ព័ត៌មានជាតិ

ក្រសួងការងារណែនាំដល់ថៅកែរោងចក្រធ្វើបច្ចុប្បន្នភាពលេខទូរស័ព្ទនិងអត្តសញ្ញាណកម្មករនិយោជិតជាបន្ទាន់

បានផុស

៥ years មុន

នៅ

ថ្ងៃពុធ ១២ ឧសភា ២០២១

ដោយ

ក្រសួងការងារនិងបណ្ដុះបណ្ដាលវិជ្ជាជីវៈបានណែនាំដល់ម្ចាស់ ឬនាយករោងចក្រផ្នែកវាយនភណ្ឌកាត់ដេរ និងផលិតស្បែកជើង និងផលិតផលធ្វើដំណើរ និងកាបូប ត្រូវធ្វើបច្ចុប្បន្នភាពលេខទូរស័ព្ទនិងអត្តសញ្ញាណប័ណ្ណសញ្ជាតិខ្មែររបស់បងប្អូនកម្មករនិយោជិតដែលមាននៅក្នុងបញ្ជីបើកប្រាក់ឈ្នួលប្រចាំខែមីនា ឆ្នាំ២០២១ជាបន្ទាន់ ដើម្បីឲ្យក្រសួងរៀបចំជំនួយសង្គមជាសាច់ប្រាក់ជួយដល់កម្មករនិយោជិតឱ្យបានទាន់ពេលវេលា។

លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ម្ចាស់រោងចក្រទាំងអស់ ត្រូវផ្ដល់បញ្ជីឈ្មោះកម្មករនិយោជិត និងឈ្មោះពេទ្យ ឬគិលានុបដ្ឋាកប្រចាំរោងចក្រ និងស្គេនបញ្ជីឈ្មោះដែលបោះត្រានៅគ្រប់ទំព័រជាភីឌីអេហ្វ មកប្រព័ន្ធគ្រប់គ្រងរបស់ក្រសួងឲ្យបានមុនថ្ងៃទី២៧ ខែឧសភាឆ្នាំ២០២១។

ទន្ទឹមនឹងនេះ ត្រូវផ្ញើឈ្មោះកម្មករនិយោជិតដែលមានវិជ្ជមានកូវីដ១៩ដែលត្រូវបានព្យាបាលជាសះស្បើយដោយមានលិខិតបញ្ជាក់ពីមន្ទីរពេទ្យ ឬមជ្ឈមណ្ឌលព្យាបាលកូវីដ១៩មកប្រព័ន្ធឃ្លាំមើលករណីកូវីដ១៩តាមរោងចក្រសហគ្រាសរបស់ក្រសួងការងារ ដែលនឹងដាក់ឱ្យដំណើរការនៅក្នុងសប្តាហ៍ទីមួយ នៃខែមិថុនា ឆ្នាំ២០២១ នេះ។

គួរបញ្ជាក់ថា កាលពីថ្ងៃទី១១ ខែឧសភា ឆ្នាំ២០២១រដ្ឋាភិបាលបានដាក់ឲ្យអនុវត្តកម្មវិធីជំនួយសង្គមជាសាច់ប្រាក់ក្រោយពេលបិទខ្ទប់ដើម្បីជួយគាំទ្រគ្រួសារប្រជាពលរដ្ឋដែលមានកម្រិតជីវភាពទាប ជួបប្រឈមនឹងការលំបាកក្រោយការអនុវត្តវិធានការបិទខ្ទប់ជាលក្ខណៈទ្រង់ទ្រាយធំ ការផ្ដល់ជំនួយសង្គមជាសាច់ប្រាក់សម្រាប់គ្រួសារដែលមានអ្នកស្លាប់ដោយសារជំងឺកូវីដ១៩ គ្រួសារដែលមានអ្នកឆ្លងជំងឺកូវីដ១៩ និងមានការលំបាកផ្នែកជីវភាពក្នុងព្រឹត្តិការណ៍២០កុម្ភៈ ក្នុងនោះក៏មានការផ្តល់ឧបត្ថម្ភដល់កម្មករនិយោជិតផងដែរ៕

អត្ថបទ ៖ សំអឿន

Related Topics:

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា