ក្រសួង​កសិកម្ម​បង្កាត់​បាន​ពូជស្រូវក្រអូប​ថ្មី មិនប្រកាន់រដូវ អាច​ឱ្យកសិករដាំដុះ​បានច្រើន​ដង

ភ្នំពេញ៖ ក្រសួងកសិកម្មរុក្ខាប្រមាញ់និងនេសាទ គ្រោងបញ្ចេញនិងផ្សព្វផ្សាយពូជស្រឡាយស្រូវក្រអូបមិនប្រកាន់រដូវថ្មី ជូនកសិករប្រើប្រាស់នាពេលខាងមុខ ដែលអាច​ដាំដុះបានច្រើនដងសំដៅបង្កើនការនាំចេញឱ្យបានកាន់តែច្រើនថែមទៀត។

ក្រសួងកសិកម្មបានឱ្យដឹងថា បន្ទាប់ពីវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាហៅកាត់ថា CARDI​បាន​អភិវឌ្ឍន៍ពូជស្រឡាយស្រូវក្រអូប មិនប្រកាន់រដូវសម្រេចបានលទ្ធផលជាបន្តបន្ទាប់មក នារដូវវស្សាឆ្នាំ​២០២១នេះ វិទ្យាស្ថានCARDI និងសហនព័ន្ធស្រូវអង្ករកម្ពុជា (CRF) បានជ្រើសរើសយកពូជស្រូវស្រឡាយ​ក្រអូបមិនប្រកាន់រដូវចំនួន៣ ដាក់បញ្ចូលក្នុងពិសោធន៍បន្សាំពូជលើស្រែកសិករចំនួន ៤០ កន្លែងនៅក្នុងខេត្តព្រៃវែង។ ក្នុងនោះ ២៥ ពិសោធន៍អនុវត្តន៍ដោយCARDI និង ១៥ ពិសោធន៍ទៀតអនុវត្តន៍ដោយសហព័ន្ធស្រូវ​អង្ករ​កម្ពុជា (CRF)។

ចំពោះទិន្នន័យដែលនឹងទទួលបានពីការធ្វើ ពិសោធន៍នេះ នឹងត្រូវធ្វើការវិភាគ មុននឹងបញ្ចេញ និងផ្សព្វផ្សាយ ពូជស្រូវស្រឡាយដែលល្អជាងគេជូនកសិករដើម្បីដាក់ឲ្យប្រើប្រាស់នាពេលខាងមុខ។

ក្រសួងកសិកម្មបានបញ្ជាក់ថា នៅប្រទេសកម្ពុជាពូជស្រូវក្រអូបប្រពៃណីស្ទើរតែទាំងអស់ អាចឲ្យកសិករធ្វើការដាំដុះបានតែម្តងគត់ក្នុងមួយឆ្នាំនៅរដូវវស្សា។ ដើម្បីឲ្យកសិករអាចបង្កើនការដាំដុះ ពូជស្រូវក្រអូបប្រណិត​បានគ្រប់រដូវ ចាប់ពីអំឡុងឆ្នាំ ២០១៣មក វិទ្យាស្ថានស្រាវជ្រាវ និងអភិវឌ្ឍន៍នកសិកម្មកម្ពុជា បានស្រាវជ្រាវអភិវឌ្ឍន៍ស្រឡាយស្រូវក្រអូប តាមរយៈការបង្កាត់រវាងពូជស្រូវផ្ការំដួល (មេ) និងស្រឡាយ CNi9024 (បា) ដែលមានប្រភពមកពីប្រទេសចិន។

ដោយសារស្រូវក្រអូបបានដើរតួរយ៉ាងសំខាន់នៅក្នុងឧស្សាហកម្មស្រូវអង្ករនៅក្នុងប្រទេសកម្ពុជា ទើបក្រសួងបានប្រឹងប្រែងធ្វើការអភិវឌ្ឍប្រភេទពូជស្រូវក្រអូបមិនប្រកាន់រដូវនេះ ដើម្បីជំរុញលើការបង្កបង្កើនផលរបស់កសិករសម្រាប់ បង្កើនផលិតកម្មស្រូវ ឲ្យមានកំណើនកាន់តែខ្លាំងឡើងថែមទៀត សំដៅជម្រុញការនាំចេញអង្ករក្រអូបទៅកាន់ទីផ្សារក្រៅប្រទេសឲ្យមានកំណើនបន្ថែមទៀត ខណៈអង្ករក្រអូបកម្ពុជាកំពុងតែមានការពេញនិយមយ៉ាងខ្លាំងនៅលើទីផ្សារអន្តរជាតិ៕

អត្ថបទ៖ សំអឿន