ព័ត៌មានជាតិ
សមាជិកឧត្ដមក្រុមប្រឹក្សា គាំទ្របទបញ្ជាសម្ដេចតេជោ តែខកចិត្តនឹងអាជ្ញាធរមូលដ្ឋាន
សមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ បានសម្ដែងការគាំទ្រ ចំពោះការចេញបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលឲ្យមន្ត្រីចុះទប់ស្កាត់ និងបង្រ្កាបករណីកាប់ព្រៃលិចទឹក និងវាទទីយកដីនៅតាមបឹងទន្លេសាប។ ប៉ុន្តែក្រៅពីគាំទ្រ សមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ ២រូប បានសម្ដែងការខកចិត្តចំពោះអាជ្ញាធរមូលដ្ឋាន ដែលមិនព្រមដោះស្រាយបញ្ហានេះដោយខ្លួនឯង រហូតទាល់តែសម្ដេចតេជោនាយករដ្ឋមន្ត្រី ចេញបទបញ្ជាទើបនាំគ្នាដោះស្រាយ។
លោក ពេជ្រ ស្រស់ សមាជិកឧត្ដមក្រុមប្រឹក្សាពិគ្រោះ និងយោបល់ពីគណបក្សយុវជនកម្ពុជា មានប្រសាសន៍ប្រាប់កម្ពុជាថ្មីនៅថ្ងៃទី ១ ខែធ្នូនេះថា ការដែលសម្ដេចតេជោនាយករដ្ឋមន្ត្រី បានចេញបទបញ្ជាឲ្យមន្ត្រីចុះទប់ស្កាត់ និងបង្រ្កាបករណីកាប់ព្រៃលិចទឹក និងវាទទីយកដីនៅតាមបឹងទន្លេសាបនោះ គឺជារឿងល្អបំផុតសម្រាប់ការពារទ្រព្យសម្បត្តិជាតិ និងធនធានធម្មជាតិផងដែរ។
ប៉ុន្តែលោក ពេជ្រ ស្រស់ បានបង្ហាញការសោកស្ដាយ។ សោកស្ដាយ ត្រង់ថា អ្នកដែលកាប់ព្រៃលិចទឹក និងវាទទីយកដីនៅទីនោះ គឺជាមន្ត្រី។ លោកថា «អ្នកដែលយកហ្នឹង គឺជាអ្នកអនុវត្តច្បាប់ អ្នកគ្រប់គ្រងអំណាច ហើយខ្លួនជាអ្នកកាន់ការនៅក្នុងតំបន់មួយ ហើយបែរជាយកអំណាចតួនាទីរបស់ខ្លួន ទៅយកដីរដ្ឋ អាហ្នឹងជារឿងមួយ ដែលគួរកើតឡើងទាល់ តែសោះ ប៉ុន្តែទោះបីជាយ៉ាងណា យើងឃើញថា ប្រមុខរដ្ឋាភិបាល នាយករដ្ឋមន្ត្រីកម្ពុជា បានបញ្ជាយ៉ាងម៉ឺងម៉ាត់ ឲ្យស្រាវជ្រាវអ្នកពាក់ព័ន្ធ ព្រមទាំងដកហូតដីនោះ មករក្សាទុកជាដីរដ្ឋវិញ អាហ្នឹងរឿងមួយដែលធ្វើការទាន់ពេលវេលា»។
សមាជិកឧត្ដមក្រុមប្រឹក្សាពិគ្រោះ និងយោបល់មួយរូបទៀត គឺលោក ម៉ម សូណង់ដូ ដែលជាប្រធានគណបក្សសំបុកឃ្មុំសង្គមប្រជាធិបតេយ្យផងនោះ បានមានប្រសាសន៍ថា ការចេញបញ្ជា របស់សម្ដេចតេជោ ហ៊ុន សែន ខាងលើនេះ គឺជាការដែលល្អសម្រាប់ប្រទេសជាតិ និងប្រជាពលរដ្ឋ។ មិនខុសពីលោក ពេជ្រ ស្រស់ នោះទេ លោក ម៉ម សូណង់ដូ បានថ្លែងថា មិនគួរឲ្យកើតមានករណីកាប់ព្រៃលិចទឹក និងវាទទីយកដីនៅតាមបឹងទន្លេសាបនោះឡើយ។
លោក ម៉ម សូណង់ដូ បានលើកឡើងថា «ខ្ញុំគិតឃើញថា ធម្មតាមិនត្រូវមានបញ្ហាហ្នឹង មករំខានសម្ដេចតេជោទេ ពី ព្រោះយើងមាន អភិបាលខេត្ត យើងមានលេខាធិការ យើងមានមន្ទីរសុរិយោដី យើងមានក្រសួងយុត្តិធម៌។-ល-។ បើអ្នកទាំងអស់ហ្នឹង ធ្វើកិច្ចការរៀងៗខ្លួនទៅ អាបញ្ហាហ្នឹងវាមិនមកដល់សម្ដេចទេ»។
ទាំងលោក ពេជ្រ ស្រស់ និងលោក ម៉ម សូណង់ដូ ដែលជាសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ នាពេលកន្លងមកបានចុះទៅសិក្សាស្រាវជ្រាវ ពាក់ព័ន្ធនឹងករណីដីធ្លីនេះដែរ និងបានធ្វើរបាយការណ៍ជូនរាជរដ្ឋាភិបាល ដើម្បីមានចំណាត់ការដោះស្រាយផងដែរ។
គួររំលឹកថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី ២៨ ខែវិច្ឆិកា ឆ្នាំ ២០២១ បានចេញសារជាសំឡេងមួយ ដោយបានចេញបទបញ្ជា ឲ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើយុទ្ធនាការទប់ស្កាត់ និងបង្រ្កាបករណីលួចកាប់ព្រៃលិចទឹក និងវាទទីយកដីនៅតាមបឹងទន្លេសាប ជាពិសេសនៅខេត្តកំពង់ឆ្នាំង។
បន្ទាប់ពីទទួលបានបទបញ្ជានេះភ្លាម លោកឧបនាយករដ្ឋមន្ត្រី ជា សុផារ៉ា ប្រធានក្រុមការងារអន្តរក្រសួង បានដឹកនាំកិច្ចប្រជុំភ្លាមៗ និងបានចុះទៅត្រួតពិនិត្យដោយផ្ទាល់ នៅតាមបណ្ដាខេត្តជាប់បឹងទន្លេសាប។ ក្នុងនោះ ក្រុមការងារអន្តរក្រសួង បានរកឃើញមានករណីលួចកាប់ព្រៃលិចទឹក និងវាទទីយកដីជាច្រើនហិកតា និងបានហូតយកមកជាទ្រព្យសម្បត្តិរបស់រដ្ឋវិញផងដែរ៕
អត្ថបទ៖ ឃួន សុភ័ក្រ
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍៣ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ២ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore