សម្ដេចតេជោ ហ៊ុន សែន៖ «មានតែភាគីពាក់ព័ន្ធ ក្នុងប្រទេសមានជម្លោះតែប៉ុណ្ណោះ ដែលអាចចូលរួមចំណែក កសាង​សន្តិភាពបាន»

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា មានតែភាគីពាក់ព័ន្ធ នៅក្នុងប្រទេសមាន​ជម្លោះ​តែ​ប៉ុណ្ណោះ ដែលអាចចូលរួមចំណែក កសាងសន្តិភាព និងប្រទេសជាតិបាន។ ការលើកឡើងនេះ គ្រាដែល​សម្ដេច​តេជោ ហ៊ុន សែន បានអញ្ជើញថ្លែងសុន្ទរកថាគន្លឹះ ក្នុងមហាសន្និបាត នៃក្ដីសង្ឃឹមលើកទី៧ ក្រោមប្រធានបទស្ដីពី«សន្ដិភាពនៅតំបន់អាស៊ីប៉ាស៊ីហ្វិក» នាព្រឹកថ្ងៃទី១២ ខែកញ្ញា ឆ្នាំ២០២១។

តាមរយៈសុន្ទរកថាគន្លឹះ សម្ដេចតេជោ ហ៊ុន សែន បានលើកឡើងថា ក្នុងនាមជាប្រទេស ដែលផ្ដល់តម្លៃមិនអាច​កាត់​ថ្លៃបាន ដល់សន្តិភាព កម្ពុជាសូមវាយតម្លៃខ្ពស់ ចំពោះការរៀបចំមហាសន្និបាតនេះ ដើម្បីពង្រឹងវប្បធម៌​សន្តិ​ភាព និងការជឿទុកចិត្តគ្នាទៅវិញទៅមក ក្នុងក្របខណ្ឌកិច្ចសហប្រតិបត្តិការអន្តរជាតិ នៅក្នុងតំបន់អាស៊ី​ប៉ាស៊ី​ហ្វិក។

សម្ដេចតេជោនាយករដ្ឋមន្រ្ដី បានថ្លែងបន្តថា បច្ចុប្បន្ននេះ ព្រឹត្តិការណ៍ភូមិសាស្រ្ដនយោបាយមួយក្នុងតំបន់ ដែល​បាននឹងកំពុងទទួលបាន ការចាប់អារម្មណ៍យ៉ាងខ្លំាងពីមជ្ឈដ្ឋានអន្តរជាតិ គឺការដកកងទ័ពរបស់សហរដ្ឋអាមេរិក ចេញពីប្រទេសអាហ្វហ្គានីស្ថាន និងការដណ្ដើមកាន់កាប់ ទីក្រុងកាប៊ុលទាំងស្រុងឡើងវិញ ដោយក្រុមតាលីបង់។ ព្រឹត្តិការណ៍នេះ គឺជាការរំលែកយ៉ាងក្រៀមក្រំ និងជូរចត់ទៅដល់រឿងរ៉ាវ ដែលបានកើតឡើងនៅក្នុងប្រទេសកម្ពុជា កាលពីថ្ងៃទី១៧ ខែមេសា ឆ្នាំ១៩៧៥ ដែលនៅពេលនោះ ខ្មែរក្រហមបានចូលកាន់កាប់ទីក្រុងភ្នំពេញ ដែលនេះគឺ​ស្ថានភាពដ៏អាក្រក់ សោកសៅបំផុត ដែលកម្ពុជា និងប្រជាជនកម្ពុជា ចងចាំពីខ្លោចផ្សា និងប្ដេជ្ញាបញ្ចៀស​ព្រឹត្តិកា​រណ៍​ស្រដៀងគ្នានេះ មិនឲ្យកើតឡើងម្ដងទៀតឡើយ។

សម្ដេចតេជោ ហ៊ុន សែន បានថ្លែងបន្តទៀតថា ច្បាស់ណាស់ថា ទិដ្ឋភាពភូមិសាស្រ្ដនយោបាយ នៅតំបន់អាស៊ីប៉ា​ស៊ី​ហ្វិក កំពុងប្រែប្រួលយ៉ាងឆាប់រហ័ស ព្រមជាមួយនឹងការប្រែប្រួលតុល្យភាព អំណាចសកល និងការប្រកួត​ប្រជែ​ង​ភូមិសាស្រ្ដនយោបាយ ដែលកាន់តែស្មុគស្មាញ ស្រួលស្រាល់ និងគ្រោះថ្នាក់បំផុត។ ជាអកុសល នៅក្នុងកម្រិ​ត​ណា​មួយនោះ ខ្សែបន្ទាត់ភូមិសាស្រ្ដនយោបាយ ត្រូវបានគូសវាសឡើងរួចទៅហើយ ដែលការណ៍នេះ អាចនឹងរុញ​ច្រានឲ្យមានការកើតឡើង និន្នាការបន្ទច់បង្អាក់មិនប្រក្រតី នោះគឺរដ្ឋតូចៗ កំពុងស្ថិតនៅក្រោមសម្ពាធ ឲ្យធ្វើការ​ជ្រើសរើសភាគីម្ខាងៗ ដែលផ្ទុយពីឆន្ទៈ និងផលប្រយោជន៍ជាតិរបស់ខ្លួន។

ប្រមុខរាជរដ្ឋាភិបាលកម្ពុជា បានគូសបញ្ជាក់ថា «តាមរយៈបទពិសោធន៍ ដែលស្ដែងចេញពីការវិវត្ត នៃស្ថានកា​រណ៍​នយោបាយ នៅប្រទេសអាហ្វហ្គានីស្ថាន និងទីកន្លែងផ្សេងទៀត យើងអាចយល់ច្បាស់បានថា មានតែភាគីពាក់ព័ន្ធ នៅក្នុងប្រទេសមានជម្លោះតែប៉ុណ្ណោះ ដែលអាចចូលរួមចំណែកកសាងសន្តិភាព និងប្រទេសជាតិបាន។ ប្រទេស​ដទៃ​ទៀត មិនអាចដើរតួជំនួស ក្នុងការកសាងនេះបានឡើយ»។

ក្នុងន័យសម្ដេចតេជោ ហ៊ុន សែន បានលើកឡើងទៀតថា «ភាពជាម្ចាស់ប្រទេស« គឺជាគន្លឹះឈានឆ្ពោះ ទៅរក​ជោ​គជ័យ និងសន្តិភាពពេញលេញ ប្រកបដោយនិរន្តភាព។ និយាយមួយបែបទៀត បានន័យថា​ ប្រទេសដទៃ មិនអាច​មកបណ្ដុះគុណតម្លៃ និងប្រព័ន្ធនយោបាយ ឲ្យប្រទេសណាមួយបាននោះឡើយ ដោយសារមូលដ្ឋានគ្រឹះសំខាន់​ទាំង​នេះ ត្រូវការការរីកលូតលាស់ ជាលំដាប់លំដោយ ស្របទៅតាមបរិបទនយោបាយ សេដ្ឋកិច្ច សង្គមកិច្ច និងវប្ប​ធម៌របស់ប្រទេសនីមួយៗ៕  

អត្ថបទ៖ ឃួន សុភ័ក្រ