ព័ត៌មានជាតិ

អាជ្ញាធរខេត្តបាត់ដំបង បិទផ្នែកខាងក្នុងផ្សារមោងឬស្សីចាស់ជាបណ្ដោះអាសន្ន

បានផុស

៥ years មុន

នៅ

ថ្ងៃអង្គារ ២០ មេសា ២០២១

ដោយ

អាជ្ញាធរខេត្តបាត់ដំបងបានសម្រេចបិទផ្នែកខាងក្នុងផ្សារមោងឫស្សីចាស់ជាបណ្តោះអាសន្នដើម្បីទប់ស្កាត់ការឆ្លងរាលដាលនៃជំងឺកូវីដ១៩។

លោក ងួន រតនៈ អភិបាលខេត្តបាត់ដំបងបានឲ្យដឹងតាមរយៈសេចក្តីជូនដំណឹងមួយ ចុះថ្ងៃទី២០ខែមេសានេះថា «ត្រូវបានបិទផ្នែកខាងក្នុងផ្សារមោងឫស្សីចាស់ ក្នុងស្រុកមោងឬស្សីជាបណ្តោះអាសន្ន ដោយអនុញ្ញាតឲ្យលក់នៅផ្នែកខ្លះនៃបរិវេណខាងក្រៅផ្សារ ដូចជាបន្លែត្រីសាច់គ្រឿងឧបភោគ បរិភោគដែលជាតម្រូវការចាំបាច់រស់នៅប្រចាំថ្ងៃដោយត្រូវអនុវត្តនូវវិធានការសុខាភិបាលក្នុងការរក្សាគម្លាតសង្គមគម្លាតបុគ្គលចាប់ពី១ម៉ែត្រកន្លះឡើងទៅពាក់ម៉ាសនិងលាងដៃ»។

លោកអភិបាលខេត្តបានបន្តថា កាបិទផ្នែកខាងក្នុងផ្សារនេះមានរយៈពេល៨ថ្ងៃ គឺចាប់ពីថ្ងៃទី២១រហូតដល់ថ្ងៃទី២៨ ខែមេសា ឆ្នាំ២០២១ ក្នុងគោលបំណងដើម្បីបង្ការការពារទប់ស្កាត់ការឆ្លងរាលដាលនៃជំងឺកូវីដ១៩ ចូលក្នុងសហគមន៍។

ជាមួយគ្នានេះដែរ លោកអភិបាលខេត្តបានប្រគល់ភារកិច្ចជូនរដ្ឋបាលស្រុកមោងឫស្សី ដើម្បីបង្កើតក្រុមការងារប្រចាំការក្នុងទីតាំងដែលត្រូវបានបិទសម្រាប់ទទួលបន្ទុកអនុវត្ត និងសម្របសម្រួលលើការងារចាំបាច់ដូចជាការងារថែរក្សាសន្តិសុខ និងសណ្ដាប់ធ្នាប់សាធារណៈ ការងារត្រួតពិនិត្យនិងគ្រប់គ្រងទីកន្លែងលក់បន្លែ ត្រីសាច់ និងឧបភោគបរិភោគ និងពង្រីកការអនុវត្តប្រធានការដ្ឋានភិបាលនិងវិធានការរដ្ឋបាលឲ្យបានម៉ឺងម៉ាត់៕

អត្ថបទ ៖ សំអឿន