ភ្លៀងលាយឡំជាមួយខ្យល់កន្ត្រាក់ក្នុងស្រុកសំឡូត បង្កឲ្យផ្លែទុរេនរាប់រយផ្លែជ្រុះរាយប៉ាយពេញដី

ផ្លែទុរេនចាស់ខ្ចីរាប់រយផ្លែ បានជ្រុះរាយប៉ាយពេញដី ខណៈមានធ្លាក់ភ្លៀងមួយមេលាយឡំជាមួយខ្យល់កន្ត្រាក់បោកបក់ចូលទៅលើចម្ការទុរេនជាច្រើន វាហាក់បីដូចជាចាប់ដើមទុរេនអង្រួនបណ្ដាលឲ្យផ្លែទុរេនខ្ចីចាស់ធ្លាក់រាយប៉ាយពេញដី។

គ្រោះធម្មជាតិនេះបានកើតឡើងនៅវេលាម៉ោង១រសៀលថ្ងៃទី២៦ ខែមេសា ឆ្នាំ២០២៦ ត្រង់ចំណុចភូមិស្រែរាជ ឃុំស៊ុង ស្រុកសំឡូត ខេត្តបាត់ដំបង ដែលនៅក្នុងតំបន់នោះមានចម្ការទុរេនជាច្រើន ដោយសារតែប្រជាពលរដ្ឋនៅទីនោះប្រកបមុខរបរដាំទុរេនស្ទើរគ្រប់គ្នា។

លោក កែវ វិបុល មេប៉ុស្តិ៍នគរបាលរដ្ឋបាលស៊ុង បានបញ្ជាក់ថា នៅវេលាម៉ោង ១រសៀល ម្សិលមិញនេះ ភ្លៀងបានធ្លាក់យ៉ាងខ្លាំងនៅលើទឹកដីស្រុកសំឡូត ហើយនៅពេលនោះដែរខ្យល់ក៏បានបោកបក់ចូលទៅលើភូមិសាស្ត្រខាងលើដែលជាចំណុចមានចម្ការទុរេនជាច្រើន និងបានបំផ្លាញផ្លែទុរេនរាប់រយផ្លែ ដែលម្ចាស់ចម្ការម្នាក់ៗស្ទើរទឹកភ្នែកនៅពេលដែលឃើញផ្លែទុរេនរបស់ខ្លួនធ្លាក់ពេញដីបែបនេះ។

លោកមេប៉ុស្តិ៍ក៏បានបន្តថា យោងតាមរបាយការណ៍របស់អាជ្ញាធរ ខ្យល់កន្រ្តាក់នេះមិនបានធ្វើឲ្យប៉ះពាល់ដល់អាយុជីវិតមនុស្សឬសត្វឡើយ៕

អត្ថបទ៖ សោ និយមរ័ត្ន