ពលរដ្ឋប្រមាណ ៦០០នាក់ នៅស្រុកអូររាំង ទទួលបានសេវាព្យាបាលឥតគិតថ្លៃពីគ្រូពេទ្យយោធាប្រទេសវៀតណាម

កាលពីថ្ងៃទី៨ ខែមេសា ឆ្នាំ២០២៥ គ្រូពេទ្យយោធាខេត្តដាក់ណុង នៃសាធារណរដ្ឋសង្គមនិយមវៀតណាម សហការជាមួយអាជ្ញាធរស្រុកអូររាំង បានចុះពិនិត្យព្យាបាលប្រជាពលរដ្ឋប្រមាណ ៦០០នាក់ ដោយឥតគិតថ្លៃ នៅមណ្ឌលសុខភាពអូររាំង ដែលស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី។

លោក សៀក មុនី អភិបាលស្រុកអូររាំង បានឱ្យដឹងថា ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ គណៈប្រតិភូយោធាភូមិភាគ៥ ខេត្តដាក់ណុង នៃសាធារណៈរដ្ឋសង្គមនិយមវៀតណាម ដឹកនាំដោយលោក ង្វៀន វ៉ាន់ឃើយ អនុប្រធានការិល័យនយោបាយយោធាភូមិភាគ៥ បានសហការជាមួយអាជ្ញាធរមូលដ្ឋានស្រុកអូររាំង ដើម្បីពិនិត្យសុខភាព និងព្យាបាលជូនដល់ប្រជាពលរដ្ឋ ចំនួន ៦០០នាក់ ដែលរស់នៅឃុំសែនមនោរម្យ ស្រុកអូររាំង ខេត្តមណ្ឌលគិរី។

លោកបន្តថា ដើម្បីពង្រឹងសហប្រតិបត្តិការនាប្រទេសទាំ២ រវៀងខេត្តដាក់ណុងប្រទេសវៀតណាម និងខេត្តមណ្ឌលគិរីប្រទេសកម្ពុជា ក្រុមគ្រូពេទ្យយោធាខេត្តដាក់ណុងនៃសាធារណរដ្ឋសង្គមនិយមវៀតណាម តែងតែចុះជួយពិនិត្យព្យាបាលប្រជាពលរដ្ឋខេត្តមណ្ឌលគិរីជាញឹកញាប់។

លោកបានបញ្ជាក់ថា ក្រោយពីការពិនិត្យព្យាបាលរួចហើយប្រជាពលរដ្ឋដែលមកទទួលពិនិត្យ និងព្យាបាលមានជីវភាពខ្វះខាតចំនួន ២៥០គ្រួសារ ក៏បានទទួលអំណោយ ដូចជាអង្ករ និងគ្រឿងទេសមួយចំនួនទៀតពីរដ្ឋបាលស្រុកអូររាំង មុនត្រឡប់ទៅគេហដ្ឋានវិញផងដែរ៕

អត្ថបទ៖រៀម សុខហេង