ព័ត៌មានជាតិ

តើអ្នកផ្ទុកមេរោគអេដស៍ អាចចាក់វ៉ាក់សាំងបង្ការកូវីដ១៩ បានដែរឬទេ?

បានផុស

៤ years មុន

នៅ

ថ្ងៃអង្គារ ១៥ កុម្ភៈ ២០២២

ដោយ

តាមការប៉ាន់ប្រមាណរបស់ក្រសួងសុខាភិបាល បានឱ្យដឹងថា បច្ចុប្បន្ននេះ កម្ពុជាមានអ្នកផ្ទុកជំងឺអេដស៍ប្រមាណ ៧៥ ០០០ នាក់ស្មើនឹង០,៥៤ភាគរយនៃប្រជាពលរដ្ឋសរុបនៅទូទាំងប្រទេស។ប៉ុន្តែតើពួកគាត់អាចចាក់វ៉ាក់សាំងការពារជំងឺកូវីដ១៩បានដែរឬទេ?។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគនៃក្រសួងសុខាភិបាលបានមានប្រសាសន៍ នៅថ្ងៃទី១៥ កុម្ភៈនេះថា អ្នករស់នៅជាមួយមេរោគអេដស៍អាចចាក់វ៉ាក់សាំងបង្ការជំងឺកូវីដ១៩ ដូចប្រជាពលរដ្ឋទូទៅនិងអ្នកមានជំងឺមួយចំនួនដែរ។

លោកវេជ្ជបណ្ឌិតបានបន្តថា រហូតមកដល់ពេលនេះយើងមិនបានដឹងថា តើអ្នកផ្ទុកមេរោគអេដស៍ប្រមាណ ៧៥ ០០០ នាក់ នោះទទួលបានចាក់វ៉ាក់សាំងចំនួនប៉ុន្មាននាក់នោះទេ ដោយសារមិនមានតួលេខ ពីព្រោះពេលពួកគាត់ទៅចាក់វ៉ាក់សាំង គេមិនសួរពីស្ថានភាពមេរោគទេ។ លោកវេជ្ជបណ្ឌិតបានបន្តទៀតថា «ខាងខ្ញុំមិនមានតួលេខនេះទេ ដោយគ្រាន់តែបានជួយផ្សព្វផ្សាយលើកទឹកចិត្តឱ្យពួកគាត់ទៅចាក់វ៉ាក់សាំងឱ្យបានគ្រប់គ្នាៗ តាមការណែនាំរបស់រាជរដ្ឋាភិបាល និង អាស្រ័យតាមស្ថានភាពរបស់គាត់ ដែលវាយតម្លៃដោយគ្រូពេទ្យថា អាចចាក់បានឬមិនបាន»។

នៅពេលសួរថា តើខាងមជ្ឈមណ្ឌលមានបានឱ្យបុគ្គលិកតាមមណ្ឌលបើកថ្នាំពន្យារសាកសួរព័ត៌មានពីការចាក់វ៉ាក់សាំងពីអ្នកជំងឺពេលគាត់ទៅទទួលថ្នាំពន្យារទេ លោកវេជ្ជបណ្ឌិតបានបញ្ជាក់ថា« យើងមិនមានគោលការណ៍ណាមួយឱ្យសួរនាំពីបញ្ហានេះទេ យើងគ្រាន់តែអនុវត្តវិធានការសុខាភិបាលពេលពួកគាត់ទៅបើកថ្នាំពន្យារអាយុជីវិតប៉ុណ្ណោះ ដូចជាវាស់កម្ដៅ រក្សាគម្លាតសុវត្ថិភាពបុគ្គល និងការធ្វើអនាម័យដៃដើម្បីការពារកុំឱ្យឆ្លងជំងឺកូវីដ១៩»។ លោកវេជ្ជបណ្ឌិត បានលើកឡើងថា បច្ចុប្បន្ននេះ មជ្ឈមណ្ឌលមានកន្លែងព្យាបាលជំងឺអេដស៍ទាំងមនុស្សចាស់ និងកុមារប្រមាណ ៧១ កន្លែងនៅទូទាំងប្រទេសរួមទាំងគ្លីនិករបស់អង្គការក្រៅរដ្ឋាភិបាលមួយចំនួនផងដែរ។

យ៉ាងណាក៏ដោយ លោកវេជ្ជបណ្ឌិតបានអះអាងថា ចាប់តាំងពីកម្ពុជាមានឆ្លងជំងឺកូវីដ១៩រហូតមកដល់ពេលនេះ មិនមានព័ត៌មានណាមួយបញ្ជាក់ថា អ្នកផ្ទុកជំងឺអេដស៍មានឆ្លងជំងឺនេះ នៅឡើយទេ។

គួរបញ្ជាក់ថា គិតត្រឹមថ្ងៃទី ១៤ ខែកុម្ភៈ ឆ្នាំ ២០២២ កម្ពុជាបានចាក់វ៉ាក់សាំងបង្ការជំងឺកូវីដ១៩ ដូសទី ១ ដល់ប្រជាពលរដ្ឋចាប់ពី ៥ ឆ្នាំឡើងទៅបានចំនួន ១៤ ៣៧៩ ៧៦៦ នាក់ ដូសទី ២ បានចំនួន១៣ ៨០១ ២៧៦នាក់ ដូសទី ៣ ចាប់ពីអាយុ ១២ ឆ្នាំ ឡើងទៅចំនួន ៦ ០៨៦ ១៩៦ នាក់ និងដូសទី ៤ អាយុចាប់ពី ១៨ ឆ្នាំឡើងទៅចំនួន ៦៦៦ ៤៩២ នាក់៕

អត្ថបទ៖ សំអឿន

Related Topics:

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា