អ្នកជំនាញ ៖ ការប្រើប្រាស់បារីអេឡិចត្រូនិក និងអេចឈ៍ ធី ភី បង្កគ្រោះថ្នាក់ធ្ងន់ធ្ងរដល់សុខភាព

អ្នកជំនាញអង្គការសុខភាពកម្ពុជា បានលើកឡើងថា ការប្រើប្រាស់បារីអេឡិចត្រូនិក និងអេចឈ៍ ធី ភី បានបង្កគ្រោះថ្នាក់ធ្ងន់ធ្ងរដល់សុខភាព ជាពិសេសយុវវ័យ ព្រោះវាជាច្រកទ្វារទៅកាន់ការប្រើប្រាស់ថ្នាំញៀន។

នៅក្នុងសិក្ខាសាលា ស្តីពី ការហាមឃាត់ការប្រើប្រាស់ ការនាំចូល និងការធ្វើអាជីវកម្មបារីអេឡិកត្រូនិក និងផលិតផល អេចឆ៍ ធី ភី (HTP) កាលពីថ្ងៃទី ២៨ ខែកម្ភៈ លោកវេជ្ជបណ្ឌិត មុំ គង់ នាយកអង្គការសុខភាពកម្ពុជា បានមានប្រសាសន៍ថា យុវជនជាច្រើននាំគ្នាសាកល្បង ប្រើប្រាស់បារីអេឡិចត្រូនិក និងអេចឈ៍ ធី ភី ក្រោយពីត្រូវបានអូសទាញ ដោយការផ្សព្វផ្សាយរបស់ក្រុមអ្នកលក់បារីអេឡិចត្រូនិក ហើយការប្រើប្រាស់ផលិតផលគ្រោះថ្នាក់ទាំងនោះ ជាច្រកទ្វារទៅកាន់ការប្រើប្រាស់ថ្នាំញៀន ការស្រូបចូលជាតិនីកូទីន ដែលមានលក្ខណៈបង្កភាពងាយស្រួល សម្រាប់ឲ្យអ្នកប្រើប្រាស់ អាចដាក់បញ្ចូលបាននូវកញ្ឆា និងប្រភេទថ្នាំញៀនផ្សេងៗ។

លោកវេជ្ជបណ្ឌិត បានពន្យល់ថា នៅក្នុងបារីអេឡិចត្រូនិក មានផ្ទុកសារធាតុនីកូទីន និងសារធាតុគីមីបង្កជំងឺមហារីក លោហៈធ្ងន់ និងភាគល្អិត អាចស្រូបចូលជ្រៅទៅក្នុងសួត និងបង្កអន្តរាយដល់រាងកាយ។ រីឯឧបករណ៍បារីអេឡិចត្រូនិក មានហានិភ័យលេចធ្លាយ ឆេះ ផ្ទុះ ដោយអាចបង្កនូវការរលាកធ្ងន់ធ្ងរ។

លោកនាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ថា «យើងត្រូវរួមគ្នាបង្ការទប់ស្កាត់ ការប្រើ​ប្រាស់​បារីអេឡិចត្រូនិក​ និងអេចឈ៍ ធី ភី ដែលជាច្រកចូល នៃការប្រើប្រាស់គ្រឿងញៀន»។

លោកនាយឧត្តមសេនីយ៍ មាស វិរិទ្ធ បានថ្លែងអំណរគុណយ៉ាងជ្រាលជ្រៅ ដល់គ្រប់ក្រសួង-ស្ថាប័ន និងគណៈកម្មាធិ ការត្រួតពិនិត្យគ្រឿងញៀនរាជធានី-ខេត្ត និងអ្នកពាក់ព័ន្ធទាំងអស់ ដែលបានចូលរួមយ៉ាងសកម្ម ប្រកបដោយការទទួលខុសត្រូវ អនុវត្តនូវសេចក្តីណែនាំលេខ ០០១/១៤ស.ណ.ន.អ.ជ.ប.គ.ញ និងសេចក្តីណែនាំលេខ ០០១/២១ ស.ណ.ន.អ.ជ.ប.គ.ញ ទទួលបានប្រសិទ្ធភាពខ្ពស់។

លោកនាយឧត្តមសេនីយ៍ មាស វិរិទ្ធ ក៏បានស្នើសុំដល់សិក្ខាសាលាទាំងមូលទាំងមូល បន្តយកចិត្តទុកដាក់ និងលើក យកបញ្ហាប្រឈម និងចែករំលែកបទពិសោធន៍នានា ក្នុងការអនុវត្តសេចក្តីណែនាំ ស្តីពី ការហាមឃាត់ការប្រើប្រាស់ ការនាំចូល និងការធ្វើអាជីវកម្មបារីអេឡិកត្រូនិក និងផលិតផលអេចឆ៍ ធី ភី (HTP) នេះ ឲ្យបានផុលផុស ដើម្បីអនុវត្តទទួលបានជោគជ័យ និងដើម្បីអនាគតកូនចៅយើង ដែលជាទំពាំងស្នងឬស្សី សម្រាប់អភិវឌ្ឍន៍ប្រទេសជាតិ៕

អត្ថបទ៖​ សំអឿន