ក្រៅពី Xabi Alonso ក្លិប Real Madrid សម្លឹងឃើញគ្រូ ៣ នាក់ទៀត មកជំនួស Ancelotti

ក្លិបអធិរាជស Real Madrid បានសម្លឹងឃើញគ្រូបង្វឹកឆ្នើម ៤ រូបមកជំនួសលោក Carlo Ancelotti ស្របពេលតំណែងអ្នកចាត់ការសញ្ជាតិ អ៉ីតាលី វ័យ ៦៥ ឆ្នាំរូបនេះកំពុងស្ថិតក្នុងការឡើងកម្តៅខ្លាំង។

យោងតាមការចុះផ្សាយដោយសារព័ត៌មាន Sky Sports បានឱ្យដឹងថា លោក Carlo Ancelotti នឹងមិននៅដឹកនាំ Real Madrid ដល់បញ្ចប់រដូវកាលនេះឡើយ​។ លោកនឹងដឹកនាំក្រុមត្រឹមការប្រកួតវគ្គផ្តាច់ព្រ័ត្រពាន Copa del Rey ទល់នឹង Barcelona នៅសប្តាហ៍ក្រោយប៉ុណ្ណោះ។ បន្ទាប់មក លោកទំនងជានឹងចាកចេញពីទឹកដី Santiago Bernabeu ភ្លាមៗ។

មូលហេតុ ដែលធ្វើឱ្យកៅអីលោក Ancelotti ឡើងកម្តៅខ្លាំងបែបនេះ បន្ទាប់ពីលោកមិនអាចជួយឱ្យ Real Madrid ឡើងទៅវគ្គពាក់កណ្តាលផ្តាច់ព្រ័ត្រពាន UEFA Champions League បាន ក្រោយបរាជ័យក្រោមថ្វីជើងក្រុម Arsenal ដោយសរុបលទ្ធផលទាំងពីរ​ជើង ៥-១។ យ៉ាងណាឱកាសរបស់អ្នកចាត់ការវ័យ ៦៥ ឆ្នាំ គឺនៅសល់ការ​ប្រជែង​ពានធំៗចំនួន​ ៣ ទៀតដូចជា La Liga, Copa del Rey និង Club World Cup ប៉ុន្តែអនាគតរបស់លោកទំនងនឹងមិនបន្តជាមួយក្រុមអធិរាជសទៀតឡើយ។

ក្លិប Real Madrid ក៏បានសម្លឹងឃើញគ្រូបង្វឹកថ្មីមកជំនួសលោក Ancelotti រួចរាល់ហើយដែរ។ ប្រសិនបើលោកពិតជាចាកចេញមែន នោះគឺលោក Xabi Alonso គ្រូបង្វឹករបស់ក្រុម Bayer Leverkusen ជា​គោល​ដៅ​ចម្បង​ ប៉ុន្តែយោងតាម Transfer Market បានអះអាងថា ក្រុមអធិរាជសបានកត់សម្គាល់លើគ្រូបង្វឹក ៣ រូបផ្សេងទៀត។ ប្រសិនបើបរាជ័យ​ក្នុង​ការ​យកលោក Alonso ក្នុងនោះរួមមាន អតីតអ្នកចាត់ការ Liverpool លោក Jurgen Klopp, គ្រូបង្វឹកបច្ចុប្បន្នរបស់ AFC Bournemouth លោក Andoni Iraola និងអតីតអ្នកចាត់ការរបស់ពួកគេលោក Zinedine Zidane៕

ប្រែសម្រួលអត្ថបទ៖ សេម កុសល
ប្រភព៖ Sky Sports & Transfer Market