ព័ត៌មានជាតិ
រកឃើញកុមារអាយុក្រោម ៥ឆ្នាំ ២០ ភាគរយ ក្នុងចំណោមអ្នកឆ្លងជំងឺអូមីក្រុង
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ឱ្យដឹងថា ក្នុងចំណោមអ្នកឆ្លងថ្មីនៃជំងឺអូមីក្រុង មានកុមារអាយុក្រោម ៥ឆ្នាំ ចំនួន ២០ ភាគរយ ហើយសម្ដេចតេជោបានអំពាវនាវដល់ប្រជាពលរដ្ឋ ខិតខំបន្តប្រយុទ្ធប្រឆាំងជំងឺកូវីដ-១៩ ខណៈមេរោគបំប្លែងខ្លួនថ្មី អូមីក្រុង កំពុងមានការឆ្លងរាលដាលខ្លាំង។
សម្ដេចតេជោ ហ៊ុន សែន ថ្លែងបែបនេះនៅក្នុងពិធីបើកការដ្ឋានសាងសង់ស្ថានីយ៍ ប្រព្រឹត្តកម្មទឹកកខ្វក់បឹងជើងឯក នាព្រឹកថ្ងៃទី ២២ ខែកុម្ភៈ ឆ្នាំ ២០២២នេះ។
សម្ដេចតេជោ ហ៊ុន សែន មានប្រសាសន៍ថា អូមីក្រុងចាប់ផ្ដើមវាយលុកទៅលើកុមារអាយុក្រោម ៥ឆ្នាំ ដោយក្នុងចំនួនអ្នកឆ្លងជំងឺនេះ គឺមានប្រមាណជាង ២០ ភាគរយ នៃកុមារដែលអាយុក្រោម ៥ឆ្នាំ ដែលនេះជារឿងគួរឱ្យបារម្ភ។
សម្ដេចតេជោ បានអំពាវនាវអាណាព្យាបាលត្រូវប្រុងប្រយ័ត្នជាមួយកូនចៅ និងត្រូវបន្តប្រយុទ្ធជាមួយជំងឺដ៏កាចសាហាវនេះតទៅទៀត។ សម្ដេចតេជោ ព្រមទាំងក្រើនរំលឹក នៅថ្ងៃស្អែកជាថ្ងៃចាប់ផ្ដើមចាក់វ៉ាក់សាំងជូនកុមារដែលមានអាយុ៣ឆ្នាំ ដល់ក្រោម៥ឆ្នាំ សូមមាតាបិតាអាណាព្យាបាលនាំកូននាំចៅទៅទទួលវ៉ាក់សាំងនៅទីកន្លែងដែលរៀបចំដោយផ្នែកសុខាភិបាល និងអាជ្ញាធរមូលដ្ឋាន ដើម្បីឱ្យពួកគេមានភាពស៊ាំ។
សម្ដេចតេជោ បានបញ្ជាក់បន្ថែមថា ពីមុនកម្ពុជាអត់មានមនុស្សស្លាប់ដោយសារអូមីក្រុង សឹងតែ១ខែកន្លះ ប៉ុន្តែ៣ថ្ងៃជាប់គ្នានេះ កម្ពុជាមានមនុស្សស្លាប់ ដែលចាត់ទុកថាជាការប្រកាសអាសន្ន សម្រាប់ផ្នែកសុខភាពសាធារណៈ និងការយកចិត្តទុកដាក់ផ្ទាល់ខ្លួនម្នាក់ៗ។ ចំពោះការការពារការឆ្លងកូវីដ-១៩ បាន ឬមិនបាន មិនចំណុះទៅលើវិធានការរបស់រាជរដ្ឋាភិបាល និង ក្រសួងសុខាភិបាលតែឯងទេ គឺចំណុះទាំងស្រុងទៅលើ បុគ្គលម្នាក់ៗ ចូលរួមអនុវត្តវិធានការបង្ការឱ្យហ្មត់ចង់ទាំងអស់គ្នា។
គួរបញ្ជាក់ថា សម្តេចតេជោ ហ៊ុន សែន កាលពីថ្ងៃទី១៦ ខែកុម្ភៈ ឆ្នាំ២០២២ បានផ្ដល់អនុសាសន៍ និងចេញសារាចរណែនាំលេខ០២ស.រ. ចុះថ្ងៃទី១៧ ខែកុម្ភៈ ឆ្នាំ២០២២ ស្តីពីការពង្រឹងការអនុវត្តវិធានការ ប្រយុទ្ធ និងទប់ស្កាត់ការឆ្លងរាលដាលក្នុងសហគមន៍នៃវីរុសកូវីដ-១៩ ជាពិសេសវីរុសបំប្លែងថ្មីប្រភេទអូមីក្រុង ដោយណែនាំឱ្យផ្ដល់វ៉ាក់សាំងកូវីដ-១៩ ដល់កុមារអាយុ ចាប់ពី ៣ឆ្នាំ ទៅក្រោម ៥ឆ្នាំ ដើម្បីទទួលបានដូសមូលដ្ឋានឱ្យបានគ្រប់ៗគ្នា ចាប់ពីថ្ងៃស្អែក ទី២៣ ខែកុម្ភៈ ឆ្នាំ២០២២នេះ និងផ្ដល់វ៉ាក់សាំងដូសទី៣ ឬដូសជំរុញដល់កុមារក្រុមអាយុ ៥ឆ្នាំ ដល់ក្រោម ១២ឆ្នាំឱ្យបានគ្រប់ៗគ្នា ចាប់ពីថ្ងៃនេះ នៅក្នុងក្របខណ្ឌរាជធានី-ខេត្តទាំង២៥៕
អត្ថបទ៖ ច័ន្ទ វីរៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?