Connect with us

ព័ត៌មានអន្ដរជាតិ

តើអាមេរិក ត្រូវចំណាយលុយប៉ុន្មាន ដើម្បីសង់ស្ពាននៅ Baltimore ឡើងវិញ

បានផុស

នៅ

ប៉ុន្មានម៉ោងបន្ទាប់ពីស្ពាន Francis Scott Key ត្រូវកប៉ាល់ដឹកកុងតឺន័របុកបាក់ ប្រធានាធិបតីសហរដ្ឋអាមេរិកលោក ចូ បៃដិន បានប្រកាសថា រដ្ឋាភិបាល នឹងចំណាយលើការកសាងគម្រោងដ៏សំខាន់នេះឡើងវិញ ហើយក្រោយការវាយតម្លៃនិងគិតគូរមក ក្រុមអ្នកជំនាញប៉ាន់ស្មានថា ថ្លៃសាងសង់ស្ពានដែលតភ្ជាប់ទៅកំពង់ផែ Baltimore ក្នុងរដ្ឋ Maryland ដ៏សំខាន់មួយនេះ​ នឹងត្រូវចំណាយអស់ប្រាក់ប្រមាណ៦០០លានទៅ២ពាន់លានដុល្លារ អាស្រ័យលើពេលវេលានៃការសាងសង់។

(រូបថត៖ AP)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក្តី តាមសេចក្តីរាយការណ៍របស់ Reuters កាលពីថ្ងៃព្រហស្បតិ៍ទី២៨ខែមីនា, ក៏មានការខ្វែងគំនិតគ្នាផងដែរពាក់ព័ន្ធកញ្ចប់ថវិកាយកទៅសាងសង់ស្ពាននេះឡើងវិញ ដោយលោក បៃដិន បានស្នើឲ្យចំណាយថវិកាសហព័ន្ធ ប៉ុន្តែសភាអះអាងថា នេះគឺទំនួលខុសត្រូវរបស់រដ្ឋ Maryland តែមួយគត់។

ត្បិតតែថ្លៃចំណាយសង់ស្ពាន មិនត្រូវគេដឹងច្បាស់ថាអស់ប៉ុន្មានឲ្យប្រាកដក៏ពិតមែន តែលោក បៃដិន នៅតែហ៊ានធានាថា លោកនឹងបញ្ចុះបញ្ចូលឲ្យសភាគាំទ្រសំណើរបស់លោកឲ្យទាល់តែបាន ជាហេតុធ្វើឲ្យអ្នកប្រជាធិបតេយ្យភាគច្រើន សរសើរមិនដាច់ពីមាត់ ជាពិសេសពីសំណាក់តំណាងរាស្រ្តនៅក្នុងរដ្ឋ Maryland ផ្ទាល់តែម្តង។

លោក ចូ បៃដិន (រូបថត៖ Getty)

លោក បៃដិន ប្រាប់អ្នកសារព័ត៌មាននៅឯសេតវិមានថា “បំណងរបស់ខ្ញុំគឺថា រដ្ឋាភិបាលសហព័ន្ធនឹងចំណាយថ្លៃដើមទាំងស្រុង ក្នុងការសាងសង់ស្ពានឡើងវិញ ហើយខ្ញុំសង្ឃឹមថាសភានឹងគាំទ្ររឿងនេះ”។

ទោះបីជាយ៉ាងណាក៏ដោយ គំនិតនេះបានបង្កឲ្យមានប្រតិកម្មពីអ្នកអភិរក្ស ដែលក្តៅស្លឹកត្រចៀករួចទៅហើយជាមួយនឹងការអនុម័តរបស់សភានាពេលថ្មីៗនេះ អំពីកញ្ចប់ថវិកាដ៏ធំសម្រាប់ឆ្នាំ២០២៤។ ពួកគេនិយាយថា ជាមួយនឹងឱនភាពថវិកាបច្ចុប្បន្ន រដ្ឋាភិបាលសហរដ្ឋអាមេរិក មិនអាចបន្ថែមប្រាក់ទៅលើបំណុលជាតិដែលកំពុងធ្ងន់ធ្ងរស្រាប់បានទៀតទេ។

(រូបថត៖ Shutterstock)

ស្របពេលជាមួយគ្នានោះ អ្នកសេរីនិយមមួយចំនួននៅក្នុងគណបក្សប្រជាធិបតេយ្យ ក៏ចោទសួរអំពីសំណើរបស់លោកបៃដិនផងដែរ ដោយលើកហេតុផលថា មូលហេតុមួយនៃឧបទ្ទវហេតុនេះ គឺបណ្តាលមកពីម្ចាស់កប៉ាល់កុងតឺន័រ ដូច្នេះពួកគេក៏ត្រូវតែទទួលខុសត្រូវលើការចំណាយផងដែរ។

លោក Jamal Simmons អ្នកយុទ្ធសាស្រ្តប្រជាធិបតេយ្យ និងជាអតីតនាយកទំនាក់ទំនងរបស់អនុប្រធានាធិបតី Kamala Harris បានលើកឡើងថា “សូមឲ្យមានការច្បាស់លាស់បន្តិចអំពីសោកនាដកម្មនៅ Baltimore។ ស្ពានមិនមែនបាក់ភ្លាមៗទេ ហើយក៏មិនមានការរញ្ជួយដីដែរ។ ស្ពានបាក់ដោយសារតែកប៉ាល់ឯកជនបាត់បង់ការគ្រប់គ្រង យ៉ាងហោចណាស់ ពួកគេត្រូវទទួលខុសត្រូវមួយផ្នែក សម្រាប់ឧប្បត្តិហេតុនេះ”។

លោក Jamal Simmons (រូបថត៖ Getty)

សូមបញ្ជាក់ថា តាំងពីដើមមក សភា​អាមេរិក ​មិន​សូវរកាំរកូសគ្នាដូចពេលនេះទេ បន្ទាប់​ពីមាន​ឧប្បត្តិហេតុណាមួយកើតឡើង ជាក់ស្តែងដូចជានៅពេលដែលស្ពាន I-35 ក្នុងទីក្រុង Minneapolis បាក់កាលពីឆ្នាំ២០០៧ជាដើម ដោយសភាទាំងពីរ បានអនុម័តថវិកាគ្រាអាសន្នដើម្បីសាងសង់ស្ពានឡើងវិញ ហើយអតីតប្រធានាធិបតី George W. Bush ក៏បានចុះហត្ថលេខាលើច្បាប់នេះក្នុងរយៈពេលត្រឹមមួយសប្តាហ៍ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ រកឃើញសាកសព២នាក់ ក្នុងហេតុការណ៍បាក់ស្ពាននៅទីក្រុង Baltimore

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៨ ម៉ោង មុន

នាយករដ្ឋមន្ត្រី ឧបត្ថម្ភថវិកាសរុប៥០ម៉ឺនដុល្លារ ដល់សមាគមសិល្បករខ្មែរ​

ព័ត៌មានជាតិ៨ ម៉ោង មុន

ក្រសួង​ការងារ និង​បណ្តុះបណ្តាល​វិជ្ជាជីវៈ ចេញ​សេចក្តីប្រកាស​ព័ត៌មាន​បង្ហាញ​ពី​កិច្ចខិតខំ​ប្រឹងប្រែង​ក្នុង​ការ​ជួយ​ពលការ​នី​ខ្មែរ​នៅ​ប្រទេស​អា​រ៉ា​ប៊ី​សា​អូឌីត

ព័ត៌មានជាតិ៨ ម៉ោង មុន

សម្ដេចធិបតី​ បញ្ជាឱ្យរៀបចំប្រកួតក្បាច់គុនល្បុកតោ គុនខ្មែរ ខម ស្រងែពែន​  ដើម្បីគាស់រំលើងក្បាច់គុនឡើងវិញ

ព័ត៌មានជាតិ៨ ម៉ោង មុន

សម្ដេចធិបតី ណែនាំឱ្យសមាគមសិល្បករខ្មែរ​ ជួយចាស់ជរា ក្មេងកំព្រា   និងបន្តជួយទ្រទ្រង់ជីវភាពសិល្បករចាស់ជរា

ព័ត៌មានជាតិ៨ ម៉ោង មុន

ឯកឧត្ដម ហ៊ុន ម៉ានី អញ្ជើញចូលរួមគោរពវិញ្ញាណក្ខន្ធ ព្រឹទ្ធមហាឧបាសិកាពុទ្ធសាសនូបត្ថម្ភក៏ គង់ ម៉ាលី

Sokha Hotels

ព័ត៌មានពេញនិយម