ព័ត៌មានជាតិ

ក្រុងសែនមនោរម្យ អាកាសធាតុចុះត្រជាក់ដល់ ២០ អង្សាសេ

បានផុស

៣ years មុន

នៅ

ថ្ងៃព្រហស្បតិ៍ ២ ធ្នូ ២០២១

ដោយ

ក្រុងសែនមនោរម្យក្នុងខេត្តមណ្ឌលគីរី អាកាសធាតុបានចុះត្រជាក់គួបផ្សំមានភ្លៀងធ្លាក់ជាច្រើនថ្ងៃជាប់គ្នា។

លោក សុន សារឿន ប្រធានមន្ទីរព័ត៌មានខេត្តមណ្ឌលគិរីបានឲ្យកម្ពុជាថ្មីដឹងថា ស្ថានភាពអាកាសធាតុនៅខេត្តមណ្ឌលគីរីបានចុះត្រជាក់ជាពិសេសនៅក្រុងសែនមនោរម្យ ដែលកម្រិតសីតុណ្ហភាពចុះដល់ ២០ អង្សាសេ។

លោក សុន សារឿន ដែលជាប្រធានមន្ទីរព័ត៌មាននិងក៏ជាអ្នកនាំពាក្យរដ្ឋបាលខេត្តផងនោះបានបន្តថា ខេត្តមណ្ឌលគិរីស្ថិតនៅតំបន់ឦសាន អាកាសធាតុតែងតែមានភាពត្រជាក់ខុសពីតំបន់ដទៃ។ តែអាកាសធាតុអាចប្រែប្រួលពីតំបន់មួយទៅតំបន់មួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា នៅក្រុងសែនមនោរម្យអាកាសធាតុត្រជាក់ជាងតំបន់ដទៃទៀត ដោយសារទីតាំងភូមិសាស្ត្រស្ថិតនៅតំបន់ខ្ពង់រាបសំបូរភ្នំខុសពីតំបន់តាមស្រុកមួយចំនួនដូចជាស្រុកកោះញែកជាប់ខេត្តរតនគីរី និងស្រុកមណ្ឌលសីមាជាប់ខេត្តក្រចេះ អាកាសធាតុអាចក្តៅជាងពីតំបន់ប្រជុំជនក្រុង។

លោកសុន សារឿនបានបន្តថា ពលរដ្ឋក្នុងខេត្តមណ្ឌលគិរីស៊ាំអាកាសធាតុត្រជាក់ តែសម្រាប់ភ្ញៀវទេសចរណ៍មកលេងខេត្តក្នុងរដូវកាលនេះ ត្រូវយកចិត្តទុកដាក់ថែរក្សាសុខភាពឲ្យបានល្អ ចៀសវាងកើតមានបញ្ហាផ្សេងៗ។

“ពលរដ្ឋខេត្តមណ្ឌលគិរីសឹងតែជារឿងធម្មតាទៅហើយ អ្នកខ្លះសឹងមិនដឹងថាជាខែរងារទៀតផង តែបងប្អូនមកពីចម្ងាយត្រូវមានអាវរងារពាក់ជាប់ជានិច្ច ដើម្បីអាចទប់ទល់អាកាសធាតុត្រជាក់នេះ”។

តាមការព្យាករណ៍របស់ក្រសួងធនធានទឹកនិងឧតុនិយមចាប់ពីថ្ងៃ១-៧ធ្នូ កម្ពុជានឹងចុះត្រជាក់ក្នុងសីតុណ្ហភាពពី ១៥ ទៅដល់ ២៩ អង្សាសេ។

ខេត្តជាប់ជួរភ្នំដងរែក និងខ្ពង់រាបឦសានដែលមានដូចជា មណ្ឌលគិរី រតនគិរី ព្រះវិហារ និងខេត្តឧត្តរមានជ័យអាកាសធាតុអាចចុះដល់ ១៤ អង្សាសេ៕

អត្ថបទ៖ ប៊ុណ្ណារ៉ា

Related Topics:ខេត្តមណ្ឌលគិរី