ព័ត៌មានជាតិ

ទេសរដ្ឋមន្ត្រី កែវ រ៉េមី៖ ប្រទេសថៃកំពុងបង្កភាពបែកបាក់ក្នុងអាស៊ាន

បានផុស

៧ ខែ មុន

នៅ

ថ្ងៃអង្គារ ២៥ វិច្ឆិកា ២០២៥

ដោយ

ប្រធានគណៈកម្មាធិការសិទ្ធិមនុស្សកម្ពុជាទេសរដ្ឋមន្ត្រី កែវ រ៉េមី បានលើកឡើងថា ប្រទេសថៃកំពុងបង្កភាពបែកបាក់ក្នុងអាស៊ាន និងបំផ្លាញគ្រឹះស្នូលរបស់អាស៊ាន បន្ទាប់ពីប្រទេសនេះឈ្លានពានលើកម្ពុជានិងបំពានលើច្បាប់អន្តរជាតិជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងជំនួបជាមួយរដ្ឋមន្ត្រីក្រសួងសិទ្ធិមនុស្សឥណ្ឌូណេស៊ីលោក Natalius Pigai ថ្ងៃទី២៤ ខែវិច្ឆិកា ឆ្នាំ២០២៥ លោកទេសរដ្ឋមន្ត្រី កែវ រ៉េមី បានលើកឡើងថាគោលការណ៍ចក្ខុវិស័យតែមួយ អត្តសញ្ញាណតែមួយ និងសហគមន៍តែមួយរបស់អាស៊ានកំពុងតែបំផ្លាញដោយប្រទេសថៃ ដោយសារអំពើឈ្លានពានលើកម្ពុជានិងការបំពានការសន្យារបស់ប្រទេសនេះជាបន្តបន្ទាប់។

លោកថា៖ «ប្រទេសថៃកំពុងបង្កភាពបែកបាក់ក្នុងអាស៊ាន និងបំផ្លាញគ្រឹះស្នូលរបស់អាស៊ាន ដែលមានចក្ខុវិស័យតែមួយអត្តសញ្ញាណតែមួយ និងសហគមន៍តែមួយ។ គោលការណ៍ទាំងនេះគឺជាមូលដ្ឋានសំខាន់សម្រាប់ការរស់នៅរួមដោយសន្តិភាព ការគោរពច្បាប់ និងការរួបរួមជាតិរបស់ប្រទេសជាសមាជិកទាំងអស់»។

លោកទេសរដ្ឋមន្ត្រីក៏បានជម្រាបពីមូលហេតុដែលនាំឱ្យមានជម្លោះព្រំដែនរវាងកម្ពុជានិងថៃ ផងដែរ គឺផ្តើមចេញពីចេតនារបស់ថៃប្រើប្រាស់ផែនទីគូសដោយខ្លួនឯងបំពានលើសន្ធិសញ្ញាបារាំង-សៀម ឆ្នាំ១៩០៤ និង១៩០៧។ លើសពីនេះលោកក៏បានបញ្ជាក់ពីការបំពានរបស់ថៃលើបទឈប់បាញ់ផងដែរទាក់ទងនឹងការចាប់ទាហានខ្មែរទាំង១៨នាក់នៅព្រឹកថ្ងៃទី២៩ ខែកក្កដា។

លោក កែវ រ៉េមី បានលើកឡើងបន្ថែមថាចំពោះករណីទាហានថៃជាន់មីនលោកបានលើកជាទឡ្ហីករណ៍មួយដែលអាចគិតបានដោយថាកម្ពុជាមានចំការមីនរាប់សិបហិតាដែលបន្សល់ពីសង្គ្រាមដូច្នេះរាល់ពេលដែលទាហានថៃជាន់មីនតើក្នុងទឹកដីកម្ពុជាឬថៃខ្លួនឯង។

លោកថា៖ «បើទាហានថៃជាន់មីនក្នុងទឹកដីកម្ពុជា នោះបញ្ជាក់ថាពួកគេបានលួចចូលក្នុងដែនអធិបតេយ្យភាពរបស់កម្ពុជាដោយខុសច្បាប់ និងបានជាន់បីចាស់ដែលបន្សល់ទុកពីសម័យសង្គ្រាម ប៉ុន្តែបើពួកគេជាន់មីនក្នុងដីថៃនោះគឺជាការទទួលខុសត្រូវរបស់ថៃខ្លួនឯងមិនពាក់ព័ន្ធនឹងកម្ពុជានោះទេ»។

លោកទេសរដ្ឋមន្ត្រី បានស្នើដល់ប្រទេសឥណ្ឌូនេស៊ីជួយជំរុញដល់ប្រទេសថៃឱ្យគោរពសេចក្ដីថ្លែងការណ៍រួមស្ដីពីសន្តិភាព និងច្បាប់អន្តរជាតិក្នុងការដោះស្រាយបញ្ហាដោយសន្តិវិធីផងដែរ។

ក្នុងឱកាសនោះលោក Natalius Pigai បានថ្លែងអំណរគុណចំពោះព័ត៌មានទាំងអស់ដែលប្រធានគណៈកម្មាធិការសិទ្ធិមនុស្សកម្ពុជាបានលើកឡើង ព្រមទាំងបានកោតសរសើរគណៈកម្មាធិការនេះចំពោះកិច្ចការលើកកម្ពស់ និងការពារសិទ្ធិមនុស្សនៅកម្ពុជាផងដែរ។

ប្រទេសថៃបានបើកការឈ្លានពានប្រដាប់អាវុធលើកម្ពុជានៅថ្ងៃទី២៤ ខែកក្កដា ឆ្នាំ២០២៥ និងត្រូវបញ្ចប់វិញនៅថ្ងៃទី២៨ ខែកក្កដា បន្ទាប់ពីមានអន្តរាគមន៍ពីប្រធានាធិបតីអាមេរិកលោក ដូណាល់ ត្រាំ។ ទោះជាយ៉ាងណាបន្ទាប់ពីសម្រេចបានបទឈប់បាញ់ប្រទេសនេះបានបន្តរុកកួនកម្ពុជាជាបន្តបន្ទាប់ដោយរាយបន្លាលួសចូលដីខ្មែរ ដេញពលរដ្ឋខ្មែរចេញពីផ្ទះសំបែង បាញ់សម្លាប់ពលរដ្ឋខ្មែរ និងបំពានផ្លូវភេទលើពលករជាស្ត្រីខ្មែរថែមទៀតផង។ កម្ពុជាបានដាក់សេចក្ដីរាយការណ៍ជាបន្តបន្ទាប់ទៅកាន់ស្ថាប័នអន្តរជាតិ និងទាមទារឱ្យថៃទទួលខុសត្រូវទាំងស្រុងចំពោះសកម្មភាពបំពានច្បាប់នេះ៕

អត្ថបទដោយ ហ៊ុន សិរីវឌ្ឍន៍

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា