អគ្គិភ័យឆេះឃ្លាំងធ្វើគ្រឿងតុបតែងរោងអាពាហ៍ពិពាហ៍ នៅសង្កាត់គោកឃ្លាង ខូចខាតអស់ទាំងស្រុង

ឃ្លាំងធ្វើគ្រឿងតុបតែងរោងអាពាហ៍ពិពាហ៍ មានសម្ភារៈជាច្រើន ត្រូវឆេះអស់ទាំងស្រុង ក្នុងករណីអគ្គិភ័យឆាបឆេះខូចខាតទាំងស្រុង ហេតុការណ៍នេះបង្កភ្ញាក់ផ្អើល កាលពីវេលាម៉ោង ០៣រសៀលថ្ងៃទី ១៣ ខែមករា ឆ្នាំ២០២៦ នៅតាមបណ្តោយផ្លូវបេតុង សង្កាត់គោកឃ្លាង ខណ្ឌសែនសុខ រាជធានីភ្នំពេញ។

បើតាមការបញ្ជាក់ពីប្រជាពលរដ្ឋបានអោយដឹងថា ពួកគាត់មិននឹកស្មានថា អណ្តាតភ្លើងឆេះរាលដាល បង្កអោយបាក់ស្រុតលឿនបែបនេះនោះទេ ។ ដោយគ្រាន់តែពួកគាត់ធុំក្លិនឈ្ងៀមផ្សែងភ្លាម ក៏នាំគ្នារត់ចេញពីក្នុងផ្ទះមកមើល បានប្រទះឃើញឃ្លាំងធ្វើសម្ភារៈតុបតែងរោងមង្គលការ ត្រូវបានឆេះបាត់ទៅហើយ ។ ខណៈនោះដែរ ប្រជាពលរដ្ឋប្រញាប់ប្រញាល់រាយការណ៍ជូនសមត្ថកិច្ចជំនាញ ពន្លត់អគ្គិភ័យតែម្តង ។ លុះពេលកម្លាំងនគរបាល មកដល់ រៀបទុយោទឹក ត្រៀមបាញ់ពន្លត់ តំបូលឃ្លាំងបានស្រុតចុះមកក្រោនបាត់ទៅហើយ។

អគ្គិភ័យនេះដែរបានលេបត្របាក់ ឃ្លាំងធ្វើគ្រឿងតុបតែងមង្គលការ អស់ទាំងស្រុង តែមិនបង្កអោយមនុស្សរងរបួសនោះទេ ដោយបានប្រើប្រាស់រថយន្តពន្លត់របស់ស្នងការរាជធានី ចំនួន ១០គ្រឿង , រថយន្តជំនួយក្រុមហ៊ុន ស្រាបៀរកម្ពុជា ០១គ្រឿង នឹងរថយន្តទីក្រុង អូឡាំព្យា ០១គ្រឿង បាញ់អោយរលត់ជាស្ថាពរ ។ ចំណែកមូលហេតុបង្កអោយកើតជាអគ្គិភ័យ សមត្ថកិច្ចកំពុងធ្វើការស្រាវជ្រាវបន្ថែមនៅទីតាំងខាងលើនេះ៕ អត្ថបទ ៖ រដ្ឋា