លុបឈ្មោះមន្ត្រីសុរិយោដីមួយរូប ចេញពីក្របខណ្ឌ ក្រោយប្រើតួនាទីរត់ការឯកសារដីធ្លីរកស៊ីក្រៅ

លោក ស៊ីម រតនៈ អភិបាលស្រុកសំរោងទង ខេត្តកំពង់ស្ពឺ បានសម្រេចលុបឈ្មោះ មន្ត្រីសុរិយោដីស្រុក លោក ឡុង សុភាព ចេញពីក្របខណ្ឌ ក្រោមហេតុផលថា មានកំហុសឆ្គាំឆ្គងក្នុងវិជ្ជាជីវៈ ដោយបានយកតួនាទី និងម៉ោងការងាររបស់ខ្លួនរត់ការឯកសារពាក់ព័ន្ធនឹងដីធ្លី។

យោងតាមសេចក្ដីសម្រេច របស់អភិបាលស្រុកសំរោងទង “ត្រូវបានលុបឈ្មោះលោក ឡុង សុភាព ឋានន្តរស័ក្ដិ អនុមន្ត្រី ថ្នាក់លេខ២ ជាមន្ត្រីបម្រើការងារនៅ ការិយាល័យរៀបចំដែនដី នគររូបនីយកម្ម សំណង់ និងភូមិបាល ស្រុកសំរោងទង ចេញពីក្របខណ្ឌ ដោយប្រព្រឹត្តកំហុស និងឆ្គាំឆ្គងក្នុងវិជ្ជាជីវៈ”។

អភិបាលស្រុកសំរោងទងបានប្រាប់អ្នកសារព័ត៌មានថា លោក ឡុង សុភាព បានយកតួនាទី និងម៉ោងការងាររបស់ខ្លួនរត់ការឯកសារពាក់ព័ន្ធនឹងដីធ្លី ហើយធ្វើមិនបានសម្រេចរហូតមានបណ្ដឹងពីប្រជាពលរដ្ឋ។

ម្យ៉ាងទៀត លោក ឡុង សុភាព មិនបានស្ដាប់តាមការណែនាំរបស់ថ្នាក់លើ ព្រមទាំងបញ្ហាមួយចំនួនទៀត ទោះបីជាថ្នាក់លើបានប្រជុំណែនាំនិងបើកផ្លូវឲ្យលោក ឡុង សុភាព ប្ដឹងតវ៉ាយ៉ាងណាក៏ដោយ។

ទោះជាយ៉ាងណា លោក ឡុង សុភាព បានបដិសេធចំពោះការចោទប្រកាន់នេះ ហើយអះអាងថា ដីការនេះកើតឡើងដោយសារគំនុំ និងខ្លាចបាត់ប្រយោជន៍ខ្លួន ច្រើនជាងការអនុវត្តនីតិវិធីច្បាប់៕