រដ្ឋបាលរាជធានី ចែកអំណោយជូនប្រជាពលរដ្ឋតំបន់ពណ៌ក្រហម ១,០០០គ្រួសារ នៅខណ្ឌមានជ័យ

ភ្នំពេញ៖ អភិបាលនៃគណៈអភិបាលរាជធានីភ្នំពេញ នារសៀលថ្ងៃទី២០ ខែមេសានេះ បាននាំយកអំណោយជាគ្រឿងឧបភោគបរិភោគដែលជាអំណោយ របស់សម្ដេចអគ្គមហាសេនាបតីតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រានី ហ៊ុន សែន យកទៅផ្ដល់ជូនប្រជាពលរដ្ឋ រស់នៅតំបន់ដែលរដ្ឋបាលរាជធានីភ្នំពេញចាត់ទុកជាតំបន់ពណ៌ក្រហមចំនួន១,០០០គ្រួសារ នៅក្នុងភូមិដំណាក់ធំ២ និងភូមិដំណាក់ធំ៣ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។ ក្នុងមួយគ្រួសារទទួលបាន​អង្ករ​២៥​គីឡូក្រាម មី១កេស ទឹកត្រី ទឹកស៊ីអ៊ីវ១យួរ។

លោក ឃួង ស្រេង អភិបាលរាជធានីភ្នំពេញ បានមានប្រសាសន៍លើកឡើងថា ការបិទខ្ទប់រាជធានីភ្នំពេញ ពិតជាធ្វើឱ្យបងប្អូនប្រជាពលរដ្ឋមានការលំបាកហើយ ទាំងការរកស៊ី និងការរស់នៅប្រចាំថ្ងៃ។ តែលោកសូមឱ្យប្រជាពលរដ្ឋទាំងអស់អត់ធ្មត់ ចូលរួមជាមួយរដ្ឋាភិបាលដើម្បីទប់ស្កាត់នូវជំងឺកូវីដ-១៩។

លោកមានប្រសាសន៍បន្តថា៖ “សម្ដេចតេជោ ហ៊ុន សែន បានខិតខំប្រុងប្រែងខ្លាំងណាស់ ដើម្បីធ្វើយ៉ាងណាឱ្យជំងឺកូវីដ-១៩ បាត់ពីកម្ពុជា ដោយសម្តេចបានដាក់ចេញនូវវិធានការជាច្រើន ដើម្បីទប់ស្កាត់នៃការរីករាលដាលនៃជំងឺនេះ។ សម្ដេចបានយកចិត្តទុកដាក់ពីជីវភាពប្រជាណលរដ្ឋបន្ថែមទៀត ដោយបានជួយឧបត្ថម្ភជាស្បៀងអាហារ សម្រាប់ប្រជាពលរដ្ឋដែលត្រូវបានបិទខ្ទប់១៤ថ្ងៃនេះ”។

 លោក ឃួង ស្រេង បានសូមប្រជាពលរដ្ឋមានការយោគយល់ បើប្រជាពលរដ្ឋមានការខ្វះខាតក្នុងជីវភាពរស់នៅប្រចាំថ្ងៃ ពួកគាត់អាចទាក់ទងមកអាជ្ញាធរសង្កាត់ សង្កាត់នឹងផ្ដល់ជូនជាអំណោយជូនភ្លាម។

រដ្ឋបាលរាជធានីភ្នំពេញបានត្រៀមអង្គរក្នុង១ខណ្ឌ១០តោនរួចហើយ សំរាប់ចែកជូនប្រជាពលរដ្ឋដែលមានបញ្ហាខ្វះខាតក្នុងដំណាក់កាលបិទខ្ទប់ដោយជំងឺ-១៩នេះ៕

អត្ថបទ៖ ស្រីរ័ត្ន