ភ្នំពេញ៖ ករណី​វត្តអារាមនៅរាជធានី​ភ្នំពេញ​កើតមាន​ការ​ឆ្លងរីករាលដាលកូវីដ-១៩ ប្រធានក្រុមប្រឹក្សារាជធានីភ្នំពេញ បានស្នើសុំមន្ទីរធម្មការ និងសាសនា ជំរុញឱ្យចៅអធិការវត្តមានវិធានការគ្រប់គ្រងវត្តឱ្យបានតឹងរឹង ដោយគោរពតាមវិធានការសុខាភិបាល។

លោកប៉ា សុជាតិវង្ស ប្រធានក្រុមប្រឹក្សារាជធានីភ្នំពេញបានមានប្រសាសន៍លើកឡើងថា នៅរាជធានីភ្នំពេញមានវត្ត​ចំនួន ៥ កើតមានករណី​ឆ្លងកូវីដ-១៩ មានជាអាទិ៍ វត្តចង្ក្រានតាព្រហ្មស្ទឹងមានជ័យ វត្តមហាមន្ត្រី វត្តមេត្តាពោធិ៍វង្ស​ជាដើម។ លោក​ប៉ា​ សុជាតិវង្ស ស្នើសុំមន្ទីរធម្មការ និងសាសនា ជំរុញឱ្យចៅអធិការវត្តមានវិធានការគ្រប់គ្រងវត្តឱ្យបានតឹងរឹង ដោយគោរពតាមវិធានការ សុខាភិបាល ជាពិសេស ត្រួតពិនិត្យការចេញចូល ការលក់ដូរក្នុងវត្ត​ជាដើម។

លោកបន្តថា វិធានការនានាដើម្បីប្រយុទ្ធប្រឆាំងនឹងជំងឺកូវីដ១៩ ត្រូវបានអប់រំផ្សព្វផ្សាយ យ៉ាងទូលំទូលាយ ប្រជាពលរដ្ឋភាគច្រើនបានជ្រួតជ្រាប និងយល់ដឹង។ ប៉ុន្តែវិធានការច្បាប់ទាក់ទង ដល់ការដាក់ទណ្ឌកម្មចំពោះបទល្មើស (ផាកពិន័យ ឬដាក់ពន្ធនាគារ) ដែលជាកត្តាជំរុញដល់ការ បង្ការទប់ស្កាត់ ការកាត់បន្ថយ និងការបំបាត់នៃការឆ្លងរាលដាលជំងឺកូវីដ១៩ ជាអាទិ៍ ៣ការពារ ៣កុំ ការធ្វើតេស្ត ការធ្វើចត្តាឡីស័ក ការចាក់វ៉ាក់សាំង ហាក់នៅមិនទាន់ចាប់អារម្មណ៍ខ្ពស់នៅឡើយ។ ហេតុនេះ សំណូមពរបង្កើនការអប់រំផ្សព្វផ្សាយវិធានការច្បាប់តាមរយៈមធ្យោបាយផ្សព្វផ្សាយផ្សេងៗ ឱ្យបានផុសផុល៕

អត្ថបទ៖ ស្រីរ័ត្ន