សារព័ត៌មានថៃ សរសេរថា ដំណើរទស្សនកិច្ចផ្លូវការរបស់លោកស្រី Paethongthan Shinawatra គឺដើម្បីពង្រឹងទំនាក់ទំនងកម្ពុជា-ថៃ ឱ្យកាន់តែប្រសើរ

លោកស្រី Paethongthan Shinawatra ប្រធានគណបក្សភឿថៃ និងជាប្រធានគណៈកម្មាធិការជាតិអភិវឌ្ឍន៍ថាមពលផ្នែកទន់ នៅថ្ងៃទី១៨ ខែមីនា ឆ្នាំ ២០២៤ បានអញ្ជើញមកធ្វើទស្សនកិច្ចផ្លូវការណ៍នៅព្រះរាជាណាចក្រកម្ពុជា តបតាមការអញ្ជើញរបស់សម្ដេចអគ្គមហាសេនាបតីតេជោ ហ៊ុន សែន កាលពីថ្ងៃទី១៩ ខែកុម្ភៈ កាលពីថ្ងៃទី២១ ខែកុម្ភៈ ឆ្នាំ២០២៤ អំឡុងពេលសម្ដេចតេជោ អញ្ជើញទៅសួរសុខទុក្ខលោក ថាក់ស៊ីន ​នៅទីក្រុងបាងកក ។

ជុំវិញសកម្មភាពទស្សនកិច្ចផ្លូវការរបស់លោកស្រី Paethongthan Shinawatra នៅកម្ពុជានេះ ត្រូវបានសារព័ត៌មាន Khaosod ថៃ សរសេរថា «គឺដើម្បីពង្រឹងទំនាក់ទំនងកម្ពុជា-ថៃ ហើយការពង្រឹងទំនាក់ទំនងលើកនេះ នឹងនាំឱ្យកិច្ចសហប្រតិបត្តិការ និងទំនាក់ទំនងកាន់តែប្រសើរឡើងរវាងប្រទេសទាំងពីររៀងៗខ្លួន» ។

យ៉ាងណាមិញ បើងាកទៅមើលក្រុមជាតិនិយមថៃវិញបានបង្កើតពាក្យចរចាមអារ៉ាមថា ការអញ្ជើញមកបំពេញទស្សនកិច្ចនៅកម្ពុជា របស់លោកស្រី Paetongtarn Shinawatra នេះហើយ អាចជាបន្ទះសៀគ្វីក្នុងការចរចាជុំវិញតំបន់ជម្លោះសមុទ្ររវាងថៃ និងកម្ពុជា។

ពាក់ព័ន្ធជាមួយគ្នានេះ សារព័ត៌មាន Khaosod បានចុះផ្សាយកាលពីថ្ងៃទី៩ ខែមីនា ថា ក្រុមជាតិនិយមថៃ បានយល់ឃើញថា ផែនការចរចាតំបន់ជម្លោះសមុទ្ររវាងថៃ និងកម្ពុជា ដែលធ្លាប់បានផ្ដួចផ្ដើមដោយលោក ថាក់ស៊ីន កាលនៅជានាយករដ្ឋមន្ត្រី ទំនងអាចនឹងកើតឡើងម្ដងទៀតចំពេលដែលគណបក្សភឿថៃ កំពុងកាន់អំណាច ។

យោងតាមការអត្ថាធិប្បាយរបស់សារព័ត៌មានក្នុងស្រុក (ថៃ) ជម្លោះដែនសមុទ្រទំហំ ២៦.០០០ គីឡូម៉ែត្រការ៉េ រវាងប្រទេសថៃ និងកម្ពុជា បាននៅទ្រឹងចាប់តាំងពីប្រទេសទាំងពីរបានចុះហត្ថលេខាលើអនុស្សារណៈយោគយល់គ្នា (MOU) ក្នុងឆ្នាំ ២០០១ ដោយបានយល់ព្រម “ការចរចាព្រំដែនសមុទ្រខណៈពេលដែលរួមគ្នាអភិវឌ្ឍធនធានប្រេង” ។

គេជឿថា តំបន់ជម្លោះនៅឈូងសមុទ្រថៃ អាចមានឧស្ម័នធម្មជាតិ ១១ទ្រីលានហ្វីតគូប ដែលមានតម្លៃ ៣.៥ពាន់ពាន់លានបាត (៩៨.៨១៤.២៤០.០០០ ដុល្លារ) និងប្រេង ៥០០លានបារ៉ែល ដែលមានតម្លៃ ១.៥ពាន់ពាន់លានបាត(៤២.៣៤៨.៩៦០.០០០ ដុល្លារ)។ ប្រទេសទាំងពីរអាចទទួលបានអត្ថប្រយោជន៍ពីការចែករំលែកធនធានទាំងនេះ ៕

ប្រែសម្រួលដោយ៖ ប៉ោ កុសល