លោក ម៉ប់ សារិន ត្រូវបានជ្រើសតាំង ជាប្រធានសមាគមជាតិ ក្រុមប្រឹក្សារាជធានី-ខេត្ត ជំនួសលោក ប៉ា សុជាតិវង្ស

លោក ម៉ប់ សារិន ប្រធានក្រុមប្រឹក្សារាជធានីភ្នំពេញ ត្រូវបានជ្រើសតាំងជាប្រធានសមាគមជាតិ ជំនួសលោក ប៉ា សុជាតិវង្ស ដែលបានទៅកាន់តួនាទីជាទេសរដ្ឋមន្រ្តី ទទួលបេសកកម្មពិសេស។

ការជ្រើសតាំងនេះ ត្រូវបានធ្វើឡើងនាព្រឹកថ្ងៃទី ៩ ខែកុម្ភៈ ឆ្នាំ ២០២២ ក្នុងកិច្ចប្រជុំមួយ ដែលរៀបចំឡើងដោយសមាគមជាតិក្រុមប្រឹក្សារាជធានី-ខេត្ត ដើម្បីបូកសរុបលទ្ធផលការងារឆ្នាំ ២០២១ និងលើកទិសដៅការងារឆ្នាំ ២០២២ ដោយមានសមាសភាពចូលរួមសរុបប្រមាណ ១៩០ រូប ជាអតីតថ្នាក់ដឹកនាំសមាគម (បច្ចុប្បន្ន ជាសមាជិកព្រឹទ្ធសភា រដ្ឋសភា), តំណាងព្រឹទ្ធសភា ក្រសួង-ស្ថាប័នពាក់ព័ន្ធ, សមាជិកក្រុមប្រឹក្សារាជធានី-ខេត្ត ៨៥ រូប, ថ្នាក់ដឹកនាំសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន, គណៈអភិបាលរាជធានី-ខេត្ត, នាយករដ្ឋបាលរាជធានី-ខេត្ត ព្រមទាំងប្រធានការិយាល័យលេខាធិការក្រុមប្រឹក្សារាធានី ខេត្ត និងដៃគូអភិវឌ្ឍន៍។

នៅក្នុងពិធីបើកកិច្ចប្រជុំ លោកស្រី អ៊ុល ភីរុណ អភិបាលខេត្តរងកែប បានថ្លែងសុន្ទរកថាស្វាគមន៍ ដោយគូសបញ្ជាក់ អំពីការគ្រប់គ្រងរដ្ឋបាលដែនដី និងសក្តានុពលទេសចរណ៍របស់ខេត្តកែប។ បន្ទាប់មក លោកយឹម សុខុម ប្រធានស្តីទីសមាគមជាតិក្រុមប្រឹក្សារាជធានី-ខេត្ត បានថ្លែងសុន្ទរថា បើកកិច្ចប្រជុំ ដោយគូសបញ្ជាក់អំពីការបំពេញតួនាទី របស់សមាគមជាតិដែលជាតំណាងសម្លេង និងជាអ្នកការពារផលប្រយោជន៍ស្រមច្បាប់ របស់ក្រុមប្រឹក្សារាជធានី ខេត្តនៅកម្ពុជា។

លោក យឹម សុខុម បានថ្លែងថា តាមរយៈការប្រមូលផ្តុំបញ្ហាប្រឈមនានាក្នុងការអនុវត្តតួនាទីរបស់ក្រុមប្រឹក្សារាជធានី ខេត្ត, សមាគមជាតិបានដាក់សំណើទៅ គ.ជ.អ.ប លើកឡើងសំណូមពរជាគន្លឹះមួយចំនួនដើម្បីស្វែងរកដំណោះស្រាយ សមស្របពាក់ព័ន្ធនិងការអនុវត្តមុខងារ រចនាសម្ព័ន្ធ និងកញ្ចប់ថវិកា។

នៅក្នុងកិច្ចប្រជុំនេះ លោក ម៉ប់ សារិន ប្រធានក្រុមប្រឹក្សារាជធានីភ្នំពេញ ត្រូវបានជ្រើសតាំងជាប្រធានសមាគមជាតិ ជំនួសលោក ប៉ា សុជាតិវង្ស ដែលបានទៅកាន់តួនាទីជាទេសរដ្ឋមន្រ្តី ទទួលបេសកកម្មពិសេស។ ជាមួយគ្នានោះដែរ កិច្ចប្រជុំក៏បានស្វែងយល់ផងដែរ អំពីកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិដំណាក់កាលទី២ (២០២១-២០៣០)។

ពិធីបិទកិច្ចប្រជុំប្រព្រឹត្តទៅក្រោមអធិបតីភាពលោក ចាន់ សុធា អនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គណៈកម្មាធិការជាតិសម្រាប់ការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ដោយលោកបានគូសបញ្ជាក់ អំពីគោលនយោបាយកំណែទម្រង់វិមជ្ឈការ និងវិសហមជ្ឈការនៅកម្ពុជា និងសំណើសំណូមពរលើកឡើង ដោយសមាគមជាតិក្រុមប្រឹក្សារាជធានី-ខេត្ត។

សមាគមជាតិក្រុមប្រឹក្សារាជធានី-ខេត្ត ត្រូវបានបង្កើតក្នុងឆ្នាំ២០១៣ ជា “នីតិបុគ្គល” ធ្វើជាតំណាងឲ្យក្រុមប្រឹក្សារាជ ធានី-ខេត្ត ក្នុងគោលបំណងចំបងចំនួន ៣៖ ទី១. លើកកម្ពស់ឋានៈ និងអភិវឌ្ឍសមត្ថភាពដល់ក្រុមប្រឹក្សារាជធានី ខេត្ត ,ទី២. ការពារផលប្រយោជន៍ និងគុណប្រយោជន៍ស្របច្បាប់របស់សមាជិក និង ទី៣. កសាងភាពជាដៃគូជាមួយក្រសួង -ស្ថាប័នពាក់ព័ន្ធ ដើម្បីអភិវឌ្ឍមូលដ្ឋាន ពង្រឹងនីតិរដ្ឋ និងជំរុញលទ្ធិប្រជាធិបតេយ្យនៅកម្ពុជា៕

អត្ថបទ៖ ស្រីរ័ត្ន