ព្រឹកថ្ងៃនេះ ព្រឹទ្ធសភាបើកសម័យប្រជុំពេញអង្គដើម្បីពិនិត្យហើយឱ្យយោបល់លើសេចក្តីព្រាងច្បាប់ថវិកាជាតិ

នៅព្រឹកថ្ងៃទី៥ ខែធ្នូ ឆ្នាំ២០២៥ ព្រឹទ្ធសភាបើកសម័យប្រជុំពេញអង្គរបស់ខ្លួន ដើម្បីពិនិត្យហើយឱ្យយោបល់លើសេចក្តីព្រាងច្បាប់ចំនួន៣ ដែលត្រូវបានរដ្ឋសភាអនុម័តរួចរាល់ហើយបញ្ជូនបន្តមកព្រឹទ្ធសភា ក្នុងនោះក៏មានសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦។

សម័យប្រជុំពេញអង្គព្រឹទ្ធសភា គឺធ្វើឡើងភ្លាមៗបន្ទាប់ពីកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នៅព្រឹកថ្ងៃនេះ ដោយបានកំណត់កាលបរិច្ឆេទ និងរបៀបវារៈបន្តសម័យប្រជុំលើកទី៤ព្រឹទ្ធសភា នីតិកាលទី៥។

បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា ដឹកនាំកិច្ចប្រជុំដោយប្រធានស្តីទីព្រឹទ្ធសភា លោក អ៊ុច បូររិទ្ធ បានកំណត់យកថ្ងៃដដែល វេលាម៉ោង៩:០០នាទី បន្តសម័យប្រជុំលើកទី៤ព្រឹទ្ធសភា នីតិកាលទី៥ ដើម្បីពិនិត្យហើយឱ្យយោបល់ទៅលើសេចក្តីព្រាងច្បាប់ចំនួន៣។

សេចក្ដីព្រាងច្បាប់ទាំង៣ ដែលត្រូវលើកយកមកពិនិត្យហើយឱ្យយោបល់ រួមមាន ១) សេចក្តីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ២) សេចក្តីព្រាងច្បាប់ស្ដីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២៤ និង៣) សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាក់ព័ន្ធការយកពន្ធត្រួតគ្នារវាងកម្ពុជា ជាមួយនឹងប្រទេសជាមិត្តក្នុងតំបន់អាស៊ាន។

សេចក្ដីព្រាងច្បាប់ខាងលើ ដែលស្នើឡើងដោយរដ្ឋាភិបាលកម្ពុជា ត្រូវបានរដ្ឋសភាអនុម័តទាំងស្រុងក្នុងសម័យប្រជុំពេញអង្គរដ្ឋសភា កាលពីចុងសប្ដាហ៍មុន៕

ដោយ៖ ធឿន វ៉ាន់សុង