ញាធរខណ្ឌដង្កោ បានធ្វើការកាត់សំយាប និង ស្លាកយីហោមួយចំនួន ដែលធ្វើឲ្យប៉ះពាល់ចំណីផ្លូវសាធារណៈ និងគ្មានច្បាប់អនុញ្ញាតមួយចំនួនផងដែរ ដោយសារអាជ្ញាធរខណ្ឌបានណែនាំដល់ម្ចាស់អាជីវកម្ម ប៉ុន្តែមិនព្រមអនុវត្តតាម។ អាជ្ញាធរ ក៏បានវាស់បាញ់ថ្នាំរំកិលថយចូល ៤ ម៉ែត្រ ចាប់ពីបេតុងសងខាងផ្លូវផងដែរ។

អាជ្ញាធរខណ្ឌដង្កោ ក៏បានសំណូមពរប្រជាពលរដ្ឋទាំងអស់ សូមចូលរួមសហការជាមួយអាជ្ញាធរក្នុងការថែរក្សារបៀបរៀបរយសណ្ដាប់ធ្នាប់តាមដងផ្លូវសាធារណៈឲ្យបានល្អប្រសើរ ដើម្បីទុកជាផលប្រយោជន៍រួម៕

អត្ថបទ ៖ សុខា