អាមេរិក ​ចោទ​ក្រុមហ៊ុន​ផ្កាយរណប​ចិន​ថា​បាន​ជួយ​ដល់​ការ​វាយប្រហារ​របស់​ក្រុមហ៊ូធី

សហរដ្ឋអាមេរិក បានចោទប្រកាន់ក្រុមហ៊ុនផ្កាយរណបរបស់ចិនថា​គាំទ្រដោយផ្ទាល់ដល់ក្រុមឧទ្ទាម​ហ៊ូធី​ដែលគាំទ្រដោយអ៊ីរ៉ង់នៅ​ប្រទេស​យេម៉ែន ដោយផ្តល់នូវរូបភាពប្រើដើម្បីកំណត់គោលដៅនាវាចម្បាំងអាមេរិក និងនាវាអន្តរជាតិនៅក្នុងសមុទ្រក្រហម។

យោងតាម​ការ​ចុះផ្សាយ​របស់​ Financial Times នៅ​ថ្ងៃ​ទី​១៨​ខែមេសា​នេះ ក្រុមហ៊ុន Chang Guang Satellite Technology Co. Ltd (CGSTL) ដែលជាក្រុមហ៊ុនភ្ជាប់​ទំនាក់ទំនង​ជាមួយយោធារបស់ប្រទេសចិន បានផ្គត់ផ្គង់រូបភាពផ្កាយរណបដល់ក្រុម​ហ៊ូធី ដោយសម្រួលដល់ការវាយប្រហាររបស់ពួកគេលើគោលដៅដែនសមុទ្រ។

អ្នកនាំពាក្យក្រសួងការបរទេសអាមេរិក លោកស្រី Tammy Bruce បាននិយាយថា សកម្មភាពរបស់ CGSTL រួមជាមួយនឹងការបន្តគាំទ្ររបស់រដ្ឋាភិបាលក្រុងប៉េកាំងចំពោះក្រុមហ៊ុន បាន​បង្ហាញឧទាហរណ៍ពីការអះអាងផ្ទុយគ្នារបស់​ចិនក្នុងការលើកកម្ពស់សន្តិភាព។

ក្រុមហ៊ូធី បានបង្កើនការវាយលុករបស់ពួកគេលើនាវាពាណិជ្ជកម្ម និងយោធានៅក្នុងសមុទ្រក្រហម ដែលជាផ្លូវដឹកជញ្ជូនសកលដ៏សំខាន់ក្នុងប៉ុន្មានខែថ្មីៗនេះ។ អាមេរិក​បាន​ឆ្លើយតប​នឹង​ការ​វាយ​ប្រហារ​តាម​អាកាស​ជាច្រើន​លើក​ដែល​សំដៅ​លើ​ទីតាំង​ក្រុម​ហ៊ូធី​ក្នុង​ប្រទេស​យេម៉ែន។

ការលាតត្រដាងនៃការចូលរួមរបស់ CGSTL បន្ថែមភាពស្មុគ្រស្មាញដល់ទំនាក់ទំនងរវាងសហរដ្ឋអាមេរិក និងចិនដែលមានភាពតានតឹងរួចមកហើយ និងបង្កើនការព្រួយបារម្ភអំពីតួនាទីរបស់ចិននៅក្នុងជម្លោះមជ្ឈិមបូព៌ា។ ខណៈពេលដែល​អាមេរិកបានជំរុញ​ឲ្យ​ចិនបង្កើនឥទ្ធិពលរបស់ខ្លួនលើអ៊ីរ៉ង់ដើម្បីទប់ស្កាត់ការឈ្លានពានរបស់​ហ៊ូធី ទីក្រុងប៉េកាំងបាន​ព្យាយាម​រក្សាជំហរប្រុងប្រយ័ត្នដោយធ្វើ​ឲ្យ​មានតុល្យភាពផលប្រយោជន៍ក្នុងតំបន់របស់ខ្លួន៕

ដោយ៖ ឈាង