ទឹកទន្លេខេត្តស្ទឹងត្រែង នៅតែបន្តឡើងជិតមួយម៉ែត្រ បន្ថែមទៀត

ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានប្រកាសនៅព្រឹកថ្ងៃទី២៦ ខែកញ្ញានេះថា ទន្លេទាំង៣ នៅក្នុងខេត្តស្ទឹងត្រែង នៅតែបន្តឡើងជិត ១ម៉ែត្របន្ថែមទៀត។ លោក ប៉ាង ប៉េង​ ប្រធានមន្ទីរធនធានទឹក និងឧត្តុនិយមខេត្តស្ទឹងត្រែង បានបញ្ជាក់ថា ទន្លេមេគង្គប្រកាសអាសន្ន ១០.៧០ម៉ែត្រ ព្រឹកម្សិល៧.៤០ ព្រឹកនេះ ៨.៣០ម៉ែត្រ ឡើងជិតមួយម៉ែត្រ (០.៩០ម៉ែត្រ)។

ទន្លេសេកុងប្រកាសអាសន្ន ១១.៥០ម៉ែត្រ ព្រឹកម្សិល ៨.៦៦ម៉ែត្រ ព្រឹកនេះ ៩.៥២ឡើងជិតមួយម៉ែត្រ (០.៨៦ម៉ែត្រ)។ ចំណែកទន្លេសេសានប្រកាសអាសន្ន ១០.៥០ម៉ែត្រ ព្រឹកម្សិល ៨.០៩ម៉ែត្រ ព្រឹកនេះ ៨.២៥ឡើងត្រឹមតែជាងមួយតឹកប៉ុណ្ណោះ។

លោក ប៉ាង ប៉េង បានបញ្ជាក់បន្ថែមថា នៅព្រឹកថ្ងៃទី២៥​កញ្ញាម្សិលមិញ ទឹកទន្លេមេគង្គ ទន្លេសេសាន និងទន្លេសេកុង បានហក់ឡើងជិត ៣ម៉ែត្រ និងទន្លេសេសានឡើងជាង ៣ម៉ែត្រ ដែលបានធ្វើឲ្យមានការព្រួយបារម្ភ តែស្ថានភាពថ្ងៃនេះ បានធូរស្បើយមកវិញ ដោយសារទន្លេទាំង ៣ឡើងត្រឹមតែជិតមួយម៉ែត្រប៉ុណ្ណោះ។

លោកបន្តថា ភ្លៀងផ្នែកខាងលើ និងនៅក្នុងខេត្តស្ទឹងត្រែង នៅតែបន្តធ្លាក់ជារៀងរាល់ថ្ងៃនៅឡើយ ហើយបើសិននៅតែមានភ្លៀងធ្លាក់ ទឹកទន្លេនៅតែបន្តឡើងនោះ ក៏អាចបង្កទៅជាគ្រោះទឹកជំនន់បានដែរ។ លោកថា ទោះទឹកឡើងតិច ឬច្រើន យើងត្រូវតែនាំគ្នាលើកកម្ពស់ការប្រុងប្រយ័ត្ន ព្រោះរហូតមកដល់ថ្ងៃនេះ ទឹកទន្លេទាំង៣ នៅតែបន្តឡើងនៅ​ឡើយ​៕

អត្ថបទ៖ ងិន លីម