អ្នកវិភាគអន្តរជាតិ លើកចំណុចធំ១ ដែល ពូទីន នឹងបញ្ឆេះសង្គ្រាមលោកលើកទី៣

ហានិភ័យដែលពិភពលោក កើតសង្គ្រាមលោកលើកទី៣ចេះតែកើនឡើងបន្តិចម្តងៗ ជាពិសេសក្រោយពេលវិបត្តិរុស្ស៊ី-អ៊ុយក្រែន ហាក់គ្មានឃើញសញ្ញាឈានទៅរកច្រកចេញទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្យ៉ាងវិញទៀត ថ្មីៗនេះ សហរដ្ឋអាមេរិក ថែមទាំងព្រមានដកខ្លួនឈប់ដើរតួនាទីជាអ្នកសម្របសម្រួលបញ្ចប់សង្គ្រាមនេះទៀតផង បើខ្លួនយល់ឃើញថា ការខិតខំរបស់ខ្លួន មិនអាចទៅរួច ដែលនេះធ្វើឲ្យសង្គ្រាមកាន់តែពុះកញ្ជ្រោល។

មិនត្រឹមប៉ុណ្ណឹង រុស្ស៊ី តែងគំរាមដល់បណ្តាប្រទេសទាំងឡាយណាដែលបន្តជួយសព្វាវុធដល់អ៊ុយក្រែនថា ពួកគេនឹងក្លាយជាភាគីជម្លោះដោយផ្ទាល់ បើនៅតែបន្តធ្វើដូចនេះទៀត ហើយថែមទាំងព្រមានសងសឹក ដែលធ្វើឲ្យគេបារម្ភថា នឹងរាលដាលក្លាយជាសង្គ្រាមពេញទំហឹងទៀតផង។

ជុំវិញរឿងរ៉ាវពាក់ព័ន្ធសង្គ្រាមលោកលើកទី៣នេះដែរ អ្នកវិភាគអន្តរជាតិឈានមុខនៅសាកលវិទ្យាល័យ Buckingham នៃចក្រភពអង់គ្លេស លោកសាស្រ្តាចារ្យ Anthony Glees បានលើកឡើងនូវចំណុចដ៏ធំមួយ ដែលលោកពូទីន នឹងធ្វើឲ្យសង្គ្រាមលោកលើកទី៣ ឆាបឆេះឡើង។

តាមការលើកឡើងរបស់លោកសាស្រ្តាចារ្យ Glees និងត្រូវបានយកមកចុះផ្សាយដោយសារព័ត៌មាន LADbible កាលពីថ្ងៃព្រហស្បតិ៍ទី១៧ខែមេសាឆ្នាំ២០២៥, ពេលណារុស្ស៊ី ទទួលជ័យជម្នះនៅអ៊ុយក្រែនហើយនោះ លោកពូទីន នឹងបន្តដាក់សម្ពាធលើរដ្ឋជាអតីតសហភាពសូវៀតដែលបានក្លាយជាសមាជិកអង្គការណាតូដូចជា អេស្តូនី ឡេតូនី លីទុយអានី ប៉ូឡូញនិងហុងគ្រី ជាដើម។ 

ទង្វើនេះនឹងនាំឲ្យមានការលូកដៃពីសំណាក់មហាអំណាចធំៗ ហើយធ្វើឲ្យភាពតានតឹង ឡើងដល់កម្រិតខ្ពស់បំផុត។  ម្យ៉ាងវិញទៀត បើលោកពូទីន ពិតជាហ៊ានវាយប្រហារចូលទឹកដីប្រទេសជាសមាជិកណាតូមែននោះ ច្បាស់ណាស់សម្ព័ន្ថភាពយោធាដឹកនាំដោយអាមេរិកមួយនេះ នឹងមិនឱបដៃឈរមើលឡើយ។ ណាតូនឹងប្រើមាត្រា៥ដែលចែងថា ការវាយប្រហារលើរដ្ឋជាសមាជិកណាមួយ គឺស្មើនឹងការវាយប្រហារលើអង្គការនេះទាំងមូល។

ដូច្នេះសូមអ្នកស្រម៉ៃទៅមើលថាតើនឹងមានអ្វីកើតឡើង ពេលមហាអំណាចយោធាប៉ះគ្នានោះ?

អត្ថបទ៖ សុខ សុវណ្ណ

ចុចអាន៖ និយាយជាមួយពូទីនចប់ភ្លាម ត្រាំ ថា បើផ្ទុះសង្គ្រាមលោកលើកទី៣ ទ័ពអាមេរិក ក៏អាចចូលប្រយុទ្ធដែរ