អាវុធហត្ថរាជធានីថ្លែងអំណរគុណចំពោះ អង្គការសប្បុរសធម៌និងសប្បុរសជនដែលបានផ្តល់អំណោយក្នុងយុទ្ធនាការប្រឆាំងកូវីដ១៩

នៅបញ្ជាការដ្ឋានកងរាជអាវុធហត្ថរាជធានីភ្នំពេញ នាថ្ងៃទី២២ ខែមេសានេះ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ បានថ្លែងអំណរគុណចំពោះ អង្គការសប្បុរសធម៌ និងសប្បុរសជនដែលបានផ្តល់អំណោយក្នុងយុទ្ធនាការប្រឆាំងកូវីដ១៩ដ៍កាចសាហាវ ដែលបានឆក់យកអាយុជីវិតពលរដ្ឋខ្មែរជាង៥០នាក់ និងឆ្លងជិត៨០០០នាក់ហើយគិតត្រឹមថ្ងៃទី២២ ខែមេសានេះ។

លោកឧត្តមសេនីយ៍ឯក រ័ត្ន ស្រ៊ាង ថ្លែងបែបនេះខណៈពេលចាត់តំណាងទទួលអង្ករចំនួន ៥តោន ពីអង្គការសប្បុរសធម៌កម្ពុជាអន្តរជាតិ និងភេសជ្ជៈ Beauti Drink ចំនួន១៥០កេស ពីក្រុមហ៊ុន ស៊ី ឡាយថ៍ ប្រគល់ជូន អាវុធហត្ថរាជធានីភ្នំពេញ ដើម្បីប្រើប្រាស់ជាប្រយោជន៍ ក្នុងយុទ្ធនាការ បង្ការ ទប់ស្កាត់ ការរីករាលដាលជំងឺកូវីដ-១៩។

ក្នុងឱកាសនោះ ក្រុមការងារតំណាងលោកឧត្តមសេនីយ៍ឯក រ័ត្ន ស្រ៊ាងក៍បានថ្លែងអំណរគុណយ៉ាងជ្រាលជ្រៅ ចំពោះសប្បុរសជនខាងលើ ដែលមានចិត្តជ្រះថ្លាឧបត្ថម្ភ អង្ករ និងភេសជ្ជៈ ដល់អាវុធហត្ថរាជធានីភ្នំពេញក្នុងពេលយុទ្ធនាការប្រឆាំងកូវីដ១៩ដ៍កាចសាហាវនាពេលនេះ៕

អត្ថបទ ៖ វិមាន