វិស័យ​អចលនទ្រព្យ​នៅ​ក្រុង​ព្រះសីហនុ នឹង​ងើប​ឡើង​វិញ​ឆាប់​រហ័ស ក្រោយពី​ហេដ្ឋារចនាសម្ព័ន្ធ​សំខាន់​ៗ​លេច​ជា​រូបរាង

ភាពរីកចម្រើននៃហេដ្ឋារចនាសម្ព័ន្ធនានាក្នុងក្រុងព្រះសីហនុ គឺជាសញ្ញាវិជ្ជមានសម្រាប់វិស័យអចលនទ្រព្យ ដែលបាននឹងកំពុងរងផលប៉ះពាល់ដោយសារតែជំងឺរាតត្បាតកូវីដ១៩។ សម្រាប់អ្នកជំនាញអចលនទ្រព្យ ហេដ្ឋារចនាសម្ព័ន្ធនានាក្នុងក្រុងព្រះសីហនុដែលបាននឹងកំពុងអភិវឌ្ឍន៍ និងគ្រោងអភិវឌ្ឍន៍ នឹងក្លាយជាកត្តាលីករជំរុញវិស័យមួយនេះឱ្យវិលទៅរកស្ថានភាពមុនវិបត្តិ។

លោក ស៊ន សៀប អគ្គនាយកក្រុមហ៊ុន ឃីរៀលអុីស្ទេត មានប្រសាសន៍ថា៖ «បច្ចុប្បន្ន វិស័យអចលទ្រព្យនៅក្នុងក្រុងព្រះសីហនុនៅមិនទាន់ល្អប្រសើរនៅឡើយទេ ប៉ុន្តែបើពិនិត្យមើលពីសន្ទុះគម្រោងអភិវឌ្ឍហេដ្ឋារចនាសម្ព័ន្ធដែលកំពុងតែស្ថាបនា និងគ្រោងស្ថាបនា ទីផ្សារនឹងអាចវិលទៅរកស្ថានភាពល្អប្រសើរឡើងវិញយ៉ាងឆាប់រហ័សក្នុងរយៈពេលប៉ុន្មានឆ្នាំខាងមុខទៀត។»

លោក ស៊ន សៀប បានបន្តថា រយៈពេលចុងក្រោយនេះ ក្រុងព្រះសីហនុមានភាពល្អប្រសើរខាងហេដ្ឋារចនាសម្ព័ន្ធសំខាន់ៗជាច្រើនដូចជា ផ្លូវល្បឿនលឿនភ្នំពេញ ក្រុងព្រះសីហនុ ដែលកំពុងស្ថាបនា គម្រោងផ្លូវ៣៤ខ្សែដែលស្ថាបនាជិតរួចរាល់ និងគម្រោងកំពង់ផែទឹកជ្រៅស្ដង់ដារអន្តរជាតិដែលកំពុងសិក្សាដើម្បីស្ថាបនា។

ទោះជាយ៉ាងណា នៅក្នុងបរិបទកូវីដ១៩ លោក ស៊ន សៀប បានបញ្ជាក់ថា កាលពីឆ្នាំ២០២០តម្លៃដីធ្លីនៅក្រុងព្រះសីហនុបានធ្លាក់ចុះ១០ភាគរយ បើធៀបនឹងឆ្នាំ២០១៩។ ដោយឡែក ទីផ្សារខុនដូរដែលផ្ដោតភាគច្រើនលើទីផ្សារខាងក្រៅនៅតែបន្តរងផលប៉ះពាល់ ដោយសារតែវិធានការបិទខ្ទប់នានា និងការរឹតត្បិតការធ្វើដំណើរជាដើម។

ថ្វីត្បិតជំងឺកូវីដ១៩បានបង្ករការរំខានដល់ការអភិវឌ្ឍសេដ្ឋកិច្ច តែហេដ្ឋារចនាសម្ព័ន្ធនៅតែបន្តដំណើរការទៅមុខ។ យោងតាមលោក ឃាង ភារម្យ អ្នកនាំពាក្យសាលាខេត្តព្រះសីហនុផ្លូវក្រុង៣៤ខ្សែប្រវែង៨២គីឡូម៉ែត្រនៅខេត្តព្រះសីហនុ ដែលបា​នចាប់ផ្តើម​បើក​ការដ្ឋាន​សាងសង់​ កាលពី​ថ្ងៃ​ទី​១៦ ខែវិ​ច្ឆិកា​ឆ្នាំ​២០១៩​ ស្ថាបនារួចរាល់ជិត១០០ភាគរយហើយ។ ការងារស្ថាបនាស្ថានីយ៍ប្រព្រឹត្តិកម្មទឹកកខ្វក់ទី២ សម្រេចបាន ១០០% ការងារស្ថាបនាស្ថានីយ៍ប្រព្រឹត្តិកម្មទឹកកខ្វក់ទី១សម្រេចបាន៨៤% និងកំពុងពិនិត្យលទ្ធភាពស្ថាបនាស្ថានីយ៍ប្រព្រឹត្តិកម្មទឹកកខ្វក់ទី៣។

ក្នុងឱកាសចុះត្រួតពិនិត្យវឌ្ឍនភាពសាងសង់ផ្លូវល្បឿនលឿន ភ្នំពេញ-ព្រះសីហនុ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីសាធារណការ និងដឹកជញ្ជូន កាលពីថ្ងៃទី២១ ខែមិថុនា ឆ្នាំ២០២២ បានជំរុញឲ្យក្រុមហ៊ុនសាងសង់ផ្លូវបញ្ចប់ការដ្ឋានរបស់ខ្លួន ត្រឹមខែកញ្ញា ឆ្នាំ២០២២ ខាងមុខនេះ។ លោក ស៊ុន ចាន់ថុល មានប្រសាសន៍ថា រហូតមកដល់ពេលនេះ គម្រោងសាងសង់ ផ្លូវល្បឿនលឿន ភ្នំពេញ-ព្រះសីហនុ សម្រេចបានប្រហែល ៥៥%ហើយ លើផ្លូវចម្ងាយ១៨៧ គីឡូម៉ែត្រ ដោយប្រើប្រាស់ថវិកាប្រហែលជា២ពាន់លានដុល្លារ សហរដ្ឋអាមេរិក។

នៅក្នុងរយៈពេលប៉ុន្មានឆ្នាំទៀត កម្ពុជានឹងលែងពឹងផ្អែកលើសិង្ហបុរី និងហុងកុងចំពោះការសុំចូលចតនាវាដឹកទំនិញធំៗ​ បន្ទាប់ពីកំពង់ផែទឹកជ្រៅចំនួនពីរទៀត​នៅក្រុងព្រះសីហនុ បញ្ចប់ការសាងសង់ជាស្ថាពរនៅពេលខាងមុខ។ បើតាមការឱ្យដឹងពី លោក ស៊ុន ចាន់ថុល កម្ពុជាអាចនឹងអនុញ្ញាតិឱ្យនាវាអាស៊ីប៉ាស៊ីហ្វិកដល់ទៅ ៩៧% ចូលចតនៅកំពង់ផែស្វយ័តក្រុងព្រះសីហនុបាន នៅពេលដែលកំពង់ផែទឹកជ្រៅសាងសង់ចប់នៅឆ្នាំ២០២៣ខាងមុខនេះ៕

អត្ថបទ៖ វ៉ាត វិន