ព័ត៌មានជាតិ

សម្តេចនាយករដ្ឋមន្ត្រីដាក់បទបញ្ជាឲ្យអភិបាលរាជធានីខេត្តចុះបិទហាងឬកន្លែងលក់ដូរណាមិនអនុវត្តតាមវិធានរបស់ក្រសួងសុខាភិបាល

បានផុស

៦ years មុន

នៅ

ថ្ងៃអាទិត្យ ៦ ធ្នូ ២០២០

ដោយ

ភ្នំពេញ ៖ សម្តេចតេជោហ៊ុនសែនប្រមុខរដ្ឋាភិបាលកម្ពុជាបានដាក់បទបញ្ជាដល់អភិបាលរាជធានីខេត្តចុះបិទហាងឬកន្លែងលក់ដូរទាំងឡាយណាមិនបានអនុវត្តត្រឹមត្រូវតាមវិធានរបស់ក្រសួងសុខាភិបាល។

ការដាក់ចេញបទបញ្ជានេះ បានធ្វើឡើងបន្ទាប់ពីមានហាងមួយមានការឆ្លងជំងឺកូវីដ១៩ច្រើននាក់ដែលបណ្តាលមកពីហាងនោះ មិនបានអនុវត្តឲ្យបានត្រឹមត្រូវតាមការណែនាំរបស់ក្រសួងសុខាភិបាលដូចជារក្សាគម្លាតបុគ្គល ពាក់ម៉ាស់និងការលាងដៃជាដើម។

តាមរយៈសារជាសំឡេងដែលបានផ្សព្វផ្សាយនៅថ្ងៃនេះ សម្តេចនាយករដ្ឋមន្ត្រីបានស្នើឲ្យអភិបាលរាជធានីខេត្តទាំងអស់ចុះពិនិត្យមើលតាមកន្លែងលក់ដូរ ហាង ផ្សារ អគារលក់ដូរនានាណែនាំឲ្យអនុវត្តឲ្យបានត្រឹមត្រូវតាមការណែនាំរបស់ក្រសួងសុខាភិបាល។

សម្តេចបានបន្តថា ក្នុងករណីហាងឬកន្លែងណាមួយមិនអនុវត្តតាមទេអាជ្ញាធរត្រូវប្រើអំណាចរបស់រដ្ឋបាលរាជធានីខេត្តបិទទីកន្លែងនោះជាបណ្តោះអាសន្នសិនដើម្បីទប់ស្កាត់កុំឲ្យមានការចម្លងទៅក្នុងសហគមន៍ដូចហាងខាងលើទៀត។

សម្តេចបានបន្ថែមទៀតថា ការដែលហាងឬទីកន្លែងមួយចំនួនអនុវត្តមិនបានត្រឹមត្រូវនេះក៏ជាធ្លោះធ្លោយមួយរបស់អាជ្ញាធររាជធានីខេត្ត ស្រុក ឃុំនិងភូមិផងដែរ។ ដូចនេះស្នើឲ្យមានការអនុវត្តឲ្យបានតឹងតែងនិងម៉ត់ចត់ជាទីបំផុតចំពោះវិធានការអនាម័យ រក្សាគម្លាតបុគ្គលម្នាក់ៗនិងពាក់ម៉ាសឲ្យបានគ្រប់ៗគ្នាពិសេសអ្នកលក់ដូរនិងអតិថិជនត្រូវអនុវត្តដូចគ្នាដើម្បីការពារកាឆ្លងរីករាលដាលនៅក្នុងសង្គមជាបន្តទៀត៕
ដោយ ៖ សំអឿន

Related Topics: