កម្ពុជា ជំរុញឱ្យវិនិយោគិនអូម៉ង់​មកបណ្តាក់ទុននៅកម្ពុជា​បន្ថែមទៀត

មន្ត្រីជាន់ខ្ពស់ក្រសួងពាណិជ្ជកម្ម បានជំរុញឱ្យវិនិយោគិនអូម៉ង់ ឲ្យមកបណ្តាក់ទុននៅកម្ពុជាបន្ថែមទៀត ខណៈទំហំពាណិជ្ជកម្មរវាងប្រទេសទាំងពីរនៅមានកម្រិតនៅឡើយ។

ការជំរុញនេះបានធ្វើឡើងនៅក្នុងជំនួបពិភាក្សាការងារជាមួយ លោក Saleh Mohamed Ahmed Al Suqri ឯកអគ្គរាជទូតតែងតាំងថ្មីនៃប្រទេសអូម៉ង់ ប្រចាំព្រះរាជាណាចក្រកម្ពុជា នៅថ្ងៃទី ០២ ខែ មីនា ដោយផ្តោតលើការពង្រឹងកិច្ចសហប្រតិបត្តិការទ្វេភាគីក្នុងវិស័យសេដ្ឋកិច្ច ពាណិជ្ជកម្ម និងវិនិយោគ សំដៅបន្តលើកកម្ពស់ភាពជាដៃគូគ្រប់ជ្រុងជ្រោយ និងបង្កើនទំហំពាណិជ្ជកម្មន វិនិយោគទ្វេភាគី នាពេលខាងមុខ។

លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម បានបង្ហាញសុទិដ្ឋិនិយមថា តាមរយៈបេសកកម្មការទូតដ៏មានអត្ថន័យជាមួយនឹងកិច្ចខិតខំប្រឹងប្រែងរបស់ភាគីទាំងពីរ កម្ពុជា និងអូម៉ង់នឹងមានលទ្ធភាពពង្រឹងទំនាក់ទំនងទ្វេភាគីឱ្យកាន់តែជិតស្និទ្ធ ក៏ដូចជាពង្រីកកិច្ចសហប្រតិបត្តិការឱ្យកាន់តែខ្ពស់មួយកម្រិតទៀត។

លោកស្រីបានជម្រាបជូនពីកាលានុវត្តភាពធុរកិច្ចនិងវិនិយោគ បទដ្ឋានគតិយុត្ត និងគោលនយោបាយនានា ដែលទ្រទ្រង់ដល់ធុរជន និងវិនិយោគិនគ្រប់ទីមជ្ឈដ្ឋាន ជាក់ស្តែងកិច្ចព្រមព្រៀងពាណិជ្ជកម្មសេរី ដែលសម្រេចបានក្នុងក្របខណ្ឌទ្វេភាគីកម្ពុជា-ចិន កម្ពុជា-កូរ៉េ និងក្របខណ្ឌអាស៊ានបូកដៃគូ និងអសិប(RCEP)។

ជាមួយគ្នានេះ លោកស្រីរដ្ឋលេខាធិការ ក៏បានជម្រាបជូនពី “ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣” ដែលមានសសរស្តម្ភចំនួន ៣ គឺ ការស្តាឡើងវិញ ការកែទម្រង់ និងការកសាងភាពធន់ ព្រមទាំងសមិទ្ធផលខ្ពស់នៃយុទ្ធនាការចាក់វ៉ាក់សាំង ដែលញ៉ាំងឱ្យមានការបើកសកម្មភាពសេដ្ឋកិច្ច-សង្គមក្នុងគ្រប់វិស័យទូទាំងប្រទេសឡើងវិញ។

លោកស្រីបានបន្ថែមថា« ក្នុងន័យនេះខ្ញុំ សូមលើកទឹកចិត្តវិនិយោគិនអូម៉ង់ចាប់យកឱកាសសេដ្ឋកិច្ចនៅកម្ពុជា តាមរយៈការបង្កើតផលិតកម្ម ការចូលរួមក្នុងខ្សែច្រវ៉ាក់ផ្គត់ផ្គង់តំបន់ និងការវិនិយោគលើផលិតផលសក្តានុពលរបស់កម្ពុជា រួមមាន អង្ករ កៅស៊ូ ចេក ស្វាយ គ្រឿងអេឡិចត្រូនិច ទំនិញសម្រាប់ការធ្វើដំណើរ និងវាយនភ័ណ្ឌ។-ល-។»

ជាការឆ្លើយតប លោកឯកអគ្គរដ្ឋទូតបានគូសបញ្ជាក់ពីការប្តេជ្ញាខ្ពស់របស់ភាគីអូម៉ង់ ដើម្បីលើកស្ទួយទំនាក់ទំនងទ្វេភាគី និងពង្រីកកិច្ចសហប្រតិបត្តិការឱ្យកាន់តែស៊ីជម្រៅជាពិសេសក្នុងវិស័យពាណិជ្ជកម្ម ទេសចរណ៍ កំពង់ផែអន្តរជាតិ និងសភាពាណិជ្ជកម្ម។

ជាងនេះទៅទៀត លោកឯកអគ្គរដ្ឋទូតបានស្នើឱ្យមានការជំរុញការផ្លាស់ប្តូរដំណើរទស្សនកិច្ចរបស់ថ្នាក់ដឹកនាំ និងធុរជន តាមរយៈការចូលរួមការតាំងពិព័រណ៌នានារបស់ភាគីទាំងពីរ ហើយបានស្នើឱ្យពិនិត្យលទ្ធភាពបង្កើតអនុស្សរណៈ ឬកិច្ចព្រមព្រៀងផ្សេងៗ ទៅតាមវិស័យអាទិភាពនីមួយៗរបស់ប្រទេសទាំងពីរ។

គួរបញ្ជាក់ថាទំហំពាណិជ្ជកម្មទ្វេភាគីកម្ពុជា-អូម៉ង់ សម្រេចបានប្រមាណ ៥,៥ លានដុល្លារអាមេរិក សម្រាប់ឆ្នាំ២០២០និង២០២១ហើយមុខទំនិញភាគច្រើនជាទំនិញវាយនភណ្ឌ ជី និង រ៉ែ៕សំអឿន