កម្ពុជាបង្កើនកិច្ចសហប្រតិបត្តិការជាមួយនីការ៉ាហ្កា ដោយបង្កើតកិច្ចពិគ្រោះយោបល់ទ្វេភាគី

កម្ពុជាបានបង្កើននូវកិច្ចសហប្រតិបត្តិការជាមួយនីការ៉ាហ្កា ដែលជាប្រទេសស្ថិតនៅក្នុងតំបន់អាមេរិកកណ្ដាល ដោយការបង្កើតឡើងនូវកិច្ចពិគ្រោះយោបល់នយោបាយទ្វេភាគីរវាងក្រសួងការបរទេសនៃប្រទេសទាំងពីរ។

យន្តការពិគ្រោះយោបល់នេះ គឺត្រូវបានសម្រេចបង្កើតឡើងតាមរយៈអនុស្សរណៈនៃការយោគយល់គ្នារវាងក្រសួងការបរទេសប្រទេសទាំងពីរ ដែលត្រូវបានចុះហត្ថលេខាជាផ្លូវការកាលពីថ្ងៃទី២៨ ខែមេសា ឆ្នាំ២០២៦ ដោយរដ្ឋមន្ត្រីស្ដីទីក្រសួងការបរទេសកម្ពុជា លោកស្រី អ៊ាត សោភា និងលោក Mario José Armengol Campos ឯកអគ្គរដ្ឋទូតការ៉ាហ្កាប្រចាំកម្ពុជា ដែលមាននិវេសនដ្ឋាននៅទីក្រុងហាណូយ។

ក្រៅពីការចុះអនុស្សរណៈនៃការយោគយល់គ្នាស្តីពីការបង្កើតកិច្ចពិគ្រោះយោបល់នយោបាយ ដែលជាផលប្រយោជន៍រួម ភាគីទាំងពីរ ក៏បានចុះហត្ថលេខាលើកិច្ចព្រមព្រៀងរវាងកម្ពុជា និងនីការ៉ាហ្កា ក្នុងការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការថែមទៀតផង។

លោកស្រី អ៊ាត សោភា និងលោកឯកអគ្គរដ្ឋទូត បានសម្តែងការពេញចិត្តចំពោះវឌ្ឍនភាពនៃទំនាក់ទំនងទ្វេភាគីនេះ និងបានបញ្ជាក់សាជាថ្មីនូវការប្តេជ្ញាចិត្តក្នុងការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត៕